၁၉၈. အပဝိလာယနနဝကံ

၃၂၁. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော [အပဝိနယမာနော (သီ.)၊ အပစိနယမာနော (က.)]. တမေနံ ဒိသင်္ဂတံ ဘိက္ခူ ပုစ္ဆန္တိ – ‘‘ကဟံ တွံ၊ အာဝုသော၊ ဝဿံဝုဋ္ဌော၊ ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝါသေ ဝဿံဝုဋ္ဌောမှိ. တတ္ထ စ မေ စီဝရပဋိဝီသော’’တိ. တေ ဧဝံ ဝဒန္တိ – ‘‘ဂစ္ဆာဝုသော၊ တံ စီဝရံ အာဟရ၊ မယံ တေ ဣဓ စီဝရံ ကရိဿာမာ’’တိ. သော တံ အာဝါသံ ဂန္တွာ ဘိက္ခူ ပုစ္ဆတိ – ‘‘ကဟံ မေ၊ အာဝုသော၊ စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ၊ အာဝုသော၊ စီဝရပဋိဝီသော၊ ကဟံ ဂမိဿသီ’’တိ? သော ဧဝံ ဝဒေတိ – ‘‘အမုကံ နာမ [အမုကဉ္စ (က.)] အာဝါသံ ဂမိဿာမိ၊ တတ္ထ မေ ဘိက္ခူ စီဝရံ ကရိဿန္တီ’’တိ. တေ ဧဝံ ဝဒန္တိ – ‘‘အလံ၊ အာဝုသော၊ မာ အဂမာသိ. မယံ တေ ဣဓ စီဝရံ ကရိဿာမာ’’တိ. တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော ဒိသံဂမိကော ပက္ကမတိ။ပေ။ ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော ဒိသံဂမိကော ပက္ကမတိ။ပေ။ ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ တံ စီဝရံ ကယိရမာနံ နဿတိ. တဿ ဘိက္ခုနော နာသနန္တိကော ကထိနုဒ္ဓါရော.

၃၂၂. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော. တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တွံ၊ အာဝုသော၊ ဝဿံဝုဋ္ဌော၊ ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝါသေ ဝဿံဝုဋ္ဌောမှိ၊ တတ္ထ စ မေ စီဝရပဋိဝီသော’’တိ. တေ ဧဝံ ဝဒန္တိ – ‘‘ဂစ္ဆာဝုသော၊ တံ စီဝရံ အာဟရ၊ မယံ တေ ဣဓ စီဝရံ ကရိဿာမာ’’တိ. သော တံ အာဝါသံ ဂန္တွာ ဘိက္ခူ ပုစ္ဆတိ – ‘‘ကဟံ မေ၊ အာဝုသော၊ စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ၊ အာဝုသော၊ စီဝရပဋိဝီသော’’တိ. သော တံ စီဝရံ အာဒါယ တံ အာဝါသံ ဂစ္ဆတိ. တမေနံ အန္တရာမဂ္ဂေ ဘိက္ခူ ပုစ္ဆန္တိ – ‘‘အာဝုသော၊ ကဟံ ဂမိဿသီ’’တိ? သော ဧဝံ ဝဒေတိ – ‘‘အမုကံ နာမ အာဝါသံ ဂမိဿာမိ၊ တတ္ထ မေ ဘိက္ခူ စီဝရံ ကရိဿန္တီ’’တိ. တေ ဧဝံ ဝဒန္တိ – ‘‘အလံ၊ အာဝုသော၊ မာ အဂမာသိ၊ မယံ တေ ဣဓ စီဝရံ ကရိဿာမာ’’တိ. တဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော. တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တွံ၊ အာဝုသော၊ ဝဿံဝုဋ္ဌော၊ ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝါသေ ဝဿံဝုဋ္ဌောမှိ၊ တတ္ထ စ မေ စီဝရပဋိဝီသော’’တိ. တေ ဧဝံ ဝဒန္တိ – ‘‘ဂစ္ဆာဝုသော၊ တံ စီဝရံ အာဟရ၊ မယံ တေ ဣဓ စီဝရံ ကရိဿာမာ’’တိ. သော တံ အာဝါသံ ဂန္တွာ ဘိက္ခူ ပုစ္ဆတိ – ‘‘ကဟံ မေ၊ အာဝုသော၊ စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ၊ အာဝုသော၊ စီဝရပဋိဝီသော’’တိ. သော တံ စီဝရံ အာဒါယ တံ အာဝါသံ ဂစ္ဆတိ. တမေနံ အန္တရာမဂ္ဂေ ဘိက္ခူ ပုစ္ဆန္တိ – ‘‘အာဝုသော၊ ကဟံ ဂမိဿသီ’’တိ? သော ဧဝံ ဝဒေတိ – ‘‘အမုကံ နာမ အာဝါသံ ဂမိဿာမိ၊ တတ္ထ မေ ဘိက္ခူ စီဝရံ ကရိဿန္တီ’’တိ. တေ ဧဝံ ဝဒန္တိ – ‘‘အလံ၊ အာဝုသော၊ မာ အဂမာသိ၊ မယံ တေ ဣဓ စီဝရံ ကရိဿာမာ’’တိ. တဿ ဧဝံ ဟောတိ – ‘‘နေဝိမံ စီဝရံ ကာရေဿံ၊ န ပစ္စေဿ’’န္တိ. တဿ ဘိက္ခုနော သန္နိဋ္ဌာနန္တိကော ကထိနုဒ္ဓါရော.

၃၂၃. ဘိက္ခု အတ္ထတကထိနော ဒိသံဂမိကော ပက္ကမတိ စီဝရပဋိဝီသံ အပဝိလာယမာနော. တမေနံ ဒိသံဂတံ ဘိက္ခူ ပုစ္ဆန္တိ – ‘‘ကဟံ တွံ၊ အာဝုသော၊ ဝဿံဝုဋ္ဌော၊ ကတ္ထ စ တေ စီဝရပဋိဝီသော’’တိ? သော ဧဝံ ဝဒေတိ – ‘‘အမုကသ္မိံ အာဝါသေ ဝဿံဝုဋ္ဌောမှိ၊ တတ္ထ စ မေ စီဝရပဋိဝီသော’’တိ. တေ ဧဝံ ဝဒန္တိ – ‘‘ဂစ္ဆာဝုသော၊ တံ စီဝရံ အာဟရ၊ မယံ တေ ဣဓ စီဝရံ ကရိဿာမာ’’တိ. သော တံ အာဝါသံ ဂန္တွာ ဘိက္ခူ ပုစ္ဆတိ – ‘‘ကဟံ မေ၊ အာဝုသော၊ စီဝရပဋိဝီသော’’တိ? တေ ဧဝံ ဝဒန္တိ – ‘‘အယံ တေ၊ အာဝုသော၊ စီဝရပဋိဝီသော’’တိ. သော တံ စီဝရံ အာဒါယ တံ အာဝါသံ ဂစ္ဆတိ. တဿ တံ အာဝါသံ ဂတဿ ဧဝံ ဟောတိ – ‘‘ဣဓေဝိမံ စီဝရံ ကာရေဿံ၊ န ပစ္စေဿ’’န္တိ. သော တံ စီဝရံ ကာရေတိ. တဿ ဘိက္ခုနော နိဋ္ဌာနန္တိကော ကထိနုဒ္ဓါရော.

အပဝိလာယနနဝကံ နိဋ္ဌိတံ.