၅. တထတာကထာဝဏ္ဏနာ

၈၄၁-၈၄၃. ရူပါဒီနံ သဘာဝတာတိ ဧတေန ရူပါဒယော ဧဝ သဘာဝတာတိ ဣမမတ္ထံ ပဋိက္ခိပတိ. ယတော တံ ပရဝါဒီ ရူပါဒီသု အပရိယာပန္နံ ဣစ္ဆတိ. တေနာဟ ‘‘ဘာဝံ ဟေသ တထတာတိ ဝဒတိ၊ န ဘာဝယောဂ’’န္တိ. တတ္ထ ဘာဝန္တိ ဓမ္မမတ္တံ၊ ပကတီတိ အတ္ထော ‘‘ဇာတိဓမ္မ’’န္တိအာဒီသု ဝိယ. ရူပါဒီနဉှိ ရုပ္ပနာဒိပကတိ တထာ အသင်္ခတာတိ စ ပရဝါဒိနော လဒ္ဓိ. တေန ဝုတ္တံ ‘‘န ဘာဝယောဂ’’န္တိ. ယေန ဟိ ဘာဝေါ သဘာဝဓမ္မော ယုဇ္ဇတိ၊ ဧကီဘာဝမေဝ ဂစ္ဆတိ၊ တံ ရုပ္ပနာဒိလက္ခဏံ ဘာဝယောဂေါ. တံ ပန ရူပါဒိတော အနညံ၊ တတော ဧဝ သင်္ခတံ၊ အဝိပရီတဋ္ဌေန ပန ‘‘တထ’’န္တိ ဝုစ္စတိ.

တထတာကထာဝဏ္ဏနာ နိဋ္ဌိတာ.