၉. မူလာယအဝိသုဒ္ဓိနဝကံ

၁၈၂. ‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယော အပ္ပဋိစ္ဆန္နာယော. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု အဝိသုဒ္ဓေါ တာဟိ အာပတ္တီဟိ.

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယော ပဋိစ္ဆန္နာယော. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု အဝိသုဒ္ဓေါ တာဟိ အာပတ္တီဟိ.

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယော ပဋိစ္ဆန္နာယောပိ အပ္ပဋိစ္ဆန္နာယောပိ. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု အဝိသုဒ္ဓေါ တာဟိ အာပတ္တီဟိ.

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ အပရိမာဏာယော အပ္ပဋိစ္ဆန္နာယော။ပေ။ အပရိမာဏာယော ပဋိစ္ဆန္နာယော။ပေ။ အပရိမာဏာယော ပဋိစ္ဆန္နာယောပိ အပ္ပဋိစ္ဆန္နာယောပိ ။ပေ။ ပရိမာဏာယောပိ အပရိမာဏာယောပိ အပ္ပဋိစ္ဆန္နာယော. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု အဝိသုဒ္ဓေါ တာဟိ အာပတ္တီဟိ.

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယော. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု အဝိသုဒ္ဓေါ တာဟိ အာပတ္တီဟိ.

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ၊ ဧကနာမမ္ပိ နာနာနာမမ္ပိ၊ သဘာဂမ္ပိ ဝိသဘာဂမ္ပိ၊ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ အဓမ္မေန မာနတ္တံ ဒေတိ၊ အဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု အဝိသုဒ္ဓေါ တာဟိ အာပတ္တီဟိ.

မူလာယအဝိသုဒ္ဓိနဝကံ [သမူလာဝိသုဒ္ဓိနဝကံ (က.)] နိဋ္ဌိတံ.