၁၂၆. အာပတ္တိအာဝိကရဏဝိဓိ

၂၂၀. တေန ခေါ ပန သမယေန အညတရော ဘိက္ခု ပဝါရယမာနော အာပတ္တိံ သရတိ. အထ ခေါ တဿ ဘိက္ခုနော ဧတဒဟောသိ – ‘‘ဘဂဝတာ ပညတ္တံ ‘န သာပတ္တိကေန ပဝါရေတဗ္ဗ’န္တိ. အဟဉ္စမှိ အာပတ္တိံ အာပန္နော. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ.

ဣဓ ပန၊ ဘိက္ခဝေ၊ ဘိက္ခု ပဝါရယမာနော အာပတ္တိံ သရတိ. တေန၊ ဘိက္ခဝေ၊ ဘိက္ခုနာ သာမန္တော ဘိက္ခု ဧဝမဿ ဝစနီယော – ‘‘အဟံ၊ အာဝုသော၊ ဣတ္ထန္နာမံ အာပတ္တိံ အာပန္နော. ဣတော ဝုဋ္ဌဟိတွာ တံ အာပတ္တိံ ပဋိကရိဿာမီ’’တိ ဝတွာ ပဝါရေတဗ္ဗံ၊ န တွေဝ တပ္ပစ္စယာ ပဝါရဏာယ အန္တရာယော ကာတဗ္ဗော.

ဣဓ ပန၊ ဘိက္ခဝေ၊ ဘိက္ခု ပဝါရယမာနော အာပတ္တိယာ ဝေမတိကော ဟောတိ. တေန၊ ဘိက္ခဝေ၊

ဘိက္ခုနာ သာမန္တော ဘိက္ခု ဧဝမဿ ဝစနီယော – ‘‘အဟံ၊ အာဝုသော၊ ဣတ္ထန္နာမာယ အာပတ္တိယာ ဝေမတိကော၊ ယဒါ နိဗ္ဗေမတိကော ဘဝိဿာမိ တဒါ တံ အာပတ္တိံ ပဋိကရိဿာမီ’’တိ ဝတွာ ပဝါရေတဗ္ဗံ၊ န တွေဝ တပ္ပစ္စယာ ပဝါရဏာယ အန္တရာယော ကာတဗ္ဗောတိ.

အာပတ္တိ အာဝိကရဏဝိဓိ နိဋ္ဌိတာ.