၇၆. ဂါမသီမာဒိ

၁၄၇. အသမ္မတာယ၊ ဘိက္ခဝေ၊ သီမာယ အဋ္ဌပိတာယ၊ ယံ ဂါမံ ဝါ နိဂမံ ဝါ ဥပနိဿာယ ဝိဟရတိ၊ ယာ တဿ ဝါ ဂါမဿ ဂါမသီမာ၊ နိဂမဿ ဝါ နိဂမသီမာ၊ အယံ တတ္ထ သမာနသံဝါသာ ဧကုပေါသထာ. အဂါမကေ စေ၊ ဘိက္ခဝေ၊ အရညေ သမန္တာ သတ္တဗ္ဘန္တရာ၊ အယံ တတ္ထ သမာနသံဝါသာ ဧကုပေါသထာ. သဗ္ဗာ၊ ဘိက္ခဝေ၊ နဒီ အသီမာ၊ သဗ္ဗော သမုဒ္ဒေါ အသီမော၊ သဗ္ဗော ဇာတဿရော အသီမော. နဒိယာ ဝါ၊ ဘိက္ခဝေ၊ သမုဒ္ဒေ ဝါ ဇာတဿရေ ဝါ ယံ မဇ္ဈိမဿ ပုရိသဿ သမန္တာ ဥဒကုက္ခေပါ၊ အယံ တတ္ထ သမာနသံဝါသာ ဧကုပေါသထာတိ.

၁၄၈. တေန ခေါ ပန သမယေန ဆဗ္ဗဂ္ဂိယာ ဘိက္ခူ သီမာယ သီမံ သမ္ဘိန္ဒန္တိ. ဘဂဝတော ဧတမတ္ထံ အာရောစေသုံ. ယေသံ၊ ဘိက္ခဝေ၊ သီမာ ပဌမံ သမ္မတာ တေသံ တံ ကမ္မံ ဓမ္မိကံ အကုပ္ပံ ဌာနာရဟံ. ယေသံ၊ ဘိက္ခဝေ၊ သီမာ ပစ္ဆာ သမ္မတာ တေသံ တံ ကမ္မံ အဓမ္မိကံ ကုပ္ပံ အဋ္ဌာနာရဟံ. န၊ ဘိက္ခဝေ၊ သီမာယ သီမာ သမ္ဘိန္ဒိတဗ္ဗာ. ယော သမ္ဘိန္ဒေယျ၊ အာပတ္တိ ဒုက္ကဋဿာတိ.

တေန ခေါ ပန သမယေန ဆဗ္ဗဂ္ဂိယာ ဘိက္ခူ သီမာယ သီမံ အဇ္ဈောတ္ထရန္တိ. ဘဂဝတော ဧတမတ္ထံ အာရောစေသုံ. ယေသံ၊ ဘိက္ခဝေ၊ သီမာ ပဌမံ သမ္မတာ တေသံ တံ ကမ္မံ ဓမ္မိကံ အကုပ္ပံ ဌာနာရဟံ. ယေသံ၊ ဘိက္ခဝေ၊ သီမာ ပစ္ဆာ သမ္မတာ တေသံ တံ ကမ္မံ အဓမ္မိကံ ကုပ္ပံ အဋ္ဌာနာရဟံ. န၊ ဘိက္ခဝေ၊ သီမာယ သီမာ အဇ္ဈောတ္ထရိတဗ္ဗာ. ယော အဇ္ဈောတ္ထရေယျ၊ အာပတ္တိ ဒုက္ကဋဿာတိ. အနုဇာနာမိ၊ ဘိက္ခဝေ၊ သီမံ သမ္မန္နန္တေန သီမန္တရိကံ ဌပေတွာ သီမံ သမ္မန္နိတုန္တိ.