၄. မာနတ္တစာရိကဝတ္တံ

၉၀. တေန ခေါ ပန သမယေန မာနတ္တစာရိကာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရံ၊ သေယျာဘိဟာရံ၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ. ယေ တေ ဘိက္ခူ အပ္ပိစ္ဆာ။ပေ။ တေ ဥဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ မာနတ္တစာရိကာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မ’’န္တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ.

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ မာနတ္တစာရိကာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မ’’န္တိ? ‘‘သစ္စံ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ။ပေ။ ကထဉှိ နာမ၊ ဘိက္ခဝေ၊ မာနတ္တစာရိကာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ။ပေ။ နဟာနေ ပိဋ္ဌိပရိကမ္မံ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဝိဂရဟိတွာ။ပေ။ ဓမ္မိံ ကထံ ကတွာ ဘိက္ခူ အာမန္တေသိ –

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သာဒိတဗ္ဗံ ပကတတ္တာနံ ဘိက္ခူနံ အဘိဝါဒနံ၊ ပစ္စုဋ္ဌာနံ၊ အဉ္ဇလိကမ္မံ၊ သာမီစိကမ္မံ၊ အာသနာဘိဟာရော၊ သေယျာဘိဟာရော၊ ပါဒေါဒကံ ပါဒပီဌံ၊ ပါဒကထလိကံ၊ ပတ္တစီဝရပဋိဂ္ဂဟဏံ၊ နဟာနေ ပိဋ္ဌိပရိကမ္မံ. ယော သာဒိယေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ မာနတ္တစာရိကာနံ ဘိက္ခူနံ မိထု ယထာဝုဍ္ဎံ အဘိဝါဒနံ၊ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မံ. အနုဇာနာမိ၊ ဘိက္ခဝေ၊ မာနတ္တစာရိကာနံ ဘိက္ခူနံ ပဉ္စ ယထာဝုဍ္ဎံ – ဥပေါသထံ၊ ပဝါရဏံ၊ ဝဿိကသာဋိကံ၊ ဩဏောဇနံ၊ ဘတ္တံ. တေန ဟိ၊ ဘိက္ခဝေ၊ မာနတ္တစာရိကာနံ ဘိက္ခူနံ ဝတ္တံ ပညပေဿာမိ ယထာ မာနတ္တစာရိကေဟိ ဘိက္ခူဟိ ဝတ္တိတဗ္ဗံ.

၉၁. ‘‘မာနတ္တစာရိကေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ. တတြာယံ သမ္မာဝတ္တနာ –

န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ. ယာယ အာပတ္တိယာ သံဃေန မာနတ္တံ ဒိန္နံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ. န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗံ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ. ယော ဟောတိ သံဃဿ အာသနပရိယန္တော သေယျာပရိယန္တော ဝိဟာရပရိယန္တော သော တဿ ပဒါတဗ္ဗော. တေန စ သော သာဒိတဗ္ဗော.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ ပကတတ္တေန ဘိက္ခုနာ ပုရေသမဏေန ဝါ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော – မာ မံ ဇာနိံသူတိ.

‘‘မာနတ္တစာရိကေန၊ ဘိက္ခဝေ၊ ဘိက္ခုနာ အာဂန္တုကေန အာရောစေတဗ္ဗံ၊ အာဂန္တုကဿ အာရောစေတဗ္ဗံ၊ ဥပေါသထေ အာရောစေတဗ္ဗံ၊ ပဝါရဏာယ အာရောစေတဗ္ဗံ၊ ဒေဝသိကံ အာရောစေတဗ္ဗံ. သစေ ဂိလာနော ဟောတိ၊ ဒူတေနပိ အာရောစေတဗ္ဗံ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ သံဃေန၊ အညတြ အန္တရာယာ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ သံဃေန၊ အညတြ အန္တရာယာ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သံဃေန၊ အညတြ အန္တရာယာ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အနာဝါသာ အဘိက္ခုကော အာဝါသော ဂန္တဗ္ဗော။ပေ။ အဘိက္ခုကော အနာဝါသော ဂန္တဗ္ဗော။ပေ။ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သံဃေန၊ အညတြ အန္တရာယာ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ အဘိက္ခုကော အာဝါသော ဂန္တဗ္ဗော။ပေ။ အဘိက္ခုကော အနာဝါသော ဂန္တဗ္ဗော။ပေ။ အဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ အညတြ သံဃေန၊ အညတြ အန္တရာယာ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော ဂန္တဗ္ဗော။ပေ။ သဘိက္ခုကော အနာဝါသော ဂန္တဗ္ဗော။ပေ။ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ.

‘‘န ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော ဂန္တဗ္ဗော။ပေ။ သဘိက္ခုကော အနာဝါသော ဂန္တဗ္ဗော။ပေ။ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော ဂန္တဗ္ဗော။ပေ။ သဘိက္ခုကော အနာဝါသော ဂန္တဗ္ဗော။ပေ။ သဘိက္ခုကော အာဝါသော ဝါ အနာဝါသော ဝါ ဂန္တဗ္ဗော၊ ယတ္ထဿု ဘိက္ခူ နာနာသံဝါသကာ၊ အညတြ သံဃေန၊ အညတြ အန္တရာယာ.

‘‘ဂန္တဗ္ဗော၊ ဘိက္ခဝေ မာနတ္တစာရိကေန ဘိက္ခုနာ သဘိက္ခုကာ အာဝါသာ သဘိက္ခုကော အာဝါသော။ပေ။ သဘိက္ခုကော အနာဝါသော။ပေ။ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ.

‘‘ဂန္တဗ္ဗော၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အနာဝါသာ သဘိက္ခုကော အာဝါသော။ပေ။ သဘိက္ခုကော အနာဝါသော။ပေ။ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ.

‘‘ဂန္တဗ္ဗော၊ ဘိက္ခဝေ၊ မာနတ္တစာရိကေန ဘိက္ခုနာ သဘိက္ခုကာ အာဝါသာ ဝါ အနာဝါသာ ဝါ သဘိက္ခုကော အာဝါသော။ပေ။ သဘိက္ခုကော အနာဝါသော။ပေ။ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ. ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ. ပကတတ္တော ဘိက္ခု အာသနေန နိမန္တေတဗ္ဗော. န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ.

‘‘န၊ ဘိက္ခဝေ၊ မာနတ္တစာရိကေန ဘိက္ခုနာ ပါရိဝါသိကေန ဘိက္ခုနာ သဒ္ဓိံ။ပေ။ မူလာယပဋိကဿနာရဟေန ဘိက္ခုနာ သဒ္ဓိံ။ပေ။ မာနတ္တာရဟေန ဘိက္ခုနာ သဒ္ဓိံ။ပေ။ မာနတ္တစာရိကေန ဝုဍ္ဎတရေန ဘိက္ခုနာ သဒ္ဓိံ။ပေ။ အဗ္ဘာနာရဟေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ.

[မဟာဝ. ၃၉၃] ‘‘မာနတ္တစာရိကစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ၊ န စ ကရဏီယ’’န္တိ.

၉၂. အထ ခေါ အာယသ္မာ ဥပါလိ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ ဥပါလိ ဘဂဝန္တံ ဧတဒဝေါစ – ‘‘ကတိ နု ခေါ၊ ဘန္တေ၊ မာနတ္တစာရိကဿ ဘိက္ခုနော ရတ္တိစ္ဆေဒါ’’တိ? ‘‘စတ္တာရော ခေါ၊ ဥပါလိ၊ မာနတ္တစာရိကဿ ဘိက္ခုနော ရတ္တိစ္ဆေဒါ. သဟဝါသော၊ ဝိပ္ပဝါသော၊ အနာရောစနာ၊ ဦနေ ဂဏေ စရဏံ [စရဏန္တိ (က.)] – ဣမေ ခေါ၊ ဥပါလိ၊ စတ္တာရော မာနတ္တစာရိကဿ ဘိက္ခုနော ရတ္တိစ္ဆေဒါ’’တိ.

၉၃. တေန ခေါ ပန သမယေန သာဝတ္ထိယံ မဟာဘိက္ခုသံဃော သန္နိပတိတော ဟောတိ. န သက္ကောန္တိ မာနတ္တစာရိကာ ဘိက္ခူ မာနတ္တံ သောဓေတုံ. ဘဂဝတော ဧတမတ္ထံ အာရောစေသုံ. ‘‘အနုဇာနာမိ၊ ဘိက္ခဝေ၊ မာနတ္တံ နိက္ခိပိတုံ. ဧဝဉ္စ ပန၊ ဘိက္ခဝေ၊ နိက္ခိပိတဗ္ဗံ. တေန မာနတ္တစာရိကေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘မာနတ္တံ နိက္ခိပါမီ’တိ. နိက္ခိတ္တံ ဟောတိ မာနတ္တံ. ‘ဝတ္တံ နိက္ခိပါမီ’တိ. နိက္ခိတ္တံ ဟောတိ မာနတ္တ’’န္တိ.

၉၄. တေန ခေါ ပန သမယေန သာဝတ္ထိယာ ဘိက္ခူ တဟံ တဟံ ပက္ကမိံသု. သက္ကောန္တိ မာနတ္တစာရိကာ ဘိက္ခူ မာနတ္တံ သောဓေတုံ. ဘဂဝတော ဧတမတ္ထံ အာရောစေသုံ. ‘‘အနုဇာနာမိ၊ ဘိက္ခဝေ၊ မာနတ္တံ သမာဒိယိတုံ. ဧဝဉ္စ ပန၊ ဘိက္ခဝေ၊ သမာဒိယိတဗ္ဗံ. တေန မာနတ္တစာရိကေန ဘိက္ခုနာ ဧကံ ဘိက္ခုံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ၊ ဧဝမဿ ဝစနီယော – ‘မာနတ္တံ သမာဒိယာမီ’တိ. သမာဒိန္နံ ဟောတိ မာနတ္တံ. ‘ဝတ္တံ သမာဒိယာမီ’တိ. သမာဒိန္နံ ဟောတိ မာနတ္တ’’န္တိ.

မာနတ္တစာရိကဝတ္တံ နိဋ္ဌိတံ.