၆၁. ဒွေဥပသမ္ပဒါပေက္ခာဒိဝတ္ထု

၁၂၃. တေန ခေါ ပန သမယေန အာယသ္မတော မဟာကဿပဿ ဒွေ ဥပသမ္ပဒါပေက္ခာ ဟောန္တိ. တေ ဝိဝဒန္တိ – အဟံ ပဌမံ ဥပသမ္ပဇ္ဇိဿာမိ၊ အဟံ ပဌမံ ဥပသမ္ပဇ္ဇိဿာမီတိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဒွေ ဧကာနုဿာဝနေ ကာတုန္တိ.

တေန ခေါ ပန သမယေန သမ္ဗဟုလာနံ ထေရာနံ ဥပသမ္ပဒါပေက္ခာ ဟောန္တိ. တေ ဝိဝဒန္တိ – အဟံ ပဌမံ ဥပသမ္ပဇ္ဇိဿာမိ၊ အဟံ ပဌမံ ဥပသမ္ပဇ္ဇိဿာမီတိ. ထေရာ ဧဝမာဟံသု – ‘‘ဟန္ဒ၊ မယံ၊ အာဝုသော၊ သဗ္ဗေဝ ဧကာနုဿာဝနေ ကရောမာ’’တိ. ဘဂဝတော ဧတမတ္ထံ အာရောစေသုံ. အနုဇာနာမိ၊ ဘိက္ခဝေ၊ ဒွေ တယော ဧကာနုဿာဝနေ ကာတုံ၊ တဉ္စ ခေါ ဧကေန ဥပဇ္ဈာယေန၊ န တွေဝ နာနုပဇ္ဈာယေနာတိ.