၁. အာနိသံသဒဿာဝီကထာဝဏ္ဏနာ

၅၄၇. ဒဋ္ဌဗ္ဗဿ အာဒီနဝတော အာနိသံသတော စ ယဒိပိ ပရဝါဒိနာ ပစ္ဆာ နာနာစိတ္တဝသေန ပဋိညာတံ၊ ပုဗ္ဗေ ပန ဧကတော ကတွာ ပဋိဇာနိ၊ န စ တံ လဒ္ဓိံ ပရိစ္စဇိ. တေနဿ အဓိပ္ပါယမဒ္ဒနံ ယုတ္တန္တိ ဒဋ္ဌဗ္ဗံ. တေနေဝါဟ ‘‘အနိစ္စ။ပေ။ ပဋိညာတတ္တာ’’တိ. အာရမ္မဏဝသေနာတိ အာရမ္မဏကရဏဝသေန၊ န ကိစ္စနိပ္ဖတ္တိဝသေနာတိ အဓိပ္ပါယော. ဣဒံ အာနိသံသကထာနုယုဉ္ဇနံ အာနိသံသဒဿနဉ္စ. ဉာဏံ ဝိပဿနာ ပဋိဝေဓဉာဏဿ ဝိယ အနုဗောဓဉာဏဿပိ ယထာရဟံ ပဝတ္တိနိဝတ္တီသု ကိစ္စကရဏံ ယုတ္တန္တိ အဓိပ္ပါယော.

အာနိသံသဒဿာဝီကထာဝဏ္ဏနာ နိဋ္ဌိတာ.