၁၀၁. လိင်္ဂါဒိဒဿနံ

၁၇၉. ဣဓ ပန၊ ဘိက္ခဝေ၊ အာဂန္တုကာ ဘိက္ခူ ပဿန္တိ အာဝါသိကာနံ ဘိက္ခူနံ အာဝါသိကာကာရံ၊ အာဝါသိကလိင်္ဂံ၊ အာဝါသိကနိမိတ္တံ၊ အာဝါသိကုဒ္ဒေသံ၊ သုပညတ္တံ မဉ္စပီဌံ၊ ဘိသိဗိဗ္ဗောဟနံ၊ ပါနီယံ ပရိဘောဇနီယံ သူပဋ္ဌိတံ၊ ပရိဝေဏံ သုသမ္မဋ္ဌံ၊ ပဿိတွာ ဝေမတိကာ ဟောန္တိ – ‘‘အတ္ထိ နု ခေါ အာဝါသိကာ ဘိက္ခူ နတ္ထိ နု ခေါ’’တိ. တေ ဝေမတိကာ န ဝိစိနန္တိ၊ အဝိစိနိတွာ ဥပေါသထံ ကရောန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ န ပဿန္တိ၊ အပဿိတွာ ဥပေါသထံ ကရောန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ဧကတော ဥပေါသထံ ကရောန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ပါဋေက္ကံ ဥပေါသထံ ကရောန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ – ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ – ဘေဒပုရေက္ခာရာ ဥပေါသထံ ကရောန္တိ. အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အာဂန္တုကာ ဘိက္ခူ သုဏန္တိ အာဝါသိကာနံ ဘိက္ခူနံ အာဝါသိကာကာရံ၊ အာဝါသိကလိင်္ဂံ၊ အာဝါသိကနိမိတ္တံ၊ အာဝါသိကုဒ္ဒေသံ၊ စင်္ကမန္တာနံ ပဒသဒ္ဒံ၊ သဇ္ဈာယသဒ္ဒံ၊ ဥက္ကာသိတသဒ္ဒံ၊ ခိပိတသဒ္ဒံ၊ သုတွာ ဝေမတိကာ ဟောန္တိ – ‘‘အတ္ထိ နု ခေါ အာဝါသိကာ ဘိက္ခူ နတ္ထိ နု ခေါ’’တိ. တေ ဝေမတိကာ န ဝိစိနန္တိ၊ အဝိစိနိတွာ ဥပေါသထံ ကရောန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ န ပဿန္တိ၊ အပဿိတွာ ဥပေါသထံ ကရောန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ဧကတော ဥပေါသထံ ကရောန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ပါဋေက္ကံ ဥပေါသထံ ကရောန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ – ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ – ဘေဒပုရေက္ခာရာ ဥပေါသထံ ကရောန္တိ. အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အာဝါသိကာ ဘိက္ခူ ပဿန္တိ အာဂန္တုကာနံ ဘိက္ခူနံ အာဂန္တုကာကာရံ၊ အာဂန္တုကလိင်္ဂံ၊ အာဂန္တုကနိမိတ္တံ၊ အာဂန္တုကုဒ္ဒေသံ၊ အညာတကံ ပတ္တံ၊ အညာတကံ စီဝရံ၊ အညာတကံ နိသီဒနံ၊ ပါဒါနံ ဓောတံ၊ ဥဒကနိဿေကံ၊ ပဿိတွာ ဝေမတိကာ ဟောန္တိ – ‘‘အတ္ထိ နု ခေါ အာဂန္တုကာ ဘိက္ခူ နတ္ထိ နု ခေါ’’တိ. တေ ဝေမတိကာ န ဝိစိနန္တိ၊ အဝိစိနိတွာ ဥပေါသထံ ကရောန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ န ပဿန္တိ၊ အပဿိတွာ ဥပေါသထံ ကရောန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ဧကတော ဥပေါသထံ ကရောန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ပါဋေက္ကံ ဥပေါသထံ ကရောန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ – ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ – ဘေဒပုရေက္ခာရာ ဥပေါသထံ ကရောန္တိ. အာပတ္တိ ထုလ္လစ္စယဿ.

ဣဓ ပန၊ ဘိက္ခဝေ၊ အာဝါသိကာ ဘိက္ခူ သုဏန္တိ အာဂန္တုကာနံ ဘိက္ခူနံ အာဂန္တုကာကာရံ၊ အာဂန္တုကလိင်္ဂံ၊ အာဂန္တုကနိမိတ္တံ၊ အာဂန္တုကုဒ္ဒေသံ၊ အာဂစ္ဆန္တာနံ ပဒသဒ္ဒံ၊ ဥပါဟနပပ္ဖေါဋနသဒ္ဒံ၊ ဥက္ကာသိတသဒ္ဒံ၊ ခိပိတသဒ္ဒံ၊ သုတွာ ဝေမတိကာ ဟောန္တိ – ‘‘အတ္ထိ နု ခေါ အာဂန္တုကာ ဘိက္ခူ နတ္ထိ နု ခေါ’’တိ. တေ ဝေမတိကာ န ဝိစိနန္တိ၊ အဝိစိနိတွာ ဥပေါသထံ ကရောန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ န ပဿန္တိ၊ အပဿိတွာ ဥပေါသထံ ကရောန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ဧကတော ဥပေါသထံ ကရောန္တိ. အနာပတ္တိ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ ပါဋေက္ကံ ဥပေါသထံ ကရောန္တိ. အာပတ္တိ ဒုက္ကဋဿ. တေ ဝေမတိကာ ဝိစိနန္တိ၊ ဝိစိနိတွာ ပဿန္တိ၊ ပဿိတွာ – ‘‘နဿန္တေတေ၊ ဝိနဿန္တေတေ၊ ကော တေဟိ အတ္ထော’’တိ – ဘေဒပုရေက္ခာရာ ဥပေါသထံ ကရောန္တိ. အာပတ္တိ ထုလ္လစ္စယဿ.

လိင်္ဂါဒိဒဿနံ နိဋ္ဌိတံ.