၁၀. ဇီဝိတိန္ဒြိယကထာဝဏ္ဏနာ

၅၄၀. အန္တံ ဂဟေတွာ ဝဒတီတိ ‘‘အတ္ထိ အရူပဓမ္မာနံ အာယု ဌိတိ ယပနာ ယာပနာ ဣရိယနာ ဝတ္တနာ ပါလနာ၊ အတ္ထိ အရူပဇီဝိတိန္ဒြိယ’’န္တိ တသ္မိံ ပဉှေ ‘‘အတ္ထိ အရူပဇီဝိတိန္ဒြိယ’’န္တိ ဣမံ အန္တံ ပရိယောသာနံ ဂဟေတွာ ဝဒတိ. ဝတ္တုံ ယုတ္တော သမုဒါယဿ ဣစ္ဆန္တော တဒဝယဝဿ ဣစ္ဆတီတိ. န ဟိ အဝယဝေဟိ ဝိနာ သမုဒါယော နာမ အတ္ထိ.

၅၄၁. တမေဝါတိ အရူပံ စိတ္တဝိပ္ပယုတ္တမေဝ.

၅၄၂. တဒါပီတိ သမာပဇ္ဇနဝုဋ္ဌာနကာလေပိ.

၅၄၄-၅၄၅. သော ယုတ္တော ဒွိန္နံ ရူပါရူပဇီဝိတိန္ဒြိယာနံ သကသမယေ ဣစ္ဆိတတ္တာ.

ဇီဝိတိန္ဒြိယကထာဝဏ္ဏနာ နိဋ္ဌိတာ.