၂. ပစ္စနီကာနုလောမဝဏ္ဏနာ

၁၄. အနုလောမပဉ္စကဿာတိအာဒိမှိ အဋ္ဌကထာဝစနေ. ပုန တတ္ထာတိ ယထာဝုတ္တေ အဋ္ဌကထာဝစနေ၊ တေသု ဝါ အနုလောမပဉ္စကပစ္စနီကေသု. သဗ္ဗတ္ထ ပုဂ္ဂလော နုပလဗ္ဘတီတိအာဒိကဿ ပါဌပ္ပဒေသဿ အတ္ထော ‘‘သရီရံ သန္ဓာယာ’’တိအာဒိနာ အဋ္ဌကထာယံ ဝုတ္တနယေန ဝေဒိတဗ္ဗော အတ္ထော. ပဋိကမ္မာဒိပါဠိန္တိ ပဋိကမ္မနိဂ္ဂဟဥပနယနနိဂမနပါဠိံ. တီသု မုခေသူတိ ‘‘သဗ္ဗတ္ထာ’’တိအာဒိနာ ဝုတ္တေသု တီသု ဝါဒမုခေသု. ပစ္စနီကဿ ပါဠိ ဝုတ္တာတိ သမ္ဗန္ဓော. တန္တိ ပါဠိံ. သင်္ခိပိတွာ အာဂတတ္တာ သရူပေန အဝုတ္တေ. သုဒ္ဓိက။ပေ။ ဝုတ္တံ ဟောတိ တတ္ထ ‘‘သဗ္ဗတ္ထာ’’တိအာဒိနာ သရီရာဒိနော ပရာမသနံ နတ္ထိ၊ ဣဓ အတ္ထီတိ အယမေဝ ဝိသေသော၊ အညံ သမာနန္တိ.

သစ္စိကဋ္ဌဝဏ္ဏနာ နိဋ္ဌိတာ.