၁. ပရူပဟာရဝဏ္ဏနာ

၃၀၇. ဝိက္ခမ္ဘိတရာဂါဝ အဝိက္ခမ္ဘိတရာဂါနံ အဓိမာနိကတာယ အသမ္ဘဝတောတိ ယာဝ အဓိမာနိကံ၊ တာဝ သမ္ပဇာနာ နိဒ္ဒံ ဩက္ကမန္တီတိ အဓိပ္ပါယော. ‘‘အဓိမာနိကာန’’န္တိ ဣဒံ ဘူတပုဗ္ဗဂတိယာ ဝုတ္တန္တိ အာဟ ‘‘အဓိမာနိကပုဗ္ဗာ အဓိပ္ပေတာ သိယု’’န္တိ.

၃၀၈. ယံ ဝိမတိဂါဟကာရဏံ ဝုစ္စမာနံ၊ တံ ‘‘ဟန္ဒ ဟီ’’တိ ပရံ ဇောတေတီတိ အဓိပ္ပါယေနာဟ ‘‘ကာရဏတ္ထေတိ ယုတ္တ’’န္တိ. ဝိမတိဂါဟဿ ပန နိစ္ဆိတတံ ‘‘ဟန္ဒ ဟီ’’တိ ပရံ ဇောတေတီတိ ဝုတ္တံ ‘‘ဝစသာယတ္ထေ’’တိ.

ပရူပဟာရဝဏ္ဏနာ နိဋ္ဌိတာ.