၈၇. ပါရိသုဒ္ဓိဒါနကထာ

၁၆၄. အထ ခေါ ဘဂဝါ ဘိက္ခူ အာမန္တေသိ – ‘‘သန္နိပတထ၊ ဘိက္ခဝေ၊ သံဃော ဥပေါသထံ ကရိဿတီ’’တိ. ဧဝံ ဝုတ္တေ အညတရော ဘိက္ခု ဘဂဝန္တံ ဧတဒဝေါစ – ‘‘အတ္ထိ၊ ဘန္တေ၊ ဘိက္ခု ဂိလာနော၊ သော အနာဂတော’’တိ. အနုဇာနာမိ၊ ဘိက္ခဝေ၊ ဂိလာနေန ဘိက္ခုနာ ပါရိသုဒ္ဓိံ ဒါတုံ. ဧဝဉ္စ ပန၊ ဘိက္ခဝေ၊ ဒါတဗ္ဗာ – တေန ဂိလာနေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘‘ပါရိသုဒ္ဓိံ ဒမ္မိ၊ ပါရိသုဒ္ဓိံ မေ ဟရ၊ ပါရိသုဒ္ဓိံ မေ အာရောစေဟီ’’တိ. ကာယေန ဝိညာပေတိ၊ ဝါစာယ ဝိညာပေတိ၊ ကာယေန ဝါစာယ ဝိညာပေတိ၊ ဒိန္နာ ဟောတိ ပါရိသုဒ္ဓိ. န ကာယေန ဝိညာပေတိ၊ န ဝါစာယ ဝိညာပေတိ၊ န ကာယေန ဝါစာယ ဝိညာပေတိ၊ န ဒိန္နာ ဟောတိ ပါရိသုဒ္ဓိ. ဧဝဉ္စေတံ လဘေထ၊ ဣစ္စေတံ ကုသလံ. နော စေ လဘေထ၊ သော၊ ဘိက္ခဝေ၊ ဂိလာနော ဘိက္ခု မဉ္စေန ဝါ ပီဌေန ဝါ သံဃမဇ္ဈေ အာနေတွာ ဥပေါသထော ကာတဗ္ဗော. သစေ၊ ဘိက္ခဝေ၊ ဂိလာနုပဋ္ဌာကာနံ ဘိက္ခူနံ ဧဝံ ဟောတိ – ‘‘သစေ ခေါ မယံ ဂိလာနံ ဌာနာ စာဝေဿာမ၊ အာဗာဓော ဝါ အဘိဝဍ္ဎိဿတိ ကာလံကိရိယာ ဝါ ဘဝိဿတီ’’တိ၊ န၊ ဘိက္ခဝေ၊ ဂိလာနော ဘိက္ခု ဌာနာ စာဝေတဗ္ဗော. သံဃေန တတ္ထ ဂန္တွာ ဥပေါသထော ကာတဗ္ဗော. န တွေဝ ဝဂ္ဂေန သံဃေန ဥပေါသထော ကာတဗ္ဗော. ကရေယျ စေ၊ အာပတ္တိ ဒုက္ကဋဿ.

ပါရိသုဒ္ဓိဟာရကော စေ၊ ဘိက္ခဝေ၊ ဒိန္နာယ ပါရိသုဒ္ဓိယာ တတ္ထေဝ ပက္ကမတိ၊ အညဿ ဒါတဗ္ဗာ ပါရိသုဒ္ဓိ. ပါရိသုဒ္ဓိဟာရကော စေ၊ ဘိက္ခဝေ၊ ဒိန္နာယ ပါရိသုဒ္ဓိယာ တတ္ထေဝ ဝိဗ္ဘမတိ၊။ပေ။ ကာလံ ကရောတိ – သာမဏေရော ပဋိဇာနာတိ – သိက္ခံ ပစ္စက္ခာတကော ပဋိဇာနာတိ – အန္တိမဝတ္ထုံ အဇ္ဈာပန္နကော ပဋိဇာနာတိ – ဥမ္မတ္တကော ပဋိဇာနာတိ – ခိတ္တစိတ္တော ပဋိဇာနာတိ – ဝေဒနာဋ္ဋော ပဋိဇာနာတိ – အာပတ္တိယာ အဒဿနေ ဥက္ခိတ္တကော ပဋိဇာနာတိ – အာပတ္တိယာ အပ္ပဋိကမ္မေ ဥက္ခိတ္တကော ပဋိဇာနာတိ – ပါပိကာယ ဒိဋ္ဌိယာ အပ္ပဋိနိဿဂ္ဂေ ဥက္ခိတ္တကော ပဋိဇာနာတိ – ပဏ္ဍကော ပဋိဇာနာတိ – ထေယျသံဝါသကော ပဋိဇာနာတိ – တိတ္ထိယပက္ကန္တကော ပဋိဇာနာတိ – တိရစ္ဆာနဂတော ပဋိဇာနာတိ – မာတုဃာတကော ပဋိဇာနာတိ – ပိတုဃာတကော ပဋိဇာနာတိ – အရဟန္တဃာတကော ပဋိဇာနာတိ – ဘိက္ခုနိဒူသကော ပဋိဇာနာတိ – သံဃဘေဒကော ပဋိဇာနာတိ – လောဟိတုပ္ပါဒကော ပဋိဇာနာတိ – ဥဘတောဗျဉ္ဇနကော ပဋိဇာနာတိ၊ အညဿ ဒါတဗ္ဗာ ပါရိသုဒ္ဓိ.

ပါရိသုဒ္ဓိဟာရကော စေ၊ ဘိက္ခဝေ၊ ဒိန္နာယ ပါရိသုဒ္ဓိယာ အန္တရာမဂ္ဂေ ပက္ကမတိ၊ အနာဟဋာ ဟောတိ ပါရိသုဒ္ဓိ. ပါရိသုဒ္ဓိဟာရကော စေ၊ ဘိက္ခဝေ၊ ဒိန္နာယ ပါရိသုဒ္ဓိယာ အန္တရာမဂ္ဂေ ဝိဗ္ဘမတိ၊။ပေ။ ဥဘတောဗျဉ္ဇနကော ပဋိဇာနာတိ၊ အနာဟဋာ ဟောတိ ပါရိသုဒ္ဓိ.

ပါရိသုဒ္ဓိဟာရကော စေ၊ ဘိက္ခဝေ၊ ဒိန္နာယ ပါရိသုဒ္ဓိယာ သံဃပ္ပတ္တော ပက္ကမတိ၊ အာဟဋာ ဟောတိ ပါရိသုဒ္ဓိ. ပါရိသုဒ္ဓိဟာရကော စေ၊ ဘိက္ခဝေ၊ ဒိန္နာယ ပါရိသုဒ္ဓိယာ သံဃပ္ပတ္တော ဝိဗ္ဘမတိ၊။ပေ။ ဥဘတောဗျဉ္ဇနကော ပဋိဇာနာတိ၊ အာဟဋာ ဟောတိ ပါရိသုဒ္ဓိ.

ပါရိသုဒ္ဓိဟာရကော စေ၊ ဘိက္ခဝေ၊ ဒိန္နာယ ပါရိသုဒ္ဓိယာ သံဃပ္ပတ္တော သုတ္တော န အာရောစေတိ၊ ပမတ္တော န အာရောစေတိ၊ သမာပန္နော န အာရောစေတိ၊ အာဟဋာ ဟောတိ ပါရိသုဒ္ဓိ. ပါရိသုဒ္ဓိဟာရကဿ အနာပတ္တိ.

ပါရိသုဒ္ဓိဟာရကော စေ၊ ဘိက္ခဝေ၊ ဒိန္နာယ ပါရိသုဒ္ဓိယာ သံဃပ္ပတ္တော သဉ္စိစ္စ န အာရောစေတိ၊ အာဟဋာ ဟောတိ ပါရိသုဒ္ဓိ. ပါရိသုဒ္ဓိဟာရကဿ အာပတ္တိ ဒုက္ကဋဿာတိ.