၂. ပရိဝါသော

အဂ္ဃသမောဓာနပရိဝါသော

၁၃၄. တေန ခေါ ပန သမယေန အညတရော ဘိက္ခု သမ္ဗဟုလာ သံဃာဒိသေသာ အာပတ္တိယော အာပန္နော ဟောတိ – ဧကာ အာပတ္တိ ဧကာဟပ္ပဋိစ္ဆန္နာ၊ ဧကာ အာပတ္တိ ဒွီဟပ္ပဋိစ္ဆန္နာ၊ ဧကာ အာပတ္တိ တီဟပ္ပဋိစ္ဆန္နာ၊ ဧကာ အာပတ္တိ စတူဟပ္ပဋိစ္ဆန္နာ၊ ဧကာ အာပတ္တိ ပဉ္စာဟပ္ပဋိစ္ဆန္နာ၊ ဧကာ အာပတ္တိ ဆာဟပ္ပဋိစ္ဆန္နာ၊ ဧကာ အာပတ္တိ သတ္တာဟပ္ပဋိစ္ဆန္နာ၊ ဧကာ အာပတ္တိ အဋ္ဌာဟပ္ပဋိစ္ဆန္နာ၊ ဧကာ အာပတ္တိ နဝါဟပ္ပဋိစ္ဆန္နာ၊ ဧကာ အာပတ္တိ ဒသာဟပ္ပဋိစ္ဆန္နာ. သော ဘိက္ခူနံ အာရောစေသိ – ‘‘အဟံ၊ အာဝုသော၊ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ – ဧကာ အာပတ္တိ ဧကာဟပ္ပဋိစ္ဆန္နာ။ပေ။ ဧကာ အာပတ္တိ ဒသာဟပ္ပဋိစ္ဆန္နာ. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ‘‘တေန ဟိ၊ ဘိက္ခဝေ၊ သံဃော တဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ဒေတု. ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သံဃံ ဥပသင်္ကမိတွာ။ပေ။ ဧဝမဿ ဝစနီယော – ‘အဟံ၊ ဘန္တေ၊ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ – ဧကာ အာပတ္တိ ဧကာဟပ္ပဋိစ္ဆန္နာ။ပေ။ ဧကာ အာပတ္တိ ဒသာဟပ္ပဋိစ္ဆန္နာ. သောဟံ၊ ဘန္တေ၊ သံဃံ တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစာမီ’တိ. ဒုတိယမ္ပိ ယာစိတဗ္ဗော. တတိယမ္ပိ ယာစိတဗ္ဗော. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၁၃၅. ‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ – ဧကာ အာပတ္တိ ဧကာဟပ္ပဋိစ္ဆန္နာ။ပေ။ ဧကာ အာပတ္တိ ဒသာဟပ္ပဋိစ္ဆန္နာ. သော သံဃံ တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ဒဒေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ – ဧကာ အာပတ္တိ ဧကာဟပ္ပဋိစ္ဆန္နာ။ပေ။ ဧကာ အာပတ္တိ ဒသာဟပ္ပဋိစ္ဆန္နာ. သော သံဃံ တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ယာစတိ. သံဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ၊ တဿာ အဂ္ဃေန သမောဓာနပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ။ပေ။.

‘‘ဒိန္နော သံဃေန ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိ ဒသာဟပ္ပဋိစ္ဆန္နာ တဿာ အဂ္ဃေန သမောဓာနပရိဝါသော. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

သဗ္ဗစိရပ္ပဋိစ္ဆန္နအဂ္ဃသမောဓာနံ

၁၃၆. တေန ခေါ ပန သမယေန အညတရော ဘိက္ခု သမ္ဗဟုလာ သံဃာဒိသေသာ အာပတ္တိယော အာပန္နော ဟောတိ – ဧကာ အာပတ္တိ ဧကာဟပ္ပဋိစ္ဆန္နာ၊ ဒွေ အာပတ္တိယော ဒွီဟပ္ပဋိစ္ဆန္နာယော [ဒွီဟပ္ပဋိစ္ဆန္နာ (က. ဧဝံ ယာဝဒသာဟပ္ပဋိစ္ဆန္နာ)]၊ တိဿော အာပတ္တိယော တီဟပ္ပဋိစ္ဆန္နာယော၊ စတဿော အာပတ္တိယော စတူဟပ္ပဋိစ္ဆန္နာယော၊ ပဉ္စ အာပတ္တိယော ပဉ္စာဟပ္ပဋိစ္ဆန္နာယော၊ ဆ အာပတ္တိယော ဆာဟပ္ပဋိစ္ဆန္နာယော၊ သတ္တ အာပတ္တိယော သတ္တာဟပ္ပဋိစ္ဆန္နာယော၊ အဋ္ဌ အာပတ္တိယော အဋ္ဌာဟပ္ပဋိစ္ဆန္နာယော၊ နဝ အာပတ္တိယော နဝါဟပ္ပဋိစ္ဆန္နာယော၊ ဒသ အာပတ္တိယော ဒသာဟပ္ပဋိစ္ဆန္နာယော. သော ဘိက္ခူနံ အာရောစေသိ – ‘‘အဟံ၊ အာဝုသော၊ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ၊ ဧကာ အာပတ္တိ ဧကာဟပ္ပဋိစ္ဆန္နာ။ပေ။ ဒသ အာပတ္တိယော ဒသာဟပ္ပဋိစ္ဆန္နာယော. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ‘‘တေန ဟိ၊ ဘိက္ခဝေ၊ သံဃော တဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒေတု. ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သံဃံ ဥပသင်္ကမိတွာ။ပေ။ ဧဝမဿ ဝစနီယော – ‘အဟံ၊ ဘန္တေ၊ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ၊ ဧကာ အာပတ္တိ ဧကာဟပ္ပဋိစ္ဆန္နာ။ပေ။ ဒသ အာပတ္တိယော ဒသာဟပ္ပဋိစ္ဆန္နာယော. သောဟံ၊ ဘန္တေ၊ သံဃံ တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစာမီ’တိ. ဒုတိယမ္ပိ ယာစိတဗ္ဗော. တတိယမ္ပိ ယာစိတဗ္ဗော. ‘‘ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၁၃၇. သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ၊ ဧကာ အာပတ္တိ ဧကာဟပ္ပဋိစ္ဆန္နာ။ပေ။ ဒသ အာပတ္တိယော ဒသာဟပ္ပဋိစ္ဆန္နာယော. သော သံဃံ တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစတိ. ယဒိ သံဃဿ ပတ္တကလ္လံ သံဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒဒေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ – ဧကာ အာပတ္တိ ဧကာဟပ္ပဋိစ္ဆန္နာ။ပေ။ ဒသ အာပတ္တိယော ဒသာဟပ္ပဋိစ္ဆန္နာယော. သော သံဃံ တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ယာစတိ. သံဃော ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ။ပေ။.

‘‘ဒိန္နော သံဃေန ဣတ္ထန္နာမဿ ဘိက္ခုနော တာသံ အာပတ္တီနံ ယာ အာပတ္တိယော သဗ္ဗစိရပ္ပဋိစ္ဆန္နာယော တာသံ အဂ္ဃေန သမောဓာနပရိဝါသော. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

ဒွေမာသပရိဝါသော

၁၃၈. တေန ခေါ ပန သမယေန အညတရော ဘိက္ခု ဒွေ သံဃာဒိသေသာ အာပတ္တိယော အာပန္နော ဟောတိ ဒွေမာသပ္ပဋိစ္ဆန္နာယော. တဿ ဧတဒဟောသိ – ‘‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’’န္တိ. သော သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိ. တဿ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ. သောဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’’န္တိ.

သော ဘိက္ခူနံ အာရောစေသိ – ‘‘အဟံ၊ အာဝုသော၊ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သောဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သောဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ – ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ‘‘တေန ဟိ၊ ဘိက္ခဝေ၊ သံဃော တဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတု. ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သံဃံ ဥပသင်္ကမိတွာ၊ ဧကံသံ ဥတ္တရာသင်္ဂံ ကရိတွာ၊ ဝုဍ္ဎာနံ ဘိက္ခူနံ ပါဒေ ဝန္ဒိတွာ၊ ဥက္ကုဋိကံ နိသီဒိတွာ၊ အဉ္ဇလိံ ပဂ္ဂဟေတွာ၊ ဧဝမဿ ဝစနီယော – ‘အဟံ၊ ဘန္တေ၊ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သောဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သောဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ – ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ. သောဟံ၊ ဘန္တေ၊ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစာမီတိ.

‘‘ဒုတိယမ္ပိ ယာစိတဗ္ဗော. တတိယမ္ပိ ယာစိတဗ္ဗော. ‘‘ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၁၃၉. ‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော. တဿ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သော သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိ. တဿ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သောဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ. သော သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒဒေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော. တဿ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သော သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိ. တဿ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သောဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ. သော သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. သံဃော ဣတ္ထန္နာမဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ။ပေ။.

‘‘ဒိန္နော သံဃေန ဣတ္ထန္နာမဿ ဘိက္ခုနော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသော. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ. တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ.

ဒွေ မာသာ ပရိဝသိတဗ္ဗဝိဓိ

၁၄၀. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော. တဿ ဧဝံ ဟောတိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သော သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. တဿ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. တဿ ပရိဝသန္တဿ လဇ္ဇီဓမ္မော ဩက္ကမိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သောဟံ သံဃံ ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော ဧကိဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျန္တိ. သော သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. တဿ သံဃော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ.

၁၄၁. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ အာပတ္တိံ ဇာနာတိ၊ ဧကံ အာပတ္တိံ န ဇာနာတိ. သော သံဃံ ယံ အာပတ္တိံ ဇာနာတိ တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. တဿ သံဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. သော ပရိဝသန္တော ဣတရမ္ပိ အာပတ္တိံ ဇာနာတိ. တဿ ဧဝံ ဟောတိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ အာပတ္တိံ ဇာနိံ၊ ဧကံ အာပတ္တိံ န ဇာနိံ. သောဟံ သံဃံ ယံ အာပတ္တိံ ဇာနိံ တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. သောဟံ ပရိဝသန္တော ဣတရမ္ပိ အာပတ္တိံ ဇာနာမိ. ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သော သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. တဿ သံဃော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ.

၁၄၂. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ အာပတ္တိံ သရတိ၊ ဧကံ အာပတ္တိံ နဿရတိ. သော သံဃံ ယံ အာပတ္တိံ သရတိ တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. တဿ သံဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. သော ပရိဝသန္တော ဣတရမ္ပိ အာပတ္တိံ သရတိ. တဿ ဧဝံ ဟောတိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ အာပတ္တိံ သရိံ၊ ဧကံ အာပတ္တိံ နဿရိံ. သောဟံ သံဃံ ယံ အာပတ္တိံ သရိံ၊ တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. သောဟံ ပရိဝသန္တော ဣတရမ္ပိ အာပတ္တိံ သရာမိ. ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သော သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. တဿ သံဃော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ.

၁၄၃. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကာယ အာပတ္တိယာ နိဗ္ဗေမတိကော၊ ဧကာယ အာပတ္တိယာ ဝေမတိကော. သော သံဃံ ယာယ အာပတ္တိယာ နိဗ္ဗေမတိကော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. တဿ သံဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. သော ပရိဝသန္တော ဣတရိဿာပိ အာပတ္တိယာ နိဗ္ဗေမတိကော ဟောတိ. တဿ ဧဝံ ဟောတိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကာယ အာပတ္တိယာ နိဗ္ဗေမတိကော၊ ဧကာယ အာပတ္တိယာ ဝေမတိကော. သောဟံ သံဃံ ယာယ အာပတ္တိယာ နိဗ္ဗေမတိကော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစိံ. တဿ မေ သံဃော တဿာ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ အဒါသိ. သောဟံ ပရိဝသန္တော ဣတရိဿာပိ အာပတ္တိယာ နိဗ္ဗေမတိကော. ယံနူနာဟံ သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစေယျ’န္တိ. သော သံဃံ ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ယာစတိ. တဿ သံဃော ဣတရိဿာပိ အာပတ္တိယာ ဒွေမာသပ္ပဋိစ္ဆန္နာယ ဒွေမာသပရိဝါသံ ဒေတိ. တေန၊ ဘိက္ခဝေ၊ ဘိက္ခုနာ တဒုပါဒါယ ဒွေ မာသာ ပရိဝသိတဗ္ဗာ.

၁၄၄. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကာ အာပတ္တိ ဇာနပ္ပဋိစ္ဆန္နာ၊ ဧကာ အာပတ္တိ အဇာနပ္ပဋိစ္ဆန္နာ. သော သံဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ. တဿ သံဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ. တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကာ အာပတ္တိ ဇာနပ္ပဋိစ္ဆန္နာ၊ ဧကာ အာပတ္တိ အဇာနပ္ပဋိစ္ဆန္နာ. သော သံဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ. တဿ သံဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ. တာယော အယံ၊ အာဝုသော၊ ဘိက္ခု အာပန္နော၊ တာသာယံ ဘိက္ခု ပရိဝသတီ’တိ. သော ဧဝံ ဝဒေတိ – ‘ယာယံ၊ အာဝုသော၊ အာပတ္တိ ဇာနပ္ပဋိစ္ဆန္နာ၊ ဓမ္မိကံ တဿာ အာပတ္တိယာ ပရိဝါသဒါနံ၊ ဓမ္မတ္တာ ရုဟတိ. ယာ စ ခွာယံ၊ အာဝုသော၊ အာပတ္တိ အဇာနပ္ပဋိစ္ဆန္နာ၊ အဓမ္မိကံ တဿာ အာပတ္တိယာ ပရိဝါသဒါနံ၊ အဓမ္မတ္တာ န ရုဟတိ. ဧကိဿာ၊ အာဝုသော၊ အာပတ္တိယာ ဘိက္ခု မာနတ္တာရဟော’’’တိ.

၁၄၅. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကာ အာပတ္တိ သရမာနပ္ပဋိစ္ဆန္နာ၊ ဧကာ အာပတ္တိ အဿရမာနပ္ပဋိစ္ဆန္နာ. သော သံဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ. တဿ သံဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ. တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. သော ဧဝံ ဝဒေတိ – ‘ကိ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကာ အာပတ္တိ သရမာနပ္ပဋိစ္ဆန္နာ၊ ဧကာ အာပတ္တိ အဿရမာနပ္ပဋိစ္ဆန္နာ. သော သံဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ. တဿ သံဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ. တာယော အယံ၊ အာဝုသော၊ ဘိက္ခု အာပန္နော၊ တာသာယံ ဘိက္ခု ပရိဝသတီ’တိ. သော ဧဝံ ဝဒေတိ – ‘ယာယံ၊ အာဝုသော၊ အာပတ္တိ သရမာနပ္ပဋိစ္ဆန္နာ ဓမ္မိကံ တဿာ အာပတ္တိယာ ပရိဝါသဒါနံ၊ ဓမ္မတ္တာ ရုဟတိ. ယာ စ ခွာယံ၊ အာဝုသော၊ အာပတ္တိ အဿရမာနပ္ပဋိစ္ဆန္နာ၊ အဓမ္မိကံ တဿာ အာပတ္တိယာ ပရိဝါသဒါနံ၊ အဓမ္မတ္တာ န ရုဟတိ. ဧကိဿာ၊ အာဝုသော၊ အာပတ္တိယာ ဘိက္ခု မာနတ္တာရဟော’’’တိ.

၁၄၆. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကာ အာပတ္တိ နိဗ္ဗေမတိကပ္ပဋိစ္ဆန္နာ၊ ဧကာ အာပတ္တိ ဝေမတိကပ္ပဋိစ္ဆန္နာ. သော သံဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ. တဿ သံဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ. တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကာ အာပတ္တိ နိဗ္ဗေမတိကပ္ပဋိစ္ဆန္နာ၊ ဧကာ အာပတ္တိ ဝေမတိကပ္ပဋိစ္ဆန္နာ. သော သံဃံ တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ. တဿ သံဃော တာသံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ. တာယော အယံ၊ အာဝုသော၊ ဘိက္ခု အာပန္နော၊ တာသာယံ ဘိက္ခု ပရိဝသတီ’တိ. သော ဧဝံ ဝဒေတိ – ‘ယာယံ၊ အာဝုသော၊ အာပတ္တိ နိဗ္ဗေမတိကပ္ပဋိစ္ဆန္နာ၊ ဓမ္မိကံ တဿာ အာပတ္တိယာ ပရိဝါသဒါနံ၊ ဓမ္မတ္တာ ရုဟတိ. ယာ စ ခွာယံ၊ အာဝုသော၊ အာပတ္တိ ဝေမတိကပ္ပဋိစ္ဆန္နာ အဓမ္မိကံ တဿာ အာပတ္တိယာ ပရိဝါသဒါနံ၊ အဓမ္မတ္တာ န ရုဟတိ. ဧကိဿာ၊ အာဝုသော၊ အာပတ္တိယာ ဘိက္ခု မာနတ္တာရဟော’’တိ.

၁၄၇. တေန ခေါ ပန သမယေန အညတ္တရော ဘိက္ခု ဒွေ သံဃာဒိသေသာ အာပတ္တိယော အာပန္နော ဟောတိ ဒွေမာသပ္ပဋိစ္ဆန္နာယော. တဿ ဧတဒဟောသိ – ‘‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ ပရိဝသန္တဿ လဇ္ဇီဓမ္မော ဩက္ကမိ – ‘‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ [ဣတရမ္ပိ မာသပရိဝါသံ (သျာ. က. ဧဝမုပရိပိ)] ယာစေယျ’’န္တိ.

သော ဘိက္ခူနံ အာရောစေသိ – ‘‘အဟံ ခေါ၊ အာဝုသော၊ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ‘‘တေန ဟိ၊ ဘိက္ခဝေ၊ သံဃော တဿ ဘိက္ခုနော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတု. ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သံဃံ ဥပသင်္ကမိတွာ။ပေ။ ဧဝမဿ ဝစနီယော – အဟံ၊ ဘန္တေ၊ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျန္တိ. သောဟံ၊ ဘန္တေ၊ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစာမီတိ. ဒုတိယမ္ပိ ယာစိတဗ္ဗော. တတိယမ္ပိ ယာစိတဗ္ဗော. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၁၄၈. ‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော. တဿ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျန္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဿ ဘိက္ခုနော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒဒေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော. တဿ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ. သံဃော ဣတ္ထန္နာမဿ ဘိက္ခုနော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသဿ [ဣတရမ္ပိ မာသပရိဝါသဿ (က.)၊ ဣတရဿပိ မာသပရိဝါသဿ (သျာ.)] ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ။ပေ။.

‘‘ဒိန္နော သံဃေန ဣတ္ထန္နာမဿ ဘိက္ခုနော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသော [ဣတရမ္ပိ မာသပရိဝါသော (က.)၊ ဣတရောပိ မာသပရိဝါသော (သျာ.)]. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

‘‘တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ.

၁၄၉. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော. တဿ ဧဝံ ဟောတိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ဒေတိ. တဿ ပရိဝသန္တဿ လဇ္ဇီဓမ္မော ဩက္ကမိ – အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. တဿ မေ ဧတဒဟောသိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစေယျ’န္တိ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဧကမာသပရိဝါသံ အဒါသိ. တဿ မေ ပရိဝသန္တဿ လဇ္ဇီဓမ္မော ဩက္ကမိ. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ. တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ.

၁၅၀. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ မာသံ ဇာနာတိ၊ ဧကံ မာသံ န ဇာနာတိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ ဇာနာတိ တံ မာသံ ပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ ဇာနာတိ တံ မာသံ ပရိဝါသံ ဒေတိ. သော ပရိဝသန္တော ဣတရမ္ပိ မာသံ ဇာနာတိ. တဿ ဧဝံ ဟောတိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ မာသံ ဇာနိံ၊ ဧကံ မာသံ န ဇာနိံ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ ဇာနိံ တံ မာသံ ပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ ဇာနိံ တံ မာသံ ပရိဝါသံ အဒါသိ. သောဟံ ပရိဝသန္တော ဣတရမ္ပိ မာသံ ဇာနာမိ. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ. တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ.

၁၅၁. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ မာသံ သရတိ၊ ဧကံ မာသံ နဿရတိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ သရတိ တံ မာသံ ပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ သရတိ တံ မာသံ ပရိဝါသံ ဒေတိ. သော ပရိဝသန္တော ဣတရမ္ပိ မာသံ သရတိ. တဿ ဧဝံ ဟောတိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ မာသံ သရိံ၊ ဧကံ မာသံ နဿရိံ. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ သရိံ တံ မာသံ ပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ သရိံ တံ မာသံ ပရိဝါသံ အဒါသိ. သောဟံ ပရိဝသန္တော ဣတရမ္ပိ မာသံ သရာမိ. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ. တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ.

၁၅၂. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကံ မာသံ နိဗ္ဗေမတိကော၊ ဧကံ မာသံ ဝေမတိကော. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ နိဗ္ဗေမတိကော တံ မာသံ ပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ နိဗ္ဗေမတိကော တံ မာသံ ပရိဝါသံ ဒေတိ. သော ပရိဝသန္တော ဣတရမ္ပိ မာသံ နိဗ္ဗေမတိကော ဟောတိ. တဿ ဧဝံ ဟောတိ – ‘အဟံ ခေါ ဒွေ သံဃာဒိသေသာ အာပတ္တိယော အာပဇ္ဇိံ ဒွေမာသပ္ပဋိစ္ဆန္နာယော၊ ဧကံ မာသံ နိဗ္ဗေမတိကော၊ ဧကံ မာသံ ဝေမတိကော. သောဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ယံ မာသံ နိဗ္ဗေမတိကော တံ မာသံ ပရိဝါသံ ယာစိံ. တဿ မေ သံဃော ဒွိန္နံ အာပတ္တီနံ ဒွေမာသပ္ပဋိစ္ဆာန္နာနံ ယံ မာသံ နိဗ္ဗေမတိကော တံ မာသံ ပရိဝါသံ အဒါသိ. သောဟံ ပရိဝသန္တော ဣတရမ္ပိ မာသံ နိဗ္ဗေမတိကော. ယံနူနာဟံ သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစေယျ’န္တိ. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဣတရမ္ပိ မာသံ ပရိဝါသံ ဒေတိ. တေန၊ ဘိက္ခဝေ၊ ဘိက္ခုနာ ပုရိမံ ဥပါဒါယ ဒွေ မာသာ ပရိဝသိတဗ္ဗာ.

၁၅၃. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကော မာသော ဇာနပ္ပဋိစ္ဆန္နော၊ ဧကော မာသော အဇာနပ္ပဋိစ္ဆန္နော. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ. တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော. ဧကော မာသော ဇာနပ္ပဋိစ္ဆန္နော၊ ဧကော မာသော အဇာနပ္ပဋိစ္ဆန္နော. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ. တာယော အယံ၊ အာဝုသော၊ ဘိက္ခု အာပန္နော တာသာယံ ဘိက္ခု ပရိဝသတီ’တိ. သော ဧဝံ ဝဒေတိ – ‘ယွာယံ၊ အာဝုသော၊ မာသော ဇာနပ္ပဋိစ္ဆန္နော ဓမ္မိကံ တဿ မာသဿ ပရိဝါသဒါနံ၊ ဓမ္မတ္တာ ရုဟတိ. ယော စ ခွာယံ၊ အာဝုသော၊ မာသော အဇာနပ္ပဋိစ္ဆန္နော အဓမ္မိကံ တဿ မာသဿ ပရိဝါသဒါနံ၊ အဓမ္မတ္တာ န ရုဟတိ. ဧကဿ၊ အာဝုသော၊ မာသဿ ဘိက္ခု မာနတ္တာရဟော’တိ.

၁၅၄. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကော မာသော သရမာနပ္ပဋိစ္ဆန္နော၊ ဧကော မာသော အဿရမာနပ္ပဋိစ္ဆန္နော. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ. တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကော မာသော သရမာနပ္ပဋိစ္ဆန္နော၊ ဧကော မာသော အဿရမာနပ္ပဋိစ္ဆန္နော. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ. တာယော အယံ၊ အာဝုသော၊ ဘိက္ခု အာပန္နော တာသာယံ ဘိက္ခု ပရိဝသတီ’တိ. သော ဧဝံ ဝဒေတိ – ‘ယွာယံ၊ အာဝုသော၊ မာသော သရမာနပ္ပဋိစ္ဆန္နော ဓမ္မိကံ တဿ မာသဿ ပရိဝါသဒါနံ၊ ဓမ္မတ္တာ ရုဟတိ. ယော စ ခွာယံ၊ အာဝုသော၊ မာသော အဿရမာနပ္ပဋိစ္ဆန္နော အဓမ္မိကံ တဿ မာသဿ ပရိဝါသဒါနံ၊ အဓမ္မတ္တာ န ရုဟတိ. ဧကဿ၊ အာဝုသော၊ မာသဿ ဘိက္ခု မာနတ္တာရဟော’တိ.

၁၅၅. ‘‘ဣဓ ပန၊ ဘိက္ခဝေ၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇတိ ဒွေမာသပ္ပဋိစ္ဆန္နာယော၊ ဧကော မာသော နိဗ္ဗေမတိကပ္ပဋိစ္ဆန္နော၊ ဧကော မာသော ဝေမတိကပ္ပဋိစ္ဆန္နော. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစတိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ဒေတိ. တဿ ပရိဝသန္တဿ အညော ဘိက္ခု အာဂစ္ဆတိ ဗဟုဿုတော အာဂတာဂမော ဓမ္မဓရော ဝိနယဓရော မာတိကာဓရော ပဏ္ဍိတော ဝိယတ္တော မေဓာဝီ လဇ္ဇီ ကုက္ကုစ္စကော သိက္ခာကာမော. သော ဧဝံ ဝဒေတိ – ‘ကိံ အယံ၊ အာဝုသော၊ ဘိက္ခု အာပန္နော? ကိဿာယံ ဘိက္ခု ပရိဝသတီ’တိ? တေ ဧဝံ ဝဒေန္တိ – ‘အယံ၊ အာဝုသော၊ ဘိက္ခု ဒွေ သံဃာဒိသေသာ အာပတ္တိယော အာပဇ္ဇိ ဒွေမာသပ္ပဋိစ္ဆန္နာယော၊ ဧကော မာသော နိဗ္ဗေမတိကပ္ပဋိစ္ဆန္နော၊ ဧကော မာသော ဝေမတိကပ္ပဋိစ္ဆန္နော. သော သံဃံ ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ ယာစိ. တဿ သံဃော ဒွိန္နံ အာပတ္တီနံ ဒွေမာသပ္ပဋိစ္ဆန္နာနံ ဒွေမာသပရိဝါသံ အဒါသိ. တာယော အယံ၊ အာဝုသော၊ ဘိက္ခု အာပန္နော တာသာယံ ဘိက္ခု ပရိဝသတီ’တိ. သော ဧဝံ ဝဒေတိ – ‘ယွာယံ၊ အာဝုသော၊ မာသော နိဗ္ဗေမတိကပ္ပဋိစ္ဆန္နော ဓမ္မိကံ တဿ မာသဿ ပရိဝါသဒါနံ၊ ဓမ္မတ္တာ ရုဟတိ. ယော စ ခွာယံ၊ အာဝုသော၊ မာသော ဝေမတိကပ္ပဋိစ္ဆန္နော အဓမ္မိကံ တဿ မာသဿ ပရိဝါသဒါနံ၊ အဓမ္မတ္တာ န ရုဟတိ. ဧကဿ၊ အာဝုသော၊ မာသဿ ဘိက္ခု မာနတ္တာရဟော’’တိ.

သုဒ္ဓန္တပရိဝါသော

၁၅၆. တေန ခေါ ပန သမယေန အညတရော ဘိက္ခု သမ္ဗဟုလာ သံဃာဒိသေသာ အာပတ္တိယော အာပန္နော ဟောတိ. သော အာပတ္တိပရိယန္တံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော. သော ဘိက္ခူနံ အာရောစေသိ – ‘‘အဟံ၊ အာဝုသော၊ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ၊ အာပတ္တိပရိယန္တံ န ဇာနာမိ၊ ရတ္တိပရိယန္တံ န ဇာနာမိ၊ အာပတ္တိပရိယန္တံ နဿရာမိ၊ ရတ္တိပရိယန္တံ နဿရာမိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ. ‘‘တေန ဟိ၊ ဘိက္ခဝေ၊ သံဃော တဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒေတု. ဧဝဉ္စ ပန၊ ဘိက္ခဝေ၊ ဒါတဗ္ဗော –

‘‘တေန၊ ဘိက္ခဝေ၊ ဘိက္ခုနာ သံဃံ ဥပသင်္ကမိတွာ။ပေ။ ဧဝမဿ ဝစနီယော – ‘အဟံ၊ ဘန္တေ၊ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ. အာပတ္တိပရိယန္တံ န ဇာနာမိ၊ ရတ္တိပရိယန္တံ န ဇာနာမိ၊ အာပတ္တိပရိယန္တံ နဿရာမိ၊ ရတ္တိပရိယန္တံ နဿရာမိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော. သောဟံ၊ ဘန္တေ၊ သံဃံ တာသံ အာပတ္တီနံ သုဒ္ဓန္တပရိဝါသံ ယာစာမီ’တိ. ဒုတိယမ္ပိ ယာစိတဗ္ဗော. တတိယမ္ပိ ယာစိတဗ္ဗော. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၁၅၇. ‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ. အာပတ္တိပရိယန္တံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော. သော သံဃံ တာသံ အာပတ္တီနံ သုဒ္ဓန္တပရိဝါသံ ယာစတိ. ယဒိ သံဃဿ ပတ္တကလ္လံ၊ သံဃော ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒဒေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ ဣတ္ထန္နာမော ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇိ. အာပတ္တိပရိယန္တံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော. သော သံဃံ တာသံ အာပတ္တီနံ သုဒ္ဓန္တပရိဝါသံ ယာစတိ. သံဃော ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသံ ဒေတိ. ယဿာယသ္မတော ခမတိ ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသဿ ဒါနံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ။ပေ။.

‘‘ဒိန္နော သံဃေန ဣတ္ထန္နာမဿ ဘိက္ခုနော တာသံ အာပတ္တီနံ သုဒ္ဓန္တပရိဝါသော. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

၁၅၈. ‘‘ဧဝံ ခေါ၊ ဘိက္ခဝေ၊ သုဒ္ဓန္တပရိဝါသော ဒါတဗ္ဗော၊ ဧဝံ ပရိဝါသော ဒါတဗ္ဗော. ကထဉ္စ၊ ဘိက္ခဝေ၊ သုဒ္ဓန္တပရိဝါသော ဒါတဗ္ဗော? အာပတ္တိပရိယန္တံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဝေမတိကော – သုဒ္ဓန္တပရိဝါသော ဒါတဗ္ဗော.

‘‘အာပတ္တိပရိယန္တံ ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ သရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ နိဗ္ဗေမတိကော၊ ရတ္တိပရိယန္တေ ဝေမတိကော – သုဒ္ဓန္တပရိဝါသော ဒါတဗ္ဗော.

‘‘အာပတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ ရတ္တိပရိယန္တံ န ဇာနာတိ၊ အာပတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ ရတ္တိပရိယန္တံ နဿရတိ၊ အာပတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော၊ ရတ္တိပရိယန္တေ ဝေမတိကော – သုဒ္ဓန္တပရိဝါသော ဒါတဗ္ဗော.

‘‘အာပတ္တိပရိယန္တံ န ဇာနာတိ၊ ရတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော – သုဒ္ဓန္တပရိဝါသော ဒါတဗ္ဗော.

‘‘အာပတ္တိပရိယန္တံ ဇာနာတိ၊ ရတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ အာပတ္တိပရိယန္တံ သရတိ၊ ရတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ အာပတ္တိပရိယန္တေ နိဗ္ဗေမတိကော၊ ရတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော – သုဒ္ဓန္တပရိဝါသော ဒါတဗ္ဗော.

‘‘အာပတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ ရတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ အာပတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ ရတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ အာပတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော၊ ရတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော – သုဒ္ဓန္တပရိဝါသော ဒါတဗ္ဗော. ဧဝံ ခေါ၊ ဘိက္ခဝေ၊ သုဒ္ဓန္တပရိဝါသော ဒါတဗ္ဗော.

၁၅၉. ‘‘ကထဉ္စ၊ ဘိက္ခဝေ၊ ပရိဝါသော ဒါတဗ္ဗော? အာပတ္တိပရိယန္တံ ဇာနာတိ၊ ရတ္တိပရိယန္တံ ဇာနာတိ၊ အာပတ္တိပရိယန္တံ သရတိ၊ ရတ္တိပရိယန္တံ သရတိ၊ အာပတ္တိပရိယန္တေ နိဗ္ဗေမတိကော၊ ရတ္တိပရိယန္တေ နိဗ္ဗေမတိကော – ပရိဝါသော ဒါတဗ္ဗော.

‘‘အာပတ္တိပရိယန္တံ န ဇာနာတိ၊ ရတ္တိပရိယန္တံ ဇာနာတိ၊ အာပတ္တိပရိယန္တံ နဿရတိ၊ ရတ္တိပရိယန္တံ သရတိ၊ အာပတ္တိပရိယန္တေ ဝေမတိကော၊ ရတ္တိပရိယန္တေ နိဗ္ဗေမတိကော – ပရိဝါသော ဒါတဗ္ဗော.

‘‘အာပတ္တိပရိယန္တံ ဧကစ္စံ ဇာနာတိ၊ ဧကစ္စံ န ဇာနာတိ၊ ရတ္တိပရိယန္တံ ဇာနာတိ၊ အာပတ္တိပရိယန္တံ ဧကစ္စံ သရတိ၊ ဧကစ္စံ နဿရတိ၊ ရတ္တိပရိယန္တံ သရတိ၊ အာပတ္တိပရိယန္တေ ဧကစ္စေ ဝေမတိကော၊ ဧကစ္စေ နိဗ္ဗေမတိကော၊ ရတ္တိပရိယန္တေ နိဗ္ဗေမတိကော – ပရိဝါသော ဒါတဗ္ဗော. ဧဝံ ခေါ၊ ဘိက္ခဝေ၊ ပရိဝါသော ဒါတဗ္ဗော.

ပရိဝါသော နိဋ္ဌိတော.