၁၉၉. ဖာသုဝိဟာရပဉ္စကံ

၃၂၄. ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ ပစ္စေဿ’’န္တိ. တဿ ဗဟိသီမဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ ပစ္စေဿ’’န္တိ. သော ဗဟိသီမဂတော တံ စီဝရံ ကာရေတိ. သော ကတစီဝရော – ‘‘ပစ္စေဿံ ပစ္စေဿ’’န္တိ ဗဟိဒ္ဓါ ကထိနုဒ္ဓါရံ ဝီတိနာမေတိ. တဿ ဘိက္ခုနော သီမာတိက္ကန္တိကော ကထိနုဒ္ဓါရော.

ဘိက္ခု အတ္ထတကထိနော ဖာသုဝိဟာရိကော စီဝရံ အာဒါယ ပက္ကမတိ – ‘‘အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ အမုကံ နာမ အာဝါသံ ဂမိဿာမိ၊ တတ္ထ မေ ဖာသု ဘဝိဿတိ ဝသိဿာမိ၊ နော စေ မေ ဖာသု ဘဝိဿတိ၊ ပစ္စေဿ’’န္တိ. သော ဗဟိသီမဂတော တံ စီဝရံ ကာရေတိ. သော ကတစီဝရော ‘‘ပစ္စေဿံ ပစ္စေဿ’’န္တိ သမ္ဘုဏာတိ ကထိနုဒ္ဓါရံ. တဿ ဘိက္ခုနော သဟ ဘိက္ခူဟိ ကထိနုဒ္ဓါရော.

ဖာသုဝိဟာရပဉ္စကံ နိဋ္ဌိတံ.