၇၈. သံခိတ္တေန ပါတိမောက္ခုဒ္ဒေသာဒိ

၁၅၀. အထ ခေါ ဘိက္ခူနံ ဧတဒဟောသိ – ‘‘ကတိ နု ခေါ ပါတိမောက္ခုဒ္ဒေသာ’’တိ? ဘဂဝတော ဧတမတ္ထံ အာရောစေသုံ. ပဉ္စိမေ၊ ဘိက္ခဝေ၊ ပါတိမောက္ခုဒ္ဒေသာ – နိဒါနံ ဥဒ္ဒိသိတွာ အဝသေသံ သုတေန သာဝေတဗ္ဗံ. အယံ ပဌမော ပါတိမောက္ခုဒ္ဒေသော. နိဒါနံ ဥဒ္ဒိသိတွာ စတ္တာရိ ပါရာဇိကာနိ ဥဒ္ဒိသိတွာ အဝသေသံ သုတေန သာဝေတဗ္ဗံ. အယံ ဒုတိယော ပါတိမောက္ခုဒ္ဒေသော. နိဒါနံ ဥဒ္ဒိသိတွာ စတ္တာရိ ပါရာဇိကာနိ ဥဒ္ဒိသိတွာ တေရသ သံဃာဒိသေသေ ဥဒ္ဒိသိတွာ အဝသေသံ သုတေန သာဝေတဗ္ဗံ. အယံ တတိယော ပါတိမောက္ခုဒ္ဒေသော. နိဒါနံ ဥဒ္ဒိသိတွာ စတ္တာရိ ပါရာဇိကာနိ ဥဒ္ဒိသိတွာ တေရသ သံဃာဒိသေသေ ဥဒ္ဒိသိတွာ ဒွေ အနိယတေ ဥဒ္ဒိသိတွာ အဝသေသံ သုတေန သာဝေတဗ္ဗံ. အယံ စတုတ္ထော ပါတိမောက္ခုဒ္ဒေသော. ဝိတ္ထာရေနေဝ ပဉ္စမော. ဣမေ ခေါ၊ ဘိက္ခဝေ၊ ပဉ္စ ပါတိမောက္ခုဒ္ဒေသာတိ.

တေန ခေါ ပန သမယေန ဘိက္ခူ – ဘဂဝတာ သံခိတ္တေန ပါတိမောက္ခုဒ္ဒေသော အနုညာတောတိ – သဗ္ဗကာလံ သံခိတ္တေန ပါတိမောက္ခံ ဥဒ္ဒိသန္တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ သံခိတ္တေန ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ၊ အာပတ္တိ ဒုက္ကဋဿာတိ.

တေန ခေါ ပန သမယေန ကောသလေသု ဇနပဒေ အညတရသ္မိံ အာဝါသေ တဒဟုပေါသထေ သဝရဘယံ [သံစရဘယံ (သျာ.)] အဟောသိ. ဘိက္ခူ နာသက္ခိံသု ဝိတ္ထာရေန ပါတိမောက္ခံ ဥဒ္ဒိသိတုံ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ သတိ အန္တရာယေ သံခိတ္တေန ပါတိမောက္ခံ ဥဒ္ဒိသိတုန္တိ.

တေန ခေါ ပန သမယေန ဆဗ္ဗဂ္ဂိယာ ဘိက္ခူ အသတိပိ အန္တရာယေ သံခိတ္တေန ပါတိမောက္ခံ ဥဒ္ဒိသန္တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ အသတိ အန္တရာယေ သံခိတ္တေန ပါတိမောက္ခံ ဥဒ္ဒိသိတဗ္ဗံ. ယော ဥဒ္ဒိသေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ သတိ အန္တရာယေ သံခိတ္တေန ပါတိမောက္ခံ ဥဒ္ဒိသိတုံ. တတြိမေ အန္တရာယာ – ရာဇန္တရာယော၊ စောရန္တရာယော၊ အဂျန္တရာယော၊ ဥဒကန္တရာယော၊ မနုဿန္တရာယော၊ အမနုဿန္တရာယော၊ ဝါဠန္တရာယော၊ သရီသပန္တရာယော၊ ဇီဝိတန္တရာယော၊ ဗြဟ္မစရိယန္တရာယောတိ. အနုဇာနာမိ၊ ဘိက္ခဝေ၊ ဧဝရူပေသု အန္တရာယေသု သံခိတ္တေန ပါတိမောက္ခံ ဥဒ္ဒိသိတုံ၊ အသတိ အန္တရာယေ ဝိတ္ထာရေနာတိ.

တေန ခေါ ပန သမယေန ဆဗ္ဗဂ္ဂိယာ ဘိက္ခူ သံဃမဇ္ဈေ အနဇ္ဈိဋ္ဌာ ဓမ္မံ ဘာသန္တိ. ဘဂဝတော ဧတမတ္ထံ အာရောစေသုံ. န၊ ဘိက္ခဝေ၊ သံဃမဇ္ဈေ အနဇ္ဈိဋ္ဌေန ဓမ္မော ဘာသိတဗ္ဗော. ယော ဘာသေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ ထေရေန ဘိက္ခုနာ သာမံ ဝါ ဓမ္မံ ဘာသိတုံ ပရံ ဝါ အဇ္ဈေသိတုန္တိ.