၅. အဗ္ဘာနာရဟဝတ္တံ

၉၅. တေန ခေါ ပန သမယေန အဗ္ဘာနာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မံ. ယေ တေ ဘိက္ခူ အပ္ပိစ္ဆာ။ပေ။ တေ ဥဇ္ဈာယန္တိ ခိယျန္တိ ဝိပါစေန္တိ – ‘‘ကထဉှိ နာမ အဗ္ဘာနာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မ’’န္တိ! အထ ခေါ တေ ဘိက္ခူ ဘဂဝတော ဧတမတ္ထံ အာရောစေသုံ.

အထ ခေါ ဘဂဝါ ဧတသ္မိံ နိဒါနေ ဧတသ္မိံ ပကရဏေ ဘိက္ခုသံဃံ သန္နိပါတာပေတွာ ဘိက္ခူ ပဋိပုစ္ဆိ – ‘‘သစ္စံ ကိရ၊ ဘိက္ခဝေ၊ အဗ္ဘာနာရဟာ ဘိက္ခူ သာဒိယန္တိ ပကတတ္တာနံ ဘိက္ခူနံ အဘိဝါဒနံ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မန္တိ? ‘‘သစ္စံ ဘဂဝါ’’တိ. ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ။ပေ။ ကထဉှိ နာမ၊ ဘိက္ခဝေ၊ အဗ္ဘာနာရဟာ ဘိက္ခူ သာဒိယိဿန္တိ ပကတတ္တာနံ ဘိက္ခူနံ အဘိဝါဒနံ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မံ! နေတံ၊ ဘိက္ခဝေ၊ အပ္ပသန္နာနံ ဝါ ပသာဒါယ။ပေ။ ဝိဂရဟိတွာ။ပေ။ ဓမ္မိံ ကထံ ကတွာ ဘိက္ခူ အာမန္တေသိ – ‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ သာဒိတဗ္ဗံ ပကတတ္တာနံ ဘိက္ခူနံ အဘိဝါဒနံ ပစ္စုပဋ္ဌာနံ။ပေ။ နဟာနေ ပိဋ္ဌိပရိကမ္မံ. ယော သာဒိယေယျ၊ အာပတ္တိ ဒုက္ကဋဿ. အနုဇာနာမိ၊ ဘိက္ခဝေ၊ အဗ္ဘာနာရဟာနံ ဘိက္ခူနံ မိထု ယထာဝုဍ္ဎံ အဘိဝါဒနံ ပစ္စုဋ္ဌာနံ။ပေ။ နဟာနေ ပိဋ္ဌိပရိကမ္မံ. အနုဇာနာမိ၊ ဘိက္ခဝေ၊ အဗ္ဘာနာရဟာနံ ဘိက္ခူနံ ပဉ္စ ယထာဝုဍ္ဎံ – ဥပေါသထံ၊ ပဝါရဏံ၊ ဝဿိကသာဋိကံ၊ ဩဏောဇနံ၊ ဘတ္တံ. တေန ဟိ၊ ဘိက္ခဝေ၊ အဗ္ဘာနာရဟာနံ ဘိက္ခူနံ ဝတ္တံ ပညာပေဿာမိ ယထာ အဗ္ဘာနာရဟေဟိ ဘိက္ခူဟိ ဝတ္တိတဗ္ဗံ.

၉၆. ‘‘အဗ္ဘာနာရဟေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ. တတြာယံ သမ္မာဝတ္တနာ –

န ဥပသမ္ပာဒေတဗ္ဗံ။ပေ။ (ယထာ ဟေဋ္ဌာ၊ တထာ ဝိတ္ထာရေတဗ္ဗံ၊) န ဘိက္ခူဟိ သမ္ပယောဇေတဗ္ဗံ.

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ ပကတတ္တဿ ဘိက္ခုနော ပုရတော ဂန္တဗ္ဗံ၊ န ပုရတော နိသီဒိတဗ္ဗံ. ယော ဟောတိ သံဃဿ အာသနပရိယန္တော သေယျာပရိယန္တော ဝိဟာရပရိယန္တော သော တဿ ပဒါတဗ္ဗော. တေန စ သော သာဒိတဗ္ဗော.

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ ပကတတ္တေန ဘိက္ခုနာ ပုရေသမဏေန ဝါ ပစ္ဆာသမဏေန ဝါ ကုလာနိ ဥပသင်္ကမိတဗ္ဗာနိ၊ န အာရညိကင်္ဂံ သမာဒါတဗ္ဗံ၊ န ပိဏ္ဍပါတိကင်္ဂံ သမာဒါတဗ္ဗံ၊ န စ တပ္ပစ္စယာ ပိဏ္ဍပါတော နီဟရာပေတဗ္ဗော – မာ မံ ဇာနိံသူတိ.

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ.

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ သဘိက္ခုကာ အာဝါသာ အဘိက္ခုကော အနာဝါသော ဂန္တဗ္ဗော၊ အညတြ ပကတတ္တေန၊ အညတြ အန္တရာယာ။ပေ။. (ယထာ ဟေဋ္ဌာ၊ တထာ ဝိတ္ထာရေတဗ္ဗာ.)

‘‘ဂန္တဗ္ဗော၊ ဘိက္ခဝေ၊ အဗ္ဘာနာရဟေန ဘိက္ခုနာ သဘိက္ခုကာ အာဝါသာ။ပေ။ အနာဝါသာ။ပေ။ အာဝါသာ ဝါ အနာဝါသာ ဝါ သဘိက္ခုကော အာဝါသော။ပေ။ သဘိက္ခုကော အနာဝါသော။ပေ။ သဘိက္ခုကော အာဝါသော ဝါ အနာဝါသော ဝါ၊ ယတ္ထဿု ဘိက္ခူ သမာနသံဝါသကာ၊ ယံ ဇညာ သက္ကောမိ အဇ္ဇေဝ ဂန္တုန္တိ.

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ ပကတတ္တေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ ပကတတ္တံ ဘိက္ခုံ ဒိသွာ အာသနာ ဝုဋ္ဌာတဗ္ဗံ၊ ပကတတ္တော ဘိက္ခု အာသနေန နိမန္တေတဗ္ဗော၊ န ပကတတ္တေန ဘိက္ခုနာ သဒ္ဓိံ ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ.

‘‘န၊ ဘိက္ခဝေ၊ အဗ္ဘာနာရဟေန ဘိက္ခုနာ ပါရိဝါသိကေန ဘိက္ခုနာ သဒ္ဓိံ။ပေ။ မူလာယပဋိကဿနာရဟေန ဘိက္ခုနာ သဒ္ဓိံ။ပေ။ မာနတ္တာရဟေန ဘိက္ခုနာ သဒ္ဓိံ။ပေ။ မာနတ္တစာရိကေန ဘိက္ခုနာ သဒ္ဓိံ။ပေ။ အဗ္ဘာနာရဟေန ဝုဍ္ဎတရေန ဘိက္ခုနာ သဒ္ဓိံ ဧကစ္ဆန္နေ အာဝါသေ ဝတ္ထဗ္ဗံ၊ န ဧကစ္ဆန္နေ အနာဝါသေ ဝတ္ထဗ္ဗံ၊ န ဧကစ္ဆန္နေ အာဝါသေ ဝါ အနာဝါသေ ဝါ ဝတ္ထဗ္ဗံ၊ န ဧကာသနေ နိသီဒိတဗ္ဗံ၊ န နီစေ အာသနေ နိသိန္နေ ဥစ္စေ အာသနေ နိသီဒိတဗ္ဗံ၊ န ဆမာယံ နိသိန္နေ အာသနေ နိသီဒိတဗ္ဗံ၊ န ဧကစင်္ကမေ စင်္ကမိတဗ္ဗံ၊ န နီစေ စင်္ကမေ စင်္ကမန္တေ ဥစ္စေ စင်္ကမေ စင်္ကမိတဗ္ဗံ၊ န ဆမာယံ စင်္ကမန္တေ စင်္ကမေ စင်္ကမိတဗ္ဗံ.

[မဟာဝ. ၃၉၃] ‘‘အဗ္ဘာနာရဟစတုတ္ထော စေ၊ ဘိက္ခဝေ၊ ပရိဝါသံ ဒဒေယျ၊ မူလာယ ပဋိကဿေယျ၊ မာနတ္တံ ဒဒေယျ၊ တံဝီသော အဗ္ဘေယျ၊ အကမ္မံ၊ န စ ကရဏီယ’’န္တိ.

အဗ္ဘာနာရဟဝတ္တံ နိဋ္ဌိတံ.

ပါရိဝါသိကက္ခန္ဓကော ဒုတိယော.

ဣမမှိ ခန္ဓကေ ဝတ္ထူ ပဉ္စ.

တဿုဒ္ဒါနံ –

ပါရိဝါသိကာ သာဒေန္တိ၊ ပကတတ္တာန ဘိက္ခုနံ၊

အဘိဝါဒနံ ပစ္စုဋ္ဌာနံ၊ အဉ္ဇလိဉ္စ သာမီစိယံ.

အာသနံ သေယျာဘိဟာရံ၊ ပါဒေါ ပီဌံ ကထလိကံ၊

ပတ္တံ နဟာနေ ပရိကမ္မံ၊ ဥဇ္ဈာယန္တိ စ ပေသလာ.

ဒုက္ကဋံ သာဒိယန္တဿ၊ မိထု ပဉ္စ ယထာဝုဍ္ဎံ [ပုနာပရေ (က.)]၊

ဥပေါသထံ ပဝါရဏံ၊ ဝဿိကောဏောဇဘောဇနံ.

သမ္မာ စ ဝတ္တနာ တတ္ထ၊ ပကတတ္တဿ ဂစ္ဆန္တံ၊

ယော စ ဟောတိ ပရိယန္တော၊ ပုရေ ပစ္ဆာ တထေဝ စ [န ပုရေ ပစ္ဆာသမဏေန (သီ. သျာ.)].

အာရညပိဏ္ဍနီဟာရော၊ အာဂန္တုကေ ဥပေါသထေ၊

ပဝါရဏာယ ဒူတေန၊ ဂန္တဗ္ဗော စ သဘိက္ခုကော.

ဧကစ္ဆန္နေ စ ဝုဋ္ဌာနံ၊ တထေဝ စ နိမန္တယေ၊

အာသနေ နီစေ စင်္ကမေ၊ ဆမာယံ စင်္ကမေန စ.

ဝုဍ္ဎတရေန အကမ္မံ၊ ရတ္တိစ္ဆေဒါ စ သောဓနာ၊

နိက္ခိပနံ သမာဒါနံ၊ ဝတ္တံဝ ပါရိဝါသိကေ [ရတ္တိ ဝါ ပါရိဝါသိကေ (က.)၊ ဉာတဗ္ဗံ ပါရိဝါသိကာ (သီ. သျာ.)].

မူလာယ မာနတ္တာရဟာ၊ တထာ မာနတ္တစာရိကာ၊

အဗ္ဘာနာရဟေ နယော စာပိ၊ သမ္ဘေဒံ နယတော [သမ္ဘေဒနယတော (သျာ.)] ပုန.

ပါရိဝါသိကေသု တယော၊ စတု မာနတ္တစာရိကေ၊

န သမေန္တိ ရတ္တိစ္ဆေဒေသု [ရတ္တိစ္ဆေဒေ (ဣတိပိ)၊ ရတ္တိစ္ဆေဒါ (သျာ.)]၊ မာနတ္တေသု စ ဒေဝသိ၊

ဒွေ ကမ္မာ သဒိသာ သေသာ၊ တယော ကမ္မာ သမာသမာတိ [သမာ မတာတိ (သီ.)].

ပါရိဝါသိကက္ခန္ဓကံ နိဋ္ဌိတံ.