၁. ဧကာဓိပ္ပါယကထာဝဏ္ဏနာ

၉၀၈. ဧက-သဒ္ဒေါ အညတ္ထောပိ ဟောတိ ‘‘ဣတ္ထေကေ အဘိဝဒန္တီ’’တိအာဒီသု ဝိယ၊ အညတ္တဉ္စေတ္ထ ရာဂါဓိပ္ပါယတော ဝေဒိတဗ္ဗံ၊ ပုထုဇ္ဇနဿ ပန သဆန္ဒရာဂပရိဘောဂဘာဝတော အာဟ ‘‘ရာဂါဓိပ္ပါယတော အညာဓိပ္ပါယောဝါတိ ဝုတ္တံ ဟောတီ’’တိ. ကော ပန သော အညာဓိပ္ပါယောတိ? ကရုဏာဓိပ္ပါယော. တေန ဝုတ္တံ ‘‘ကရုဏာဓိပ္ပါယေန ဧကာဓိပ္ပါယော’’တိ. အယဉ္စ နယော ဣတ္ထိယာ ဇီဝိတရက္ခဏတ္ထံ ကာရုညေန မနောရထံ ပူရေန္တဿ ဗောဓိသတ္တဿ သံဝရဝိနာသော န ဟောတီတိ ဧဝံဝါဒိနံ ပရဝါဒိံ သန္ဓာယ ဝုတ္တော၊ ပဏိဓာနာဓိပ္ပါယဝါဒိနံ ပန သန္ဓာယ ‘‘ဧကော အဓိပ္ပါယောတိ ဧတ္ထာ’’တိအာဒိ ဝုတ္တံ. ပုတ္တမုခဒဿနာဓိပ္ပါယောပိ ဧတ္ထေဝ သင်္ဂဟံ ဂတောတိ ဒဋ္ဌဗ္ဗံ. ဧကတောဘာဝေတိ သဟဘာဝေ.

ဧကာဓိပ္ပါယကထာဝဏ္ဏနာ နိဋ္ဌိတာ.