၈. ဒွေဘိက္ခုဝါရဧကာဒသကံ

၁၈၁. ‘‘ဒွေ ဘိက္ခူ သံဃာဒိသေသံ အာပန္နာ ဟောန္တိ. တေ သံဃာဒိသေသေ သံဃာဒိသေသဒိဋ္ဌိနော ဟောန္တိ. ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ [ယထာပဋိစ္ဆန္နာနံ (သီ.)] စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

‘‘ဒွေ ဘိက္ခူ သံဃာဒိသေသံ အာပန္နာ ဟောန္တိ. တေ သံဃာဒိသေသေ ဝေမတိကာ ဟောန္တိ. ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

‘‘ဒွေ ဘိက္ခူ သံဃာဒိသေသံ အာပန္နာ ဟောန္တိ. တေ သံဃာဒိသေသေ မိဿကဒိဋ္ဌိနော ဟောန္တိ. ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

‘‘ဒွေ ဘိက္ခူ မိဿကံ အာပန္နာ ဟောန္တိ. တေ မိဿကေ သံဃာဒိသေသဒိဋ္ဌိနော ဟောန္တိ. ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

‘‘ဒွေ ဘိက္ခူ မိဿကံ အာပန္နာ ဟောန္တိ. တေ မိဿကေ မိဿကဒိဋ္ဌိနော ဟောန္တိ. ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

‘‘ဒွေ ဘိက္ခူ သုဒ္ဓကံ အာပန္နာ ဟောန္တိ. တေ သုဒ္ဓကေ သံဃာဒိသေသဒိဋ္ဌိနော ဟောန္တိ. ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ဥဘောပိ ယထာဓမ္မံ ကာရာပေတဗ္ဗာ.

‘‘ဒွေ ဘိက္ခူ သုဒ္ဓကံ အာပန္နာ ဟောန္တိ. တေ သုဒ္ဓကေ သုဒ္ဓကဒိဋ္ဌိနော ဟောန္တိ. ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ဥဘောပိ ယထာဓမ္မံ ကာရာပေတဗ္ဗာ.

‘‘ဒွေ ဘိက္ခူ သံဃာဒိသေသံ အာပန္နာ ဟောန္တိ. တေ သံဃာဒိသေသေ သံဃာဒိသေသဒိဋ္ဌိနော ဟောန္တိ. ဧကဿ ဟောတိ အာရောစေဿာမီတိ၊ ဧကဿ ဟောတိ န အာရောစေဿာမီတိ. သော ပဌမမ္ပိ ယာမံ ဆာဒေတိ၊ ဒုတိယမ္ပိ ယာမံ ဆာဒေတိ၊ တတိယမ္ပိ ယာမံ ဆာဒေတိ – ဥဋ္ဌိတေ အရုဏေ ဆန္နာ ဟောတိ အာပတ္တိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

‘‘ဒွေ ဘိက္ခူ သံဃာဒိသေသံ အာပန္နာ ဟောန္တိ. တေ သံဃာဒိသေသေ သံဃာဒိသေသဒိဋ္ဌိနော ဟောန္တိ. တေ ဂစ္ဆန္တိ အာရောစေဿာမာတိ. ဧကဿ အန္တရာမဂ္ဂေ မက္ခဓမ္မော ဥပ္ပဇ္ဇတိ န အာရောစေဿာမီတိ. သော ပဌမမ္ပိ ယာမံ ဆာဒေတိ၊ ဒုတိယမ္ပိ ယာမံ ဆာဒေတိ၊ တတိယမ္ပိ ယာမံ ဆာဒေတိ – ဥဋ္ဌိတေ အရုဏေ ဆန္နာ ဟောတိ အာပတ္တိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

‘‘ဒွေ ဘိက္ခူ သံဃာဒိသေသံ အာပန္နာ ဟောန္တိ. တေ သံဃာဒိသေသေ သံဃာဒိသေသဒိဋ္ဌိနော ဟောန္တိ. တေ ဥမ္မတ္တကာ ဟောန္တိ. တေ ပစ္ဆာ အနုမ္မတ္တကာ ဟုတွာ ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

‘‘ဒွေ ဘိက္ခူ သံဃာဒိသေသံ အာပန္နာ ဟောန္တိ. တေ ပါတိမောက္ခေ ဥဒ္ဒိဿမာနေ ဧဝံ ဝဒန္တိ – ‘ဣဒါနေဝ ခေါ မယံ ဇာနာမ – အယမ္ပိ ကိရ ဓမ္မော သုတ္တာဂတော သုတ္တပရိယာပန္နော အနွဒ္ဓမာသံ ဥဒ္ဒေသံ အာဂစ္ဆတီ’တိ. တေ သံဃာဒိသေသေ သံဃာဒိသေသဒိဋ္ဌိနော ဟောန္တိ. ဧကော ဆာဒေတိ၊ ဧကော နစ္ဆာဒေတိ. ယော ဆာဒေတိ သော ဒုက္ကဋံ ဒေသာပေတဗ္ဗော. ယထာပဋိစ္ဆန္နေ စဿ ပရိဝါသံ ဒတွာ ဥဘိန္နမ္ပိ မာနတ္တံ ဒါတဗ္ဗံ.

ဒွေဘိက္ခုဝါရဧကာဒသကံ နိဋ္ဌိတံ.