၂၀၀. ပလိဗောဓာပလိဗောဓကထာ

၃၂၅. ဒွေမေ၊ ဘိက္ခဝေ၊ ကထိနဿ ပလိဗောဓာ၊ ဒွေ အပလိဗောဓာ. ကတမေ စ၊ ဘိက္ခဝေ၊ ဒွေ ကထိနဿ ပလိဗောဓာ? အာဝါသပလိဗောဓော စ စီဝရပလိဗောဓော စ. ကထဉ္စ၊ ဘိက္ခဝေ၊ အာဝါသပလိဗောဓော ဟောတိ? ဣဓ၊ ဘိက္ခဝေ၊ ဘိက္ခု ဝသတိ ဝါ တသ္မိံ အာဝါသေ၊ သာပေက္ခော ဝါ ပက္ကမတိ ‘‘ပစ္စေဿ’’န္တိ. ဧဝံ ခေါ၊ ဘိက္ခဝေ၊ အာဝါသပလိဗောဓော ဟောတိ. ကထဉ္စ၊ ဘိက္ခဝေ၊ စီဝရပလိဗောဓော ဟောတိ? ဣဓ၊ ဘိက္ခဝေ၊ ဘိက္ခုနော စီဝရံ အကတံ ဝါ ဟောတိ ဝိပ္ပကတံ ဝါ၊ စီဝရာသာ ဝါ အနုပစ္ဆိန္နာ. ဧဝံ ခေါ၊ ဘိက္ခဝေ၊ စီဝရပလိဗောဓော ဟောတိ. ဣမေ ခေါ၊ ဘိက္ခဝေ၊ ဒွေ ကထိနဿ ပလိဗောဓာ.

ကတမေ စ၊ ဘိက္ခဝေ၊ ဒွေ ကထိနဿ အပလိဗောဓာ? အာဝါသအပလိဗောဓော စ စီဝရအပလိဗောဓော စ. ကထဉ္စ၊ ဘိက္ခဝေ၊ အာဝါသအပလိဗောဓော ဟောတိ? ဣဓ၊ ဘိက္ခဝေ၊ ဘိက္ခု ပက္ကမတိ တမှာ အာဝါသာ စတ္တေန ဝန္တေန မုတ္တေန အနပေက္ခော [အနပေက္ခေန (က.)] ‘‘န ပစ္စေဿ’’န္တိ. ဧဝံ ခေါ၊ ဘိက္ခဝေ၊ အာဝါသအပလိဗောဓော ဟောတိ. ကထဉ္စ၊ ဘိက္ခဝေ၊ စီဝရအပလိဗောဓော ဟောတိ? ဣဓ၊ ဘိက္ခဝေ၊ ဘိက္ခုနော စီဝရံ ကတံ ဝါ ဟောတိ၊ နဋ္ဌံ ဝါ ဝိနဋ္ဌံ ဝါ ဒဍ္ဎံ ဝါ၊ စီဝရာသာ ဝါ ဥပစ္ဆိန္နာ. ဧဝံ ခေါ၊ ဘိက္ခဝေ၊ စီဝရအပလိဗောဓော ဟောတိ. ဣမေ ခေါ၊ ဘိက္ခဝေ၊ ဒွေ ကထိနဿ အပလိဗောဓာတိ.

ပလိဗောဓာပလိဗောဓကထာ နိဋ္ဌိတာ.

ကထိနက္ခန္ဓကော နိဋ္ဌိတော သတ္တမော.