၄. ပဋိသာရဏီယကမ္မံ

၃၃. တေန ခေါ ပန သမယေန အာယသ္မာ သုဓမ္မော မစ္ဆိကာသဏ္ဍေ စိတ္တဿ ဂဟပတိနော အာဝါသိကော ဟောတိ၊ နဝကမ္မိကော ဓုဝဘတ္တိကော. ယဒါ စိတ္တော ဂဟပတိ သံဃံ ဝါ ဂဏံ ဝါ ပုဂ္ဂလံ ဝါ နိမန္တေတုကာမော ဟောတိ တဒါ န အာယသ္မန္တံ သုဓမ္မံ အနပလောကေတွာ သံဃံ ဝါ ဂဏံ ဝါ ပုဂ္ဂလံ ဝါ နိမန္တေတိ.

တေန ခေါ ပန သမယေန သမ္ဗဟုလာ ထေရာ ဘိက္ခူ၊ အာယသ္မာ စ သာရိပုတ္တော၊ အာယသ္မာ စ မဟာမောဂ္ဂလ္လာနော၊ အာယသ္မာ စ မဟာကစ္စာနော၊ အာယသ္မာ စ မဟာကောဋ္ဌိကော၊ အာယသ္မာ စ မဟာကပ္ပိနော၊ အာယသ္မာ စ မဟာစုန္ဒော၊ အာယသ္မာ စ အနုရုဒ္ဓေါ၊ အာယသ္မာ စ ရေဝတော၊ အာယသ္မာ စ ဥပါလိ၊ အာယသ္မာ စ အာနန္ဒော၊ အာယသ္မာ စ ရာဟုလော၊ ကာသီသု စာရိကံ စရမာနာ ယေန မစ္ဆိကာသဏ္ဍော တဒဝသရုံ.

အဿောသိ ခေါ စိတ္တော ဂဟပတိ ထေရာ ကိရ ဘိက္ခူ မစ္ဆိကာသဏ္ဍံ အနုပ္ပတ္တာတိ. အထ ခေါ စိတ္တော ဂဟပတိ ယေန ထေရာ ဘိက္ခူ တေနုပသင်္ကမိ၊ ဥပသင်္ကမိတွာ ထေရေ ဘိက္ခူ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ စိတ္တံ ဂဟပတိံ အာယသ္မာ သာရိပုတ္တော ဓမ္မိယာ ကထာယ သန္ဒဿေသိ သမာဒပေသိ သမုတ္တေဇေသိ သမ္ပဟံသေသိ.

အထ ခေါ စိတ္တော ဂဟပတိ အာယသ္မတာ သာရိပုတ္တေန ဓမ္မိယာ ကထာယ သန္ဒဿိတော သမာဒပိတော သမုတ္တေဇိတော သမ္ပဟံသိတော ထေရေ ဘိက္ခူ ဧတဒဝေါစ – ‘‘အဓိဝါသေန္တု မေ၊ ဘန္တေ၊ ထေရာ သွာတနာယ အာဂန္တုကဘတ္တ’’န္တိ. အဓိဝါသေသုံ ခေါ ထေရာ ဘိက္ခူ [အဓိဝါသေသုံ ခေါ တေ ထေရာ ဘိက္ခူ (သျာ.)] တုဏှီဘာဝေန.

အထ ခေါ စိတ္တော ဂဟပတိ ထေရာနံ ဘိက္ခူနံ အဓိဝါသနံ ဝိဒိတွာ ဥဋ္ဌာယာသနာ ထေရေ ဘိက္ခူ အဘိဝါဒေတွာ ပဒက္ခိဏံ ကတွာ ယေနာယသ္မာ သုဓမ္မော တေနုပသင်္ကမိ၊ ဥပသင်္ကမိတွာ အာယသ္မန္တံ သုဓမ္မံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတော ခေါ စိတ္တော ဂဟပတိ အာယသ္မန္တံ သုဓမ္မံ ဧတဒဝေါစ – ‘‘အဓိဝါသေတု မေ၊ ဘန္တေ၊ အယျော သုဓမ္မော သွာတနာယ ဘတ္တံ သဒ္ဓိံ ထေရေဟီ’’တိ. အထ ခေါ အာယသ္မာ သုဓမ္မော ‘ပုဗ္ဗေ ခွာယံ စိတ္တော ဂဟပတိ ယဒါ သံဃံ ဝါ ဂဏံ ဝါ ပုဂ္ဂလံ ဝါ နိမန္တေတုကာမော န မံ အနပလောကေတွာ သံဃံ ဝါ ဂဏံ ဝါ ပုဂ္ဂလံ ဝါ နိမန္တေတိ၊ သောဒါနိ မံ အနပလောကေတွာ ထေရေ ဘိက္ခူ နိမန္တေသိ၊ ဒုဋ္ဌောဒါနာယံ စိတ္တော ဂဟပတိ အနပေက္ခော ဝိရတ္တရူပေါ မယီ’တိ စိတ္တံ ဂဟပတိံ ဧတဒဝေါစ – ‘‘အလံ၊ ဂဟပတိ၊ နာဓိဝါသေမီ’’တိ. ဒုတိယမ္ပိ ခေါ။ပေ။ တတိယမ္ပိ ခေါ စိတ္တော ဂဟပတိ အာယသ္မန္တံ သုဓမ္မံ ဧတဒဝေါစ – ‘‘အဓိဝါသေတု မေ၊ ဘန္တေ၊ အယျော သုဓမ္မော သွာတနာယ ဘတ္တံ သဒ္ဓိံ ထေရေဟီ’’တိ. ‘‘အလံ၊ ဂဟပတိ၊ နာဓိဝါသေမီ’’တိ. အထ ခေါ စိတ္တော ဂဟပတိ ‘ကိံ မေ ကရိဿတိ အယျော သုဓမ္မော အဓိဝါသေန္တော ဝါ အနဓိဝါသေန္တော ဝါ’တိ အာယသ္မန္တံ သုဓမ္မံ အဘိဝါဒေတွာ ပဒက္ခိဏံ ကတွာ ပက္ကာမိ.

၃၄. အထ ခေါ စိတ္တော ဂဟပတိ တဿာ ရတ္တိယာ အစ္စယေန ထေရာနံ ဘိက္ခူနံ ပဏီတံ ခါဒနီယံ ဘောဇနီယံ ပဋိယာဒါပေသိ. အထ ခေါ အာယသ္မာ သုဓမ္မော ‘ယံနူနာဟံ စိတ္တဿ ဂဟပတိနော ထေရာနံ ဘိက္ခူနံ ပဋိယတ္တံ ပဿေယျ’န္တိ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန စိတ္တဿ ဂဟပတိနော နိဝေသနံ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ. အထ ခေါ စိတ္တော ဂဟပတိ ယေနာယသ္မာ သုဓမ္မော တေနုပသင်္ကမိ၊ ဥပသင်္ကမိတွာ အာယသ္မန္တံ သုဓမ္မံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ စိတ္တံ ဂဟပတိံ အာယသ္မာ သုဓမ္မော ဧတဒဝေါစ – ‘‘ပဟူတံ ခေါ တေ ဣဒံ၊ ဂဟပတိ၊ ခါဒနီယံ ဘောဇနီယံ ပဋိယတ္တံ၊ ဧကာ စ ခေါ ဣဓ နတ္ထိ ယဒိဒံ တိလသင်္ဂုဠိကာ’’တိ. ‘‘ဗဟုမှိ ဝတ၊ ဘန္တေ၊ ရတနေ ဗုဒ္ဓဝစနေ [ဘန္တေ ဗုဒ္ဓဝစနေ (သျာ.)] ဝိဇ္ဇမာနေ အယျေန သုဓမ္မေန ယဒေဝ ကိဉ္စိ ဘာသိတံ ယဒိဒံ တိလသင်္ဂုဠိကာတိ. ဘူတပုဗ္ဗံ၊ ဘန္တေ၊ ဒက္ခိဏာပထကာ ဝါဏိဇာ ပုရတ္ထိမံ ဇနပဒံ အဂမံသု ဝါဏိဇ္ဇာယ. တေ တတော ကုက္ကုဋိံ အာနေသုံ. အထ ခေါ သာ၊ ဘန္တေ၊ ကုက္ကုဋီ ကာကေန သဒ္ဓိံ သံဝါသံ ကပ္ပေသိ. သာ ပေါတကံ ဇနေသိ. ယဒါ ခေါ သော၊ ဘန္တေ၊ ကုက္ကုဋပေါတကော ကာကဝဿံ ဝဿိတုကာမော ဟောတိ၊ ကာကကုက္ကုဋီတိ ဝဿတိ၊ ယဒါ ကုက္ကုဋိဝဿံ ဝဿိတုကာမော ဟောတိ၊ ကုက္ကုဋိကာကာတိ ဝဿတိ. ဧဝမေဝ ခေါ၊ ဘန္တေ၊ ဗဟုမှိ ရတနေ ဗုဒ္ဓဝစနေ ဝိဇ္ဇမာနေ အယျေန သုဓမ္မေန ယဒေဝ ကိဉ္စိ ဘာသိတံ ယဒိဒံ တိလသံဂုဠိကာ’’တိ. ‘‘အက္ကောသသိ မံ တွံ၊ ဂဟပတိ၊ ပရိဘာသသိ မံ တွံ၊ ဂဟပတိ. ဧသော တေ၊ ဂဟပတိ၊ အာဝါသော၊ ပက္ကမိဿာမီ’’တိ. ‘‘နာဟံ၊ ဘန္တေ၊ အယျံ သုဓမ္မံ အက္ကောသာမိ၊ ပရိဘာသာမိ [န ပရိဘာသာမိ (သီ. သျာ.)]. ဝသတု၊ ဘန္တေ၊ အယျော သုဓမ္မော မစ္ဆိကာသဏ္ဍေ. ရမဏီယံ အမ္ဗာဋကဝနံ. အဟံ အယျဿ သုဓမ္မဿ ဥဿုက္ကံ ကရိဿာမိ၊ စီဝရပိဏ္ဍပါတသေနာသနဂိလာနပ္ပစ္စယဘေသဇ္ဇပရိက္ခာရာန’’န္တိ. ဒုတိယမ္ပိ ခေါ။ပေ။ တတိယမ္ပိ ခေါ အာယသ္မာ သုဓမ္မော စိတ္တံ ဂဟပတိံ ဧတဒဝေါစ – ‘‘အက္ကောသသိ မံ တွံ၊ ဂဟပတိ၊ ပရိဘာသသိ မံ တွံ၊ ဂဟပတိ. ဧသော တေ၊ ဂဟပတိ၊ အာဝါသော၊ ပက္ကမိဿာမီ’’တိ. ‘‘ကဟံ၊ ဘန္တေ၊ အယျော သုဓမ္မော ဂမိဿတီ’’တိ? ‘‘သာဝတ္ထိံ ခေါ အဟံ၊ ဂဟပတိ၊ ဂမိဿာမိ ဘဂဝန္တံ ဒဿနာယာ’’တိ. ‘‘တေန ဟိ၊ ဘန္တေ၊ ယဉ္စ အတ္တနာ ဘဏိတံ၊ ယဉ္စ မယာ ဘဏိတံ တံ သဗ္ဗံ ဘဂဝတော အာရောစေဟိ. အနစ္ဆရိယံ ခေါ ပနေတံ၊ ဘန္တေ၊ ယံ အယျော သုဓမ္မော ပုနဒေဝ မစ္ဆိကာသဏ္ဍံ ပစ္စာဂစ္ဆေယျာ’’တိ.

၃၅. အထ ခေါ အာယသ္မာ သုဓမ္မော သေနာသနံ သံသာမေတွာ ပတ္တစီဝရမာဒါယ ယေန သာဝတ္ထိ တေန ပက္ကာမိ. အနုပုဗ္ဗေန ယေန သာဝတ္ထိ ဇေတဝနံ အနာထပိဏ္ဍိကဿ အာရာမော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ သုဓမ္မော ယဉ္စ အတ္တနာ ဘဏိတံ ယဉ္စ စိတ္တေန ဂဟပတိနာ ဘဏိတံ တံ သဗ္ဗံ ဘဂဝတော အာရောစေသိ.

ဝိဂရဟိ ဗုဒ္ဓေါ ဘဂဝါ – ‘‘အနနုစ္ဆဝိကံ၊ မောဃပုရိသ၊ အနနုလောမိကံ အပ္ပတိရူပံ အဿာမဏကံ အကပ္ပိယံ အကရဏီယံ. ကထဉှိ နာမ တွံ၊ မောဃပုရိသ၊ စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေဿသိ၊ ဟီနေန ဝမ္ဘေဿသိ? နေတံ၊ မောဃပုရိသ၊ အပ္ပသန္နာနံ ဝါ ပသာဒါယ။ပေ။ ဝိဂရဟိတွာ။ပေ။ ဓမ္မိံ ကထံ ကတွာ ဘိက္ခူ အာမန္တေသိ – တေန ဟိ၊ ဘိက္ခဝေ၊ သံဃော သုဓမ္မဿ ဘိက္ခုနော ပဋိသာရဏီယကမ္မံ ကရောတု – စိတ္တော တေ ဂဟပတိ ခမာပေတဗ္ဗောတိ. ဧဝဉ္စ ပန၊ ဘိက္ခဝေ၊ ကာတဗ္ဗံ – ပဌမံ သုဓမ္မော ဘိက္ခု စောဒေတဗ္ဗော၊ စောဒေတွာ သာရေတဗ္ဗော၊ သာရေတွာ အာပတ္တိံ အာရောပေတဗ္ဗော၊ အာပတ္တိံ အာရောပေတွာ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

၃၆. ‘‘သုဏာတု မေ၊ ဘန္တေ၊ သံဃော. အယံ သုဓမ္မော ဘိက္ခု စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေတိ၊ ဟီနေန ဝမ္ဘေတိ. ယဒိ သံဃဿ ပတ္တကလ္လံ၊ သံဃော သုဓမ္မဿ ဘိက္ခုနော ပဋိသာရဏီယကမ္မံ ကရေယျ – စိတ္တော တေ ဂဟပတိ ခမာပေတဗ္ဗောတိ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ သုဓမ္မော ဘိက္ခု စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေတိ၊ ဟီနေန ဝမ္ဘေတိ. သံဃော သုဓမ္မဿ ဘိက္ခုနော ပဋိသာရဏီယကမ္မံ ကရောတိ – စိတ္တော တေ ဂဟပတိ ခမာပေတဗ္ဗောတိ. ယဿာယသ္မတော ခမတိ သုဓမ္မဿ ဘိက္ခုနော ပဋိသာရဏီယဿ ကမ္မဿ ကရဏံ – စိတ္တော တေ ဂဟပတိ ခမာပေတဗ္ဗောတိ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သံဃော. အယံ သုဓမ္မော ဘိက္ခု စိတ္တံ ဂဟပတိံ သဒ္ဓံ ပသန္နံ ဒါယကံ ကာရကံ သင်္ဃုပဋ္ဌာကံ ဟီနေန ခုံသေတိ၊ ဟီနေန ဝမ္ဘေတိ. သံဃော သုဓမ္မဿ ဘိက္ခုနော ပဋိသာရဏီယကမ္မံ ကရောတိ – စိတ္တော တေ ဂဟပတိ ခမာပေတဗ္ဗောတိ. ယဿာယသ္မတော ခမတိ သုဓမ္မဿ ဘိက္ခုနော ပဋိသာရဏီယဿ ကမ္မဿ ကရဏံ – စိတ္တော တေ ဂဟပတိ ခမာပေတဗ္ဗောတိ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ကတံ သံဃေန သုဓမ္မဿ ဘိက္ခုနော ပဋိသာရဏီယကမ္မံ – စိတ္တော တေ ဂဟပတိ ခမာပေတဗ္ဗောတိ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

အဓမ္မကမ္မဒွါဒသကံ

၃၇. ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ ပဋိသာရဏီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ. အသမ္မုခါ ကတံ ဟောတိ၊ အပ္ပဋိပုစ္ဆာ ကတံ ဟောတိ၊ အပ္ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ.

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ. အနာပတ္တိယာ ကတံ ဟောတိ၊ အဒေသနာဂါမိနိယာ အာပတ္တိယာ ကတံ ဟောတိ၊ ဒေသိတာယ အာပတ္တိယာ ကတံ ဟောတိ။ပေ။ အစောဒေတွာ ကတံ ဟောတိ၊ အသာရေတွာ ကတံ ဟောတိ၊ အာပတ္တိံ အနာရောပေတွာ ကတံ ဟောတိ။ပေ။ အသမ္မုခါ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ။ပေ။ အပ္ပဋိပုစ္ဆာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ။ပေ။ အပ္ပဋိညာယ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ။ပေ။ အနာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ။ပေ။ အဒေသနာဂါမိနိယာ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ။ပေ။ ဒေသိတာယ အာပတ္တိယာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ။ပေ။ အစောဒေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ။ပေ။ အသာရေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ။ပေ။ အာပတ္တိံ အနာရောပေတွာ ကတံ ဟောတိ၊ အဓမ္မေန ကတံ ဟောတိ၊ ဝဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ အဓမ္မကမ္မဉ္စ ဟောတိ၊ အဝိနယကမ္မဉ္စ၊ ဒုဝူပသန္တဉ္စ.

ပဋိသာရဏီယကမ္မေ အဓမ္မကမ္မဒွါဒသကံ နိဋ္ဌိတံ.

ဓမ္မကမ္မဒွါဒသကံ

၃၈. ‘‘တီဟိ၊ ဘိက္ခဝေ၊ အင်္ဂေဟိ သမန္နာဂတံ ပဋိသာရဏီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ. သမ္မုခါ ကတံ ဟောတိ၊ ပဋိပုစ္ဆာ ကတံ ဟောတိ၊ ပဋိညာယ ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ.

‘‘အပရေဟိပိ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ. အာပတ္တိယာ ကတံ ဟောတိ၊ ဒေသနာဂါမိနိယာ အာပတ္တိယာ ကတံ ဟောတိ၊ အဒေသိတာယ အာပတ္တိယာ ကတံ ဟောတိ။ပေ။ စောဒေတွာ ကတံ ဟောတိ၊ သာရေတွာ ကတံ ဟောတိ၊ အာပတ္တိံ အာရောပေတွာ ကတံ ဟောတိ။ပေ။ သမ္မုခါ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ။ပေ။ ပဋိပုစ္ဆာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ။ပေ။ ပဋိညာယ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ။ပေ။ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ။ပေ။ ဒေသနာဂါမိနိယာ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ။ပေ။ အဒေသိတာယ အာပတ္တိယာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ။ပေ။ စောဒေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ။ပေ။ သာရေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ။ပေ။ အာပတ္တိံ အာရောပေတွာ ကတံ ဟောတိ၊ ဓမ္မေန ကတံ ဟောတိ၊ သမဂ္ဂေန ကတံ ဟောတိ – ဣမေဟိ ခေါ၊ ဘိက္ခဝေ၊ တီဟင်္ဂေဟိ သမန္နာဂတံ ပဋိသာရဏီယကမ္မံ ဓမ္မကမ္မဉ္စ ဟောတိ၊ ဝိနယကမ္မဉ္စ၊ သုဝူပသန္တဉ္စ.

ပဋိသာရဏီယကမ္မေ ဓမ္မကမ္မဒွါဒသကံ နိဋ္ဌိတံ.

အာကင်္ခမာနစတုက္ကံ

၃၉. ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သံဃော၊ ပဋိသာရဏီယကမ္မံ ကရေယျ. ဂိဟီနံ အလာဘာယ ပရိသက္ကတိ၊ ဂိဟီနံ အနတ္ထာယ ပရိသက္ကတိ၊ ဂိဟီနံ အနာဝါသာယ [အဝါသာယ (သီ.)] ပရိသက္ကတိ၊ ဂိဟီ အက္ကောသတိ ပရိဘာသတိ၊ ဂိဟီ ဂိဟီဟိ ဘေဒေတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သံဃော၊ ပဋိသာရဏီယကမ္မံ ကရေယျ.

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သံဃော၊ ပဋိသာရဏီယကမ္မံ ကရေယျ. ဂိဟီနံ ဗုဒ္ဓဿ အဝဏ္ဏံ ဘာသတိ၊ ဂိဟီနံ ဓမ္မဿ အဝဏ္ဏံ ဘာသတိ၊ ဂိဟီနံ သံဃဿ အဝဏ္ဏံ ဘာသတိ၊ ဂိဟီ ဟီနေန ခုံသေတိ ဟီနေန ဝမ္ဘေတိ၊ ဂိဟီနံ ဓမ္မိကံ ပဋိဿဝံ န သစ္စာပေတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော၊ အာကင်္ခမာနော သံဃော၊ ပဋိသာရဏီယကမ္မံ ကရေယျ.

‘‘ပဉ္စန္နံ၊ ဘိက္ခဝေ၊ ဘိက္ခူနံ၊ အာကင်္ခမာနော သံဃော၊ ပဋိသာရဏီယကမ္မံ ကရေယျ. ဧကော ဂိဟီနံ အလာဘာယ ပရိသက္ကတိ၊ ဧကော ဂိဟီနံ အနတ္ထာယ ပရိသက္ကတိ၊ ဧကော ဂိဟီနံ အနာဝါသာယ ပရိသက္ကတိ၊ ဧကော ဂိဟီ အက္ကောသတိ ပရိဘာသတိ၊ ဧကော ဂိဟီ ဂိဟီဟိ ဘေဒေတိ – ဣမေသံ ခေါ၊ ဘိက္ခဝေ၊ ပဉ္စန္နံ ဘိက္ခူနံ၊ အာကင်္ခမာနော သံဃော၊ ပဋိသာရဏီယကမ္မံ ကရေယျ.

‘‘အပရေသမ္ပိ၊ ဘိက္ခဝေ၊ ပဉ္စန္နံ ဘိက္ခူနံ၊ အာကင်္ခမာနော သံဃော၊ ပဋိသာရဏီယကမ္မံ ကရေယျ. ဧကော ဂိဟီနံ ဗုဒ္ဓဿ အဝဏ္ဏံ ဘာသတိ၊ ဧကော ဂိဟီနံ ဓမ္မဿ အဝဏ္ဏံ ဘာသတိ၊ ဧကော ဂိဟီနံ သံဃဿ အဝဏ္ဏံ ဘာသတိ၊ ဧကော ဂိဟီ ဟီနေန ခုံသေတိ ဟီနေန ဝမ္ဘေတိ၊ ဧကော ဂိဟီနံ ဓမ္မိကံ ပဋိဿဝံ န သစ္စာပေတိ – ဣမေသံ ခေါ၊ ဘိက္ခဝေ၊ ပဉ္စန္နံ ဘိက္ခူနံ၊ အာကင်္ခမာနော သံဃော၊ ပဋိသာရဏီယကမ္မံ ကရေယျ.

အာကင်္ခမာနစတုက္ကံ နိဋ္ဌိတံ.

အဋ္ဌာရသဝတ္တံ

၄၀. ‘‘ပဋိသာရဏီယကမ္မကတေန၊ ဘိက္ခဝေ၊ ဘိက္ခုနာ သမ္မာ ဝတ္တိတဗ္ဗံ. တတြာယံ သမ္မာဝတ္တနာ – န ဥပသမ္ပာဒေတဗ္ဗံ၊ န နိဿယော ဒါတဗ္ဗော၊ န သာမဏေရော ဥပဋ္ဌာပေတဗ္ဗော၊ န ဘိက္ခုနောဝါဒကသမ္မုတိ သာဒိတဗ္ဗာ၊ သမ္မတေနပိ ဘိက္ခုနိယော န ဩဝဒိတဗ္ဗာ. ယာယ အာပတ္တိယာ သံဃေန ပဋိသာရဏီယကမ္မံ ကတံ ဟောတိ သာ အာပတ္တိ န အာပဇ္ဇိတဗ္ဗာ၊ အညာ ဝါ တာဒိသိကာ၊ တတော ဝါ ပါပိဋ္ဌတရာ၊ ကမ္မံ န ဂရဟိတဗ္ဗံ၊ ကမ္မိကာ န ဂရဟိတဗ္ဗာ. န ပကတတ္တဿ ဘိက္ခုနော ဥပေါသထော ဌပေတဗ္ဗော၊ န ပဝါရဏာ ဌပေတဗ္ဗာ၊ န သဝစနီယံ ကာတဗ္ဗံ၊ န အနုဝါဒေါ ပဋ္ဌပေတဗ္ဗော၊ န ဩကာသော ကာရေတဗ္ဗော၊ န စောဒေတဗ္ဗော၊ န သာရေတဗ္ဗော၊ န ဘိက္ခူဟိ သမ္ပယောဇေတဗ္ဗ’’န္တိ.

ပဋိသာရဏီယကမ္မေ အဋ္ဌာရသဝတ္တံ နိဋ္ဌိတံ.

၄၁. အထ ခေါ သံဃော သုဓမ္မဿ ဘိက္ခုနော ပဋိသာရဏီယကမ္မံ အကာသိ – ‘‘စိတ္တော တေ ဂဟပတိ ခမာပေတဗ္ဗော’’တိ. သော သံဃေန ပဋိသာရဏီယကမ္မကတော မစ္ဆိကာသဏ္ဍံ ဂန္တွာ မင်္ကုဘူတော နာသက္ခိ စိတ္တံ ဂဟပတိံ ခမာပေတုံ. ပုနဒေဝ သာဝတ္ထိံ ပစ္စာဂဉ္ဆိ. ဘိက္ခူ ဧဝမာဟံသု – ‘‘ခမာပိတော တယာ၊ အာဝုသော သုဓမ္မ၊ စိတ္တော ဂဟပတီ’’တိ? ‘‘ဣဓာဟံ၊ အာဝုသော၊ မစ္ဆိကာသဏ္ဍံ ဂန္တွာ မင်္ကုဘူတော နာသက္ခိံ စိတ္တံ ဂဟပတိံ ခမာပေတု’’န္တိ. ဘိက္ခူ ဘဂဝတော ဧတမတ္ထံ အာရောစေသုံ။ပေ။. ‘‘တေန ဟိ၊ ဘိက္ခဝေ၊ သံဃော သုဓမ္မဿ ဘိက္ခုနော အနုဒူတံ ဒေတု – စိတ္တံ ဂဟပတိံ ခမာပေတုံ. ဧဝဉ္စ ပန ဘိက္ခဝေ ဒါတဗ္ဗော – ပဌမံ ဘိက္ခု ယာစိတဗ္ဗော၊ ယာစိတွာ ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. ယဒိ သံဃဿ ပတ္တကလ္လံ၊ သံဃော ဣတ္ထန္နာမံ ဘိက္ခုံ သုဓမ္မဿ ဘိက္ခုနော အနုဒူတံ ဒဒေယျ စိတ္တံ ဂဟပတိံ ခမာပေတုံ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. သံဃော ဣတ္ထန္နာမံ ဘိက္ခုံ သုဓမ္မဿ ဘိက္ခုနော အနုဒူတံ ဒေတိ စိတ္တံ ဂဟပတိံ ခမာပေတုံ. ယဿာယသ္မတော ခမတိ ဣတ္ထန္နာမဿ ဘိက္ခုနော သုဓမ္မဿ ဘိက္ခုနော အနုဒူတဿ ဒါနံ စိတ္တံ ဂဟပတိံ ခမာပေတုံ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒိန္နော သံဃေန ဣတ္ထန္နာမော ဘိက္ခု သုဓမ္မဿ ဘိက္ခုနော အနုဒူတော စိတ္တံ ဂဟပတိံ ခမာပေတုံ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

၄၂. ‘‘တေန၊ ဘိက္ခဝေ၊ သုဓမ္မေန ဘိက္ခုနာ အနုဒူတေန ဘိက္ခုနာ သဒ္ဓိံ မစ္ဆိကာသဏ္ဍံ ဂန္တွာ စိတ္တော ဂဟပတိ ခမာပေတဗ္ဗော – ‘ခမ၊ ဂဟပတိ၊ ပသာဒေမိ တ’န္တိ. ဧဝဉ္စေ ဝုစ္စမာနော ခမတိ၊ ဣစ္စေတံ ကုသလံ. နော စေ ခမတိ၊ အနုဒူတေန ဘိက္ခုနာ ဝတ္တဗ္ဗော – ‘ခမ၊ ဂဟပတိ၊ ဣမဿ ဘိက္ခုနော၊ ပသာဒေတိ တ’န္တိ. ဧဝဉ္စေ ဝုစ္စမာနော ခမတိ၊ ဣစ္စေတံ ကုသလံ. နော စေ ခမတိ၊ အနုဒူတေန ဘိက္ခုနာ ဝတ္တဗ္ဗော – ‘ခမ၊ ဂဟပတိ၊ ဣမဿ ဘိက္ခုနော၊ အဟံ တံ ပသာဒေမီ’တိ. ဧဝဉ္စေ ဝုစ္စမာနော ခမတိ၊ ဣစ္စေတံ ကုသလံ. နော စေ ခမတိ၊ အနုဒူတေန ဘိက္ခုနာ ဝတ္တဗ္ဗော – ‘ခမ၊ ဂဟပတိ၊ ဣမဿ ဘိက္ခုနော၊ သံဃဿ ဝစနေနာ’တိ. ဧဝဉ္စေ ဝုစ္စမာနော ခမတိ၊ ဣစ္စေတံ ကုသလံ. နော စေ ခမတိ၊ အနုဒူတေန ဘိက္ခုနာ သုဓမ္မော ဘိက္ခု [သုဓမ္မံ ဘိက္ခုံ။ သာ အာပတ္တိ ဒေသာပေတဗ္ဗာတိ (သီ. သျာ.)] စိတ္တဿ ဂဟပတိနော ဒဿနူပစာရံ အဝိဇဟာပေတွာ သဝနူပစာရံ အဝိဇဟာပေတွာ ဧကံသံ ဥတ္တရာသင်္ဂံ ကာရာပေတွာ ဥက္ကုဋိကံ နိသီဒါပေတွာ အဉ္ဇလိံ ပဂ္ဂဏှာပေတွာ တံ အာပတ္တိံ ဒေသာပေတဗ္ဗော’’တိ [သုဓမ္မံ ဘိက္ခုံ။ သာ အာပတ္တိ ဒေသာပေတဗ္ဗာတိ (သီ. သျာ.)].

အထ ခေါ အာယသ္မာ သုဓမ္မော အနုဒူတေန ဘိက္ခုနာ သဒ္ဓိံ မစ္ဆိကာသဏ္ဍံ ဂန္တွာ စိတ္တံ ဂဟပတိံ ခမာပေသိ. သော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ဘိက္ခူ ဥပသင်္ကမိတွာ ဧဝံ ဝဒေတိ – ‘‘အဟံ၊ အာဝုသော၊ သံဃေန ပဋိသာရဏီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ. ကထံ နု ခေါ မယာ ပဋိပဇ္ဇိတဗ္ဗ’’န္တိ? ဘိက္ခူ ဘဂဝတော ဧတမတ္ထံ အာရောစေသုံ။ပေ။ ‘‘တေန ဟိ၊ ဘိက္ခဝေ၊ သံဃော သုဓမ္မဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတု.

နပ္ပဋိပ္ပဿမ္ဘေတဗ္ဗအဋ္ဌာရသကံ

၄၃. ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ. ဥပသမ္ပာဒေတိ၊ နိဿယံ ဒေတိ၊ သာမဏေရံ ဥပဋ္ဌာပေတိ၊ ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ.

[ပရိ. ၄၂၀] ‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ. ယာယ အာပတ္တိယာ သံဃေန ပဋိသာရဏီယကမ္မံ ကတံ ဟောတိ တံ အာပတ္တိံ အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ ဂရဟတိ၊ ကမ္မိကေ ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ.

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ. ပကတတ္တဿ ဘိက္ခုနော ဥပေါသထံ ဌပေတိ၊ ပဝါရဏံ ဌပေတိ၊ သဝစနီယံ ကရောတိ၊ အနုဝါဒံ ပဋ္ဌပေတိ၊ ဩကာသံ ကာရေတိ၊ စောဒေတိ၊ သာရေတိ၊ ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ နပ္ပဋိပ္ပဿမ္ဘေတဗ္ဗံ’’.

ပဋိသာရဏီယကမ္မေ နပ္ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ.

ပဋိပ္ပဿမ္ဘေတဗ္ဗအဋ္ဌာရသကံ

၄၄. ‘‘ပဉ္စဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ. န ဥပသမ္ပာဒေတိ၊ န နိဿယံ ဒေတိ၊ န သာမဏေရံ ဥပဋ္ဌာပေတိ၊ န ဘိက္ခုနောဝါဒကသမ္မုတိံ သာဒိယတိ၊ သမ္မတောပိ ဘိက္ခုနိယော န ဩဝဒတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ.

‘‘အပရေဟိပိ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ. ယာယ အာပတ္တိယာ သံဃေန ပဋိသာရဏီယကမ္မံ ကတံ ဟောတိ တံ အာပတ္တိံ န အာပဇ္ဇတိ၊ အညံ ဝါ တာဒိသိကံ၊ တတော ဝါ ပါပိဋ္ဌတရံ၊ ကမ္မံ န ဂရဟတိ၊ ကမ္မိကေ န ဂရဟတိ – ဣမေဟိ ခေါ၊ ဘိက္ခဝေ၊ ပဉ္စဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ.

‘‘အဋ္ဌဟိ၊ ဘိက္ခဝေ၊ အင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ. န ပကတတ္တဿ ဘိက္ခုနော ဥပေါသထံ ဌပေတိ၊ န ပဝါရဏံ ဌပေတိ၊ န သဝစနီယံ ကရောတိ၊ န အနုဝါဒံ ပဋ္ဌပေတိ၊ န ဩကာသံ ကာရေတိ၊ န စောဒေတိ၊ န သာရေတိ၊ န ဘိက္ခူဟိ သမ္ပယောဇေတိ – ဣမေဟိ ခေါ၊ ဘိက္ခဝေ၊ အဋ္ဌဟင်္ဂေဟိ သမန္နာဂတဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတဗ္ဗံ.

ပဋိသာရဏီယကမ္မေ ပဋိပ္ပဿမ္ဘေတဗ္ဗအဋ္ဌာရသကံ နိဋ္ဌိတံ.

၄၅. ‘‘ဧဝဉ္စ ပန၊ ဘိက္ခဝေ၊ ပဋိပ္ပဿမ္ဘေတဗ္ဗံ. တေန [တေန ဟိ (သျာ. က.)]၊ ဘိက္ခဝေ၊ သုဓမ္မေန ဘိက္ခုနာ သံဃံ ဥပသင်္ကမိတွာ ဧကံသံ ဥတ္တရာသင်္ဂံ ကရိတွာ ဝုဍ္ဎာနံ ဘိက္ခူနံ ပါဒေ ဝန္ဒိတွာ ဥက္ကုဋိကံ နိသီဒိတွာ အဉ္ဇလိံ ပဂ္ဂဟေတွာ ဧဝမဿ ဝစနီယော – ‘အဟံ၊ ဘန္တေ၊ သံဃေန ပဋိသာရဏီယကမ္မကတော သမ္မာ ဝတ္တာမိ၊ လောမံ ပါတေမိ၊ နေတ္ထာရံ ဝတ္တာမိ၊ ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစာမီ’တိ. ဒုတိယမ္ပိ ယာစိတဗ္ဗာ. တတိယမ္ပိ ယာစိတဗ္ဗာ. ဗျတ္တေန ဘိက္ခုနာ ပဋိဗလေန သံဃော ဉာပေတဗ္ဗော –

‘‘သုဏာတု မေ၊ ဘန္တေ၊ သံဃော. အယံ သုဓမ္မော ဘိက္ခု သံဃေန ပဋိသာရဏီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ. ယဒိ သံဃဿ ပတ္တကလ္လံ၊ သံဃော သုဓမ္မဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေယျ. ဧသာ ဉတ္တိ.

‘‘သုဏာတု မေ၊ ဘန္တေ၊ သံဃော. အယံ သုဓမ္မော ဘိက္ခု သံဃေန ပဋိသာရဏီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ. သံဃော သုဓမ္မဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတိ. ယဿာယသ္မတော ခမတိ သုဓမ္မဿ ဘိက္ခုနော ပဋိသာရဏီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ဒုတိယမ္ပိ ဧတမတ္ထံ ဝဒါမိ။ပေ။ တတိယမ္ပိ ဧတမတ္ထံ ဝဒါမိ – သုဏာတု မေ၊ ဘန္တေ၊ သံဃော. အယံ သုဓမ္မော ဘိက္ခု သံဃေန ပဋိသာရဏီယကမ္မကတော သမ္မာ ဝတ္တတိ၊ လောမံ ပါတေတိ၊ နေတ္ထာရံ ဝတ္တတိ၊ ပဋိသာရဏီယဿ ကမ္မဿ ပဋိပ္ပဿဒ္ဓိံ ယာစတိ. သံဃော သုဓမ္မဿ ဘိက္ခုနော ပဋိသာရဏီယကမ္မံ ပဋိပ္ပဿမ္ဘေတိ. ယဿာယသ္မတော ခမတိ သုဓမ္မဿ ဘိက္ခုနော ပဋိသာရဏီယဿ ကမ္မဿ ပဋိပ္ပဿဒ္ဓိ၊ သော တုဏှဿ၊ ယဿ နက္ခမတိ၊ သော ဘာသေယျ.

‘‘ပဋိပ္ပဿဒ္ဓံ သံဃေန သုဓမ္မဿ ဘိက္ခုနော ပဋိသာရဏီယကမ္မံ. ခမတိ သံဃဿ၊ တသ္မာ တုဏှီ၊ ဧဝမေတံ ဓာရယာမီ’’တိ.

ပဋိသာရဏီယကမ္မံ နိဋ္ဌိတံ စတုတ္ထံ.