၂၀၄. ဗိမ္ဗိသာရရာဇဝတ္ထု

၃၃၁. တေန ခေါ ပန သမယေန ရညော မာဂဓဿ သေနိယဿ ဗိမ္ဗိသာရဿ ဘဂန္ဒလာဗာဓော ဟောတိ. သာဋကာ လောဟိတေန မက္ခိယန္တိ. ဒေဝိယော ဒိသွာ ဥပ္ပဏ္ဍေန္တိ – ‘‘ဥတုနီ ဒါနိ ဒေဝေါ၊ ပုပ္ဖံ ဒေဝဿ ဥပ္ပန္နံ၊ န စိရံ [နစိရဿေဝ (သျာ.)] ဒေဝေါ ဝိဇာယိဿတီ’’တိ. တေန ရာဇာ မင်္ကု ဟောတိ. အထ ခေါ ရာဇာ မာဂဓော သေနိယော ဗိမ္ဗိသာရော အဘယံ ရာဇကုမာရံ ဧတဒဝေါစ – ‘‘မယှံ ခေါ၊ ဘဏေ အဘယ၊ တာဒိသော အာဗာဓော၊ သာဋကာ လောဟိတေန မက္ခိယန္တိ၊ ဒေဝိယော မံ ဒိသွာ ဥပ္ပဏ္ဍေန္တိ – ‘ဥတုနီ ဒါနိ ဒေဝေါ၊ ပုပ္ဖံ ဒေဝဿ ဥပ္ပန္နံ၊ န စိရံ ဒေဝေါ ဝိဇာယိဿတီ’တိ. ဣင်္ဃ၊ ဘဏေ အဘယ၊ တာဒိသံ ဝေဇ္ဇံ ဇာနာဟိ ယော မံ တိကိစ္ဆေယျာ’’တိ. ‘‘အယံ၊ ဒေဝ၊ အမှာကံ ဇီဝကော ဝေဇ္ဇော တရုဏော ဘဒြကော. သော ဒေဝံ တိကိစ္ဆိဿတီ’’တိ. ‘‘တေန ဟိ၊ ဘဏေ အဘယ၊ ဇီဝကံ ဝေဇ္ဇံ အာဏာပေဟိ၊ သော မံ တိကိစ္ဆိဿတီ’’တိ. အထ ခေါ အဘယော ရာဇကုမာရော ဇီဝကံ ကောမာရဘစ္စံ အာဏာပေသိ – ‘‘ဂစ္ဆ၊ ဘဏေ ဇီဝက၊ ရာဇာနံ တိကိစ္ဆာဟီ’’တိ. ‘‘ဧဝံ၊ ဒေဝါ’’တိ ခေါ ဇီဝကော ကောမာရဘစ္စော အဘယဿ ရာဇကုမာရဿ ပဋိဿုတွာ နခေန ဘေသဇ္ဇံ အာဒါယ ယေန ရာဇာ မာဂဓော သေနိယော ဗိမ္ဗိသာရော တေနုပသင်္ကမိ၊ ဥပသင်္ကမိတွာ ရာဇာနံ မာဂဓံ သေနိယံ ဗိမ္ဗိသာရံ ဧတဒဝေါစ – ‘‘အာဗာဓံ တေ၊ ဒေဝ၊ ပဿာမာ’’တိ [ပဿာမီတိ (သျာ.)]. အထ ခေါ ဇီဝကော ကောမာရဘစ္စော ရညော မာဂဓဿ သေနိယဿ ဗိမ္ဗိသာရဿ ဘဂန္ဒလာဗာဓံ ဧကေနေဝ အာလေပေန အပကဍ္ဎိ. အထ ခေါ ရာဇာ မာဂဓော သေနိယော ဗိမ္ဗိသာရော အရောဂေါ သမာနော ပဉ္စ ဣတ္ထိသတာနိ သဗ္ဗာလင်္ကာရံ ဘူသာပေတွာ ဩမုဉ္စာပေတွာ ပုဉ္ဇံ ကာရာပေတွာ ဇီဝကံ ကောမာရဘစ္စံ ဧတဒဝေါစ – ‘‘ဧတံ၊ ဘဏေ ဇီဝက၊ ပဉ္စန္နံ ဣတ္ထိသတာနံ သဗ္ဗာလင်္ကာရံ တုယှံ ဟောတူ’’တိ. ‘‘အလံ၊ ဒေဝ၊ အဓိကာရံ မေ ဒေဝေါ သရတူ’’တိ. ‘‘တေန ဟိ၊ ဘဏေ ဇီဝက၊ မံ ဥပဋ္ဌဟ၊ ဣတ္ထာဂါရဉ္စ၊ ဗုဒ္ဓပ္ပမုခဉ္စ ဘိက္ခုသံဃ’’န္တိ. ‘‘ဧဝံ၊ ဒေဝါ’’တိ ခေါ ဇီဝကော ကောမာရဘစ္စော ရညော မာဂဓဿ သေနိယဿ ဗိမ္ဗိသာရဿ ပစ္စဿောသိ.

ဗိမ္ဗိသာရရာဇဝတ္ထု နိဋ္ဌိတံ.