၂၀၅. ရာဇဂဟသေဋ္ဌိဝတ္ထု

၃၃၂. တေန ခေါ ပန သမယေန ရာဇဂဟကဿ သေဋ္ဌိဿ သတ္တဝဿိကော သီသာဗာဓော ဟောတိ. ဗဟူ မဟန္တာ မဟန္တာ ဒိသာပါမောက္ခာ ဝေဇ္ဇာ အာဂန္တွာ နာသက္ခိံသု အရောဂံ ကာတုံ. ဗဟုံ ဟိရညံ အာဒါယ အဂမံသု. အပိ စ၊ ဝေဇ္ဇေဟိ ပစ္စက္ခာတော ဟောတိ. ဧကစ္စေ ဝေဇ္ဇာ ဧဝမာဟံသု – ‘‘ပဉ္စမံ ဒိဝသံ သေဋ္ဌိ ဂဟပတိ ကာလံ ကရိဿတီ’’တိ. ဧကစ္စေ ဝေဇ္ဇာ ဧဝမာဟံသု – ‘‘သတ္တမံ ဒိဝသံ သေဋ္ဌိ ဂဟပတိ ကာလံ ကရိဿတီ’’တိ. အထ ခေါ ရာဇဂဟကဿ နေဂမဿ ဧတဒဟောသိ – ‘‘အယံ ခေါ သေဋ္ဌိ ဂဟပတိ ဗဟူပကာရော ရညော စေဝ နေဂမဿ စ. အပိ စ၊ ဝေဇ္ဇေဟိ ပစ္စက္ခာတော. ဧကစ္စေ ဝေဇ္ဇာ ဧဝမာဟံသု – ‘ပဉ္စမံ ဒိဝသံ သေဋ္ဌိ ဂဟပတိ ကာလံ ကရိဿတီ’တိ. ဧကစ္စေ ဝေဇ္ဇာ ဧဝမာဟံသု – ‘သတ္တမံ ဒိဝသံ သေဋ္ဌိ ဂဟပတိ ကာလံ ကရိဿတီ’တိ. အယဉ္စ ရညော ဇီဝကော ဝေဇ္ဇော တရုဏော ဘဒြကော. ယံနူန မယံ ရာဇာနံ ဇီဝကံ ဝေဇ္ဇံ ယာစေယျာမ သေဋ္ဌိံ ဂဟပတိံ တိကိစ္ဆိတု’’န္တိ. အထ ခေါ ရာဇဂဟကော နေဂမော ယေန ရာဇာ မာဂဓော သေနိယော ဗိမ္ဗိသာရော တေနုပသင်္ကမိ၊ ဥပသင်္ကမိတွာ ရာဇာနံ မာဂဓံ သေနိယံ ဗိမ္ဗိသာရံ ဧတဒဝေါစ – ‘‘အယံ၊ ဒေဝ၊ သေဋ္ဌိ ဂဟပတိ ဗဟူပကာရော ဒေဝဿ စေဝ နေဂမဿ စ၊ အပိ စ၊ ဝေဇ္ဇေဟိ ပစ္စက္ခာတော. ဧကစ္စေ ဝေဇ္ဇာ ဧဝမာဟံသု – ပဉ္စမံ ဒိဝသံ သေဋ္ဌိ ဂဟပတိ ကာလံ ကရိဿတီတိ. ဧကစ္စေ ဝေဇ္ဇာ ဧဝမာဟံသု – သတ္တမံ ဒိဝသံ သေဋ္ဌိ ဂဟပတိ ကာလံ ကရိဿတီတိ. သာဓု ဒေဝေါ ဇီဝကံ ဝေဇ္ဇံ အာဏာပေတု သေဋ္ဌိံ ဂဟပတိံ တိကိစ္ဆိတု’’န္တိ.

အထ ခေါ ရာဇာ မာဂဓော သေနိယော ဗိမ္ဗိသာရော ဇီဝကံ ကောမာရဘစ္စံ အာဏာပေသိ – ‘‘ဂစ္ဆ၊ ဘဏေ ဇီဝက၊ သေဋ္ဌိံ ဂဟပတိံ တိကိစ္ဆာဟီ’’တိ. ‘‘ဧဝံ၊ ဒေဝါ’’တိ ခေါ ဇီဝကော ကောမာရဘစ္စော ရညော မာဂဓဿ သေနိယဿ ဗိမ္ဗိသာရဿ ပဋိဿုတွာ ယေန သေဋ္ဌိ ဂဟပတိ တေနုပသင်္ကမိ၊ ဥပသင်္ကမိတွာ သေဋ္ဌိဿ ဂဟပတိဿ ဝိကာရံ သလ္လက္ခေတွာ သေဋ္ဌိံ ဂဟပတိံ ဧတဒဝေါစ – ‘‘သစေ တွံ၊ ဂဟပတိ၊ အရောဂေါ ဘဝေယျာသိ [သစာဟံ တံ ဂဟပတိ အရောဂါပေယျံ (သီ.)၊ သစာဟံ တံ ဂဟပတိ အရောဂံ ကရေယျံ (သျာ.)] ကိံ မေ အဿ ဒေယျဓမ္မော’’တိ? ‘‘သဗ္ဗံ သာပတေယျဉ္စ တေ၊ အာစရိယ၊ ဟောတု၊ အဟဉ္စ တေ ဒါသော’’တိ. ‘‘သက္ခိဿသိ ပန တွံ၊ ဂဟပတိ၊ ဧကေန ပဿေန သတ္တမာသေ နိပဇ္ဇိတု’’န္တိ? ‘‘သက္ကောမဟံ၊ အာစရိယ၊ ဧကေန ပဿေန သတ္တမာသေ နိပဇ္ဇိတု’’န္တိ. ‘‘သက္ခိဿသိ ပန တွံ၊ ဂဟပတိ၊ ဒုတိယေန ပဿေန သတ္တမာသေ နိပဇ္ဇိတု’’န္တိ? ‘‘သက္ကောမဟံ၊ အာစရိယ၊ ဒုတိယေန ပဿေန သတ္တမာသေ နိပဇ္ဇိတု’’န္တိ. ‘‘သက္ခိဿသိ ပန တွံ၊ ဂဟပတိ၊ ဥတ္တာနော သတ္တမာသေ နိပဇ္ဇိတု’’န္တိ? ‘‘သက္ကောမဟံ၊ အာစရိယ၊ ဥတ္တာနော သတ္တမာသေ နိပဇ္ဇိတု’’န္တိ.

အထ ခေါ ဇီဝကော ကောမာရဘစ္စော သေဋ္ဌိံ ဂဟပတိံ မဉ္စကေ နိပါတေတွာ [နိပဇ္ဇာပေတွာ (သီ. သျာ.)] မဉ္စကေ [မဉ္စကေန (သီ.)] သမ္ဗန္ဓိတွာ သီသစ္ဆဝိံ ဥပ္ပါဋေတွာ [ဖာလေတွာ (သီ.)] သိဗ္ဗိနိံ ဝိနာမေတွာ ဒွေ ပါဏကေ နီဟရိတွာ မဟာဇနဿ ဒဿေသိ – ‘‘ပဿထယျေ [ပဿေသျာထ (သီ.)၊ ပဿထ (သျာ.)၊ ပဿထယျော (က.)]၊ ဣမေ ဒွေ ပါဏကေ၊ ဧကံ ခုဒ္ဒကံ ဧကံ မဟလ္လကံ. ယေ တေ အာစရိယာ ဧဝမာဟံသု – ပဉ္စမံ ဒိဝသံ သေဋ္ဌိ ဂဟပတိ ကာလံ ကရိဿတီတိ – တေဟာယံ မဟလ္လကော ပါဏကော ဒိဋ္ဌော. ပဉ္စမံ ဒိဝသံ သေဋ္ဌိဿ ဂဟပတိဿ မတ္ထလုင်္ဂံ ပရိယာဒိယိဿတိ. မတ္ထလုင်္ဂဿ ပရိယာဒါနာ သေဋ္ဌိ ဂဟပတိ ကာလံ ကရိဿတိ. သုဒိဋ္ဌော တေဟိ အာစရိယေဟိ. ယေ တေ အာစရိယာ ဧဝမာဟံသု – သတ္တမံ ဒိဝသံ သေဋ္ဌိ ဂဟပတိ ကာလံ ကရိဿတီတိ – တေဟာယံ ခုဒ္ဒကော ပါဏကော ဒိဋ္ဌော. သတ္တမံ ဒိဝသံ သေဋ္ဌိဿ ဂဟပတိဿ မတ္ထလုင်္ဂံ ပရိယာဒိယိဿတိ. မတ္ထလုင်္ဂဿ ပရိယာဒါနာ သေဋ္ဌိ ဂဟပတိ ကာလံ ကရိဿတိ. သုဒိဋ္ဌော တေဟိ အာစရိယေဟီ’’တိ. သိဗ္ဗိနိံ သမ္ပဋိပါဋေတွာ သီသစ္ဆဝိံ သိဗ္ဗိတွာ အာလေပံ အဒါသိ. အထ ခေါ သေဋ္ဌိ ဂဟပတိ သတ္တာဟဿ အစ္စယေန ဇီဝကံ ကောမာရဘစ္စံ ဧတဒဝေါစ – ‘‘နာဟံ၊ အာစရိယ၊ သက္ကောမိ ဧကေန ပဿေန သတ္တမာသေ နိပဇ္ဇိတု’’န္တိ. ‘‘နနု မေ တွံ၊ ဂဟပတိ၊ ပဋိဿုဏိ – သက္ကောမဟံ၊ အာစရိယ၊ ဧကေန ပဿေန သတ္တမာသေ နိပဇ္ဇိတု’’န္တိ? ‘‘သစ္စာဟံ၊ အာစရိယ၊ ပဋိဿုဏိံ၊ အပါဟံ မရိဿာမိ၊ နာဟံ သက္ကောမိ ဧကေန ပဿေန သတ္တမာသေ နိပဇ္ဇိတု’’န္တိ. ‘‘တေန ဟိ တွံ၊ ဂဟပတိ၊ ဒုတိယေန ပဿေန သတ္တမာသေ နိပဇ္ဇာဟီ’’တိ. အထ ခေါ သေဋ္ဌိ ဂဟပတိ သတ္တာဟဿ အစ္စယေန ဇီဝကံ ကောမာရဘစ္စံ ဧတဒဝေါစ – ‘‘နာဟံ၊ အာစရိယ၊ သက္ကောမိ ဒုတိယေန ပဿေန သတ္တမာသေ နိပဇ္ဇိတု’’န္တိ. ‘‘နနု မေ တွံ၊ ဂဟပတိ၊ ပဋိဿုဏိ – သက္ကောမဟံ၊ အာစရိယ၊ ဒုတိယေန ပဿေန သတ္တမာသေ နိပဇ္ဇိတု’’န္တိ? ‘‘သစ္စာဟံ၊ အာစရိယ၊ ပဋိဿုဏိံ၊ အပါဟံ မရိဿာမိ၊ နာဟံ၊ အာစရိယ၊ သက္ကောမိ ဒုတိယေန ပဿေန သတ္တမာသေ နိပဇ္ဇိတု’’န္တိ. ‘‘တေန ဟိ တွံ၊ ဂဟပတိ၊ ဥတ္တာနော သတ္တမာသေ နိပဇ္ဇာဟီ’’တိ. အထ ခေါ သေဋ္ဌိ ဂဟပတိ သတ္တာဟဿ အစ္စယေန ဇီဝကံ ကောမာရဘစ္စံ ဧတဒဝေါစ – ‘‘နာဟံ၊ အာစရိယ၊ သက္ကောမိ ဥတ္တာနော သတ္တမာသေ နိပဇ္ဇိတု’’န္တိ. ‘‘နနု မေ တွံ၊ ဂဟပတိ၊ ပဋိဿုဏိ – သက္ကောမဟံ၊ အာစရိယ၊ ဥတ္တာနော သတ္တမာသေ နိပဇ္ဇိတု’’န္တိ? ‘‘သစ္စာဟံ၊ အာစရိယ၊ ပဋိဿုဏိံ၊ အပါဟံ မရိဿာမိ၊ နာဟံ သက္ကောမိ ဥတ္တာနော သတ္တမာသေ နိပဇ္ဇိတု’’န္တိ. ‘‘အဟံ စေ တံ၊ ဂဟပတိ၊ န ဝဒေယျံ၊ ဧတ္တကမ္ပိ တွံ န နိပဇ္ဇေယျာသိ၊ အပိ စ ပဋိကစ္စေဝ မယာ ဉာတော – တီဟိ သတ္တာဟေဟိ သေဋ္ဌိ ဂဟပတိ အရောဂေါ ဘဝိဿတီတိ. ဥဋ္ဌေဟိ၊ ဂဟပတိ၊ အရောဂေါသိ. ဇာနာသိ ကိံ မေ ဒေယျဓမ္မော’’တိ? ‘‘သဗ္ဗံ သာပတေယျဉ္စ တေ၊ အာစရိယ၊ ဟောတု၊ အဟဉ္စ တေ ဒါသော’’တိ. ‘‘အလံ၊ ဂဟပတိ၊ မာ မေ တွံ သဗ္ဗံ သာပတေယျံ အဒါသိ၊ မာ စ မေ ဒါသော. ရညော သတသဟဿံ ဒေဟိ၊ မယှံ သတသဟဿ’’န္တိ. အထ ခေါ သေဋ္ဌိ ဂဟပတိ အရောဂေါ သမာနော ရညော သတသဟဿံ အဒါသိ၊ ဇီဝကဿ ကောမာရဘစ္စဿ သတသဟဿံ.

ရာဇဂဟသေဋ္ဌိဝတ္ထု နိဋ္ဌိတံ.