၃. စတ္တာလီသကံ

၁၆၀. တေန ခေါ ပန သမယေန အညတရော ဘိက္ခု ပရိဝသန္တော ဝိဗ္ဘမိ. သော ပုန ပစ္စာဂန္တွာ ဘိက္ခူ ဥပသမ္ပဒံ ယာစိ. ဘဂဝတော ဧတမတ္ထံ အာရောစေသုံ.

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော ဝိဗ္ဘမတိ. ဝိဗ္ဘန္တကဿ၊ ဘိက္ခဝေ၊ ပရိဝါသော န ရုဟတိ. သော စေ ပုန ဥပသမ္ပဇ္ဇတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော သာမဏေရော ဟောတိ. သာမဏေရဿ၊ ဘိက္ခဝေ၊ ပရိဝါသော န ရုဟတိ. သော စေ ပုန ဥပသမ္ပဇ္ဇတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော ဥမ္မတ္တကော ဟောတိ. ဥမ္မတ္တကဿ၊ ဘိက္ခဝေ၊ ပရိဝါသော န ရုဟတိ. သော စေ ပုန အနုမ္မတ္တကော ဟောတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော ခိတ္တစိတ္တော ဟောတိ. ခိတ္တစိတ္တဿ၊ ဘိက္ခဝေ၊ ပရိဝါသော န ရုဟတိ. သော စေ ပုန အခိတ္တစိတ္တော ဟောတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပုရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော ဝေဒနာဋ္ဋော ဟောတိ. ဝေဒနာဋ္ဋဿ၊ ဘိက္ခဝေ၊ ပရိဝါသော န ရုဟတိ. သော စေ ပုန အဝေဒနာဋ္ဋော ဟောတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော၊ အာပတ္တိယာ အဒဿနေ၊ ဥက္ခိပိယျတိ [ဥက္ခိပိယတိ (သျာ.)၊ ဥက္ခိပီယတိ (က.)]. ဥက္ခိတ္တကဿ၊ ဘိက္ခဝေ၊ ပရိဝါသော န ရုဟတိ. သော စေ ပုန ဩသာရိယျတိ [ဩသာရိယတိ (သျာ.)၊ ဩသာရီယတိ (က.)]၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော၊ အာပတ္တိယာ အပ္ပဋိကမ္မေ၊ ဥက္ခိပိယျတိ. ဥက္ခိတ္တကဿ၊ ဘိက္ခဝေ၊ ပရိဝါသော န ရုဟတိ. သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု ပရိဝသန္တော၊ ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ. ဥက္ခိတ္တကဿ၊ ဘိက္ခဝေ၊ ပရိဝါသော န ရုဟတိ. သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ အဝသေသော ပရိဝသိတဗ္ဗော.

၁၆၁. ‘‘ဣဓ ပန၊ ဘိက္ခဝေ၊ ဘိက္ခု မူလာယပဋိကဿနာရဟော ဝိဗ္ဘမတိ. ဝိဗ္ဘန္တကဿ၊ ဘိက္ခဝေ၊ မူလာယပဋိကဿနာ န ရုဟတိ. သော စေ ပုန ဥပသမ္ပဇ္ဇတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော. သော ဘိက္ခု မူလာယ ပဋိကဿိတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု မူလာယပဋိကဿနာရဟော သာမဏေရော ဟောတိ။ပေ။ ဥမ္မတ္တကော ဟောတိ။ပေ။ ခိတ္တစိတ္တော ဟောတိ။ပေ။ ဝေဒနာဋ္ဋော ဟောတိ။ပေ။ အာပတ္တိယာ အဒဿနေ ဥက္ခိပိယျတိ။ပေ။ အာပတ္တိယာ အပ္ပဋိကမ္မေ ဥက္ခိပိယျတိ။ပေ။ ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ. ဥက္ခိတ္တကဿ၊ ဘိက္ခဝေ၊ မူလာယပဋိကဿနာ န ရုဟတိ. သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော. သော ဘိက္ခု မူလာယ ပဋိကဿိတဗ္ဗော.

၁၆၂. ‘‘ဣဓ ပန၊ ဘိက္ခဝေ၊ ဘိက္ခု မာနတ္တာရဟော ဝိဗ္ဘမတိ. ဝိဗ္ဘန္တကဿ၊ ဘိက္ခဝေ၊ မာနတ္တဒါနံ န ရုဟတိ. သော စေ ပုန ဥပသမ္ပဇ္ဇတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော. တဿ ဘိက္ခုနော မာနတ္တံ ဒါတဗ္ဗံ.

‘‘ဣဓ ပန၊ ဘိက္ခဝေ၊ ဘိက္ခု မာနတ္တာရဟော သာမဏေရော ဟောတိ။ပေ။ ဥမ္မတ္တကော ဟောတိ။ပေ။ ခိတ္တစိတ္တော ဟောတိ။ပေ။ ဝေဒနာဋ္ဋော ဟောတိ။ပေ။ အာပတ္တိယာ အဒဿနေ၊ ဥက္ခိပိယျတိ။ပေ။ အာပတ္တိယာ အပ္ပဋိကမ္မေ၊ ဥက္ခိပိယျတိ။ပေ။ ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ. ဥက္ခိတ္တကဿ၊ ဘိက္ခဝေ၊ မာနတ္တဒါနံ န ရုဟတိ. သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော. တဿ ဘိက္ခုနော မာနတ္တံ ဒါတဗ္ဗံ.

၁၆၃. ‘‘ဣဓ ပန၊ ဘိက္ခဝေ၊ ဘိက္ခု မာနတ္တံ စရန္တော ဝိဗ္ဘမတိ. ဝိဗ္ဘန္တကဿ၊ ဘိက္ခဝေ၊ မာနတ္တစရိယာ န ရုဟတိ. သော စေ ပုန ဥပသမ္ပဇ္ဇတိ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ ယံ မာနတ္တံ ဒိန္နံ သုဒိန္နံ၊ ယံ မာနတ္တံ စိဏ္ဏံ သုစိဏ္ဏံ၊ အဝသေသံ စရိတဗ္ဗံ.

‘‘ဣဓ ပန၊ ဘိက္ခဝေ၊ ဘိက္ခု မာနတ္တံ စရန္တော သာမဏေရော ဟောတိ။ပေ။ ဥမ္မတ္တကော ဟောတိ။ပေ။ ခိတ္တစိတ္တော ဟောတိ။ပေ။ ဝေဒနာဋ္ဋော ဟောတိ။ပေ။ အာပတ္တိယာ အဒဿနေ၊ ဥက္ခိပိယျတိ။ပေ။ အာပတ္တိယာ အပ္ပဋိကမ္မေ၊ ဥက္ခိပိယျတိ။ပေ။ ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ. ဥက္ခိတ္တကဿ၊ ဘိက္ခဝေ၊ မာနတ္တစရိယာ န ရုဟတိ. သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပုရိဝုတ္ထော သုပရိဝုတ္ထော၊ ယံ မာနတ္တံ ဒိန္နံ သုဒိန္နံ၊ ယံ မာနတ္တံ စိဏ္ဏံ သုစိဏ္ဏံ၊ အဝသေသံ စရိတဗ္ဗံ.

၁၆၄. ‘‘ဣဓ ပန၊ ဘိက္ခဝေ၊ ဘိက္ခု အဗ္ဘာနာရဟော ဝိဗ္ဘမတိ. ဝိဗ္ဘန္တကဿ၊ ဘိက္ခဝေ၊ အဗ္ဘာနံ န ရုဟတိ. သော စေ ပုန ဥပသမ္ပဇ္ဇတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ ယံ မာနတ္တံ ဒိန္နံ သုဒိန္နံ၊ ယံ မာနတ္တံ စိဏ္ဏံ သုစိဏ္ဏံ. သော ဘိက္ခု အဗ္ဘေတဗ္ဗော.

‘‘ဣဓ ပန၊ ဘိက္ခဝေ၊ ဘိက္ခု အဗ္ဘာနာရဟော သာမဏေရော ဟောတိ။ပေ။ ဥမ္မတ္တကော ဟောတိ။ပေ။

ခိတ္တစိတ္တော ဟောတိ။ပေ။ ဝေဒနာဋ္ဋော ဟောတိ။ပေ။ အာပတ္တိယာ အဒဿနေ၊ ဥက္ခိပိယျတိ။ပေ။ အာပတ္တိယာ အပ္ပဋိကမ္မေ၊ ဥက္ခိပိယျတိ။ပေ။ ပါပိကာယ ဒိဋ္ဌိယာ၊ အပ္ပဋိနိဿဂ္ဂေ၊ ဥက္ခိပိယျတိ. ဥက္ခိတ္တကဿ၊ ဘိက္ခဝေ၊ အဗ္ဘာနံ န ရုဟတိ. သော စေ ပုန ဩသာရိယျတိ၊ တဿ တဒေဝ ပုရိမံ ပရိဝါသဒါနံ. ယော ပရိဝါသော ဒိန္နော သုဒိန္နော၊ ယော ပရိဝုတ္ထော သုပရိဝုတ္ထော၊ ယံ မာနတ္တံ ဒိန္နံ သုဒိန္နံ၊ ယံ မာနတ္တံ စိဏ္ဏံ သုစိဏ္ဏံ. သော ဘိက္ခု အဗ္ဘေတဗ္ဗော.

စတ္တာလီသကံ သမတ္တံ.