၁၁. တတိယနဝကံ

၁၈၄. ‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယော အပ္ပဋိစ္ဆန္နာယော. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ. သော ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယော အပ္ပဋိစ္ဆန္နာယော. သော တသ္မိံ ဘူမိယံ ဌိတော ပုရိမာအာပတ္တီနံ အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ. တဿ ဧဝံ ဟောတိ – ‘အဟံ ခေါ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သောဟံ သံဃံ တာသံ အာပတ္တီနံ သမောဓာနပရိဝါသံ ယာစိံ. တဿ မေ သံဃော တာသံ အာပတ္တီနံ သမောဓာနပရိဝါသံ အဒါသိ. သောဟံ ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာယော အပ္ပဋိစ္ဆန္နာယော. သောဟံ သံဃံ အန္တရာအာပတ္တီနံ မူလာယပဋိကဿနံ ယာစိံ. တံ မံ သံဃော အန္တရာအာပတ္တီနံ မူလာယ ပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ. သောဟံ ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာယော အပ္ပဋိစ္ဆန္နာယော. သောဟံ တသ္မိံ ဘူမိယံ ဌိတော ပုရိမာအာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ. ယံနူနာဟံ သံဃံ ပုရိမာအာပတ္တီနံ အန္တရာအာပတ္တီနဉ္စ အပရာအာပတ္တီနံ အန္တရာအာပတ္တီနဉ္စ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ. သော သံဃံ ပုရိမာအာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ. တံ သံဃော ပုရိမာအာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု ဝိသုဒ္ဓေါ တာဟိ အာပတ္တီဟိ [အယံ ပဌမဝါရော သီ သျာ. ပေါတ္ထကေသု ပရိပုဏ္ဏော ဒိဿတိ].

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယော. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ၊ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ. သော ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယော. သော တသ္မိံ ဘူမိယံ ဌိတော ပုရိမာအာပတ္တီနံ [ပုရိမာနံ အာပတ္တီနံ (က.)] အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ. တဿ ဧဝံ ဟောတိ – ‘အဟံ ခေါ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သောဟံ သံဃံ တာသံ အာပတ္တီနံ သမောဓာနပရိဝါသံ ယာစိံ. တဿ မေ သံဃော တာသံ အာပတ္တီနံ သမောဓာနပရိဝါသံ အဒါသိ. သောဟံ ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာ ပဋိစ္ဆန္နာယော. သောဟံ သံဃံ အန္တရာအာပတ္တီနံ မူလာယပဋိကဿနံ ယာစိံ. တံ မံ သံဃော အန္တရာအာပတ္တီနံ မူလာယပဋိကဿိ၊ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ. သောဟံ ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာ ပဋိစ္ဆန္နာယော. သောဟံ တသ္မိံ ဘူမိယံ ဌိတော ပုရိမာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ. ယံနူနာဟံ သံဃံ ပုရိမာပတ္တီနံ အန္တရာအာပတ္တီနဉ္စ၊ အပရာ အာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ. သော သံဃံ ပုရိမာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ မူလာယပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ. တံ သံဃော ပုရိမာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု ဝိသုဒ္ဓေါ တာဟိ အာပတ္တီဟိ.

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ. သော ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ. သော တသ္မိံ ဘူမိယံ ဌိတော ပုရိမာပတ္တီနံ အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ. တဿ ဧဝံ ဟောတိ – ‘အဟံ ခေါ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သောဟံ သံဃံ တာသံ အာပတ္တီနံ သမောဓာနပရိဝါသံ ယာစိံ. တဿ မေ သံဃော တာသံ အာပတ္တီနံ သမောဓာနပရိဝါသံ အဒါသိ. သောဟံ ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ. သောဟံ သံဃံ အန္တရာအာပတ္တီနံ မူလာယပဋိကဿနံ ယာစိံ. တံ မံ သံဃော အန္တရာအာပတ္တီနံ မူလာယ ပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ. သောဟံ ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာ ပဋိစ္ဆန္နာယောပိ အပ္ပဋိစ္ဆန္နာယောပိ. သောဟံ တသ္မိံ ဘူမိယံ ဌိတော ပုရိမာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ. ယံနူနာဟံ သံဃံ ပုရိမာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ. သော သံဃံ ပုရိမာပတ္တီနံ အန္တရာ အာပတ္တီနဉ္စ၊ အပရာ အာပတ္တီနံ အန္တရာ အာပတ္တီနဉ္စ၊ မူလာယပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ. တံ သံဃော ပုရိမာပတ္တီနံ အန္တရာ အာပတ္တီနဉ္စ၊ အပရာ အာပတ္တီနံ အန္တရာ အာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု ဝိသုဒ္ဓေါ တာဟိ အာပတ္တီဟိ.

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယော. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ. သော ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယော. သော တသ္မိံ ဘူမိယံ ဌိတော ပုရိမာ အာပတ္တီနံ အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ. တဿ ဧဝံ ဟောတိ – ‘အဟံ ခေါ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သောဟံ သံဃံ တာသံ အာပတ္တီနံ သမောဓာနပရိဝါသံ ယာစိံ. တဿ မေ သံဃော တာသံ အာပတ္တီနံ သမောဓာနပရိဝါသံ အဒါသိ. သောဟံ ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာယောပိ အပရိမာဏာယောပိ ပဋိစ္ဆန္နာယော. သောဟံ သံဃံ အန္တရာအာပတ္တီနံ မူလာယပဋိကဿနံ ယာစိံ. တံ မံ သံဃော အန္တရာအာပတ္တီနံ မူလာယပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ. သောဟံ ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာယောပိ အပရိမာဏာယောပိ ပဋိစ္ဆန္နာယော. သောဟံ တသ္မိံ ဘူမိယံ ဌိတော ပုရိမာ အာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ. ယံနူနာဟံ သံဃံ ပုရိမာ အာပတ္တီနံ အန္တရာ ပတ္တီနဉ္စ၊ အပရာအာပတ္တီန အန္တရာအာပတ္တီနဉ္စ၊ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ. သော သံဃံ ပုရိမာ အာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ. တံ သံဃော ပုရိမာ အာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု ဝိသုဒ္ဓေါ တာဟိ အာပတ္တီဟိ.

‘‘ဣဓ ပန၊ ဘိက္ခဝေ၊ ဘိက္ခု သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သော သံဃံ တာသံ အာပတ္တီနံ သမောဓာနပရိဝါသံ ယာစတိ. တဿ သံဃော တာသံ အာပတ္တီနံ သမောဓာနပရိဝါသံ ဒေတိ. သော ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ. သော သံဃံ အန္တရာအာပတ္တီနံ မူလာယပဋိကဿနံ ယာစတိ. တံ သံဃော အန္တရာအာပတ္တီနံ မူလာယ ပဋိကဿတိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ ဒေတိ. သော ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇတိ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ. သော တသ္မိံ ဘူမိယံ ဌိတော ပုရိမာ အာပတ္တီနံ အန္တရာအာပတ္တိယော သရတိ၊ အပရာအာပတ္တီနံ အန္တရာအာပတ္တိယော သရတိ. တဿ ဧဝံ ဟောတိ – ‘အဟံ ခေါ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏမ္ပိ အပရိမာဏမ္ပိ။ပေ။ ဝဝတ္ထိတမ္ပိ သမ္ဘိန္နမ္ပိ. သောဟံ သံဃံ တာသံ အာပတ္တီနံ သမောဓာနပရိဝါသံ ယာစိံ. တဿ မေ သံဃော တာသံ အာပတ္တီနံ သမောဓာနပရိဝါသံ အဒါသိ. သောဟံ ပရိဝသန္တော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ. သောဟံ သံဃံ အန္တရာအာပတ္တီနံ မူလာယပဋိကဿနံ ယာစိံ. တံ မံ သံဃော အန္တရာအာပတ္တီနံ မူလာယ ပဋိကဿိ အဓမ္မိကေန ကမ္မေန ကုပ္ပေန အဋ္ဌာနာရဟေန၊ အဓမ္မေန သမောဓာနပရိဝါသံ အဒါသိ. သောဟံ ပရိဝသာမီတိ မညမာနော အန္တရာ သမ္ဗဟုလာ သံဃာဒိသေသာ အာပတ္တိယော အာပဇ္ဇိံ ပရိမာဏာယောပိ အပရိမာဏာယောပိ ပဋိစ္ဆန္နာယောပိ အပ္ပဋိစ္ဆန္နာယောပိ. သောဟံ တသ္မိံ ဘူမိယံ ဌိတော ပုရိမာ အာပတ္တီနံ အန္တရာအာပတ္တိယော သရာမိ၊ အပရာအာပတ္တီနံ အန္တရာအာပတ္တိယော သရာမိ. ယံနူနာဟံ သံဃံ ပုရိမာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယပဋိကဿနံ ယာစေယျံ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာန’န္တိ. သော သံဃံ ပုရိမာ အာပတ္တီနံ အန္တရာအာပတ္တီနဉ္စ၊ အပရာအာပတ္တီနံ အန္တရာအာပတ္တီနဉ္စ၊ မူလာယ ပဋိကဿနံ ယာစတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ၊ ဓမ္မေန မာနတ္တံ၊ ဓမ္မေန အဗ္ဘာနံ. တံ သံဃော ပုရိမာ အာပတ္တီနံ အန္တရာ အာပတ္တီနဉ္စ၊ အပရာ အာပတ္တီနံ အန္တရာ အာပတ္တီနဉ္စ၊ မူလာယ ပဋိကဿတိ ဓမ္မိကေန ကမ္မေန အကုပ္ပေန ဌာနာရဟေန၊ ဓမ္မေန သမောဓာနပရိဝါသံ ဒေတိ၊ ဓမ္မေန မာနတ္တံ ဒေတိ၊ ဓမ္မေန အဗ္ဘေတိ. သော၊ ဘိက္ခဝေ၊ ဘိက္ခု ဝိသုဒ္ဓေါ တာဟိ အာပတ္တီဟိ’’.

တတိယနဝကံ နိဋ္ဌိတံ.

သမုစ္စယက္ခန္ဓကော တတိယော.

တဿုဒ္ဒါနံ –

အပ္ပဋိစ္ဆန္နာ ဧကာဟ-ဒွီဟ-တီဟ-စတူဟ စ၊

ပဉ္စာဟပက္ခဒသန္နံ၊ အာပတ္တိမာဟ မဟာမုနိ.

သုဒ္ဓန္တော စ ဝိဗ္ဘမန္တော၊ ပရိမာဏမုခံ ဒွေ ဘိက္ခူ၊

တတ္ထ သညိနော ဒွေ ယထာ၊ ဝေမတိကာ တထေဝ စ.

မိဿကဒိဋ္ဌိနော ဒွေ စ၊ အသုဒ္ဓကေကဒိဋ္ဌိနော၊

ဒွေ စေဝ သုဒ္ဓဒိဋ္ဌိနော.

တထေဝ စ ဧကော ဆာဒေတိ၊ အထ မက္ခမတေန စ၊

ဥမ္မတ္တကဒေသနဉ္စ၊ မူလာ အဋ္ဌာရသ [ပန္နရသ (က.)] ဝိသုဒ္ဓတော.

အာစရိယာနံ ဝိဘဇ္ဇပဒါနံ [ဝိဘဇ္ဇဝါဒီနံ (သီ.)]၊ တမ္ဗပဏ္ဏိဒီပပသာဒကာနံ၊

မဟာဝိဟာရဝါသီနံ၊ ဝါစနာ သဒ္ဓမ္မဋ္ဌိတိယာတိ.

သမုစ္စယက္ခန္ဓကံ နိဋ္ဌိတံ.