၅. မဉ္စပီဌသိက္ခာပဒဝဏ္ဏနာ

၅၂၁. ပဉ္စမေ ပါဠိယံ အာသယတော၊ ဘိက္ခဝေ၊ မောဃပုရိသော ဝေဒိတဗ္ဗောတိ ဟီနဇ္ဈာသယဝသေန အယံ တုစ္ဆပုရိသောတိ ဉာတဗ္ဗော၊ ဟီနာယ ပစ္စယေ လောလတာယ ပုဂ္ဂလဿ တုစ္ဆတာ ဉာတဗ္ဗာတိ အဓိပ္ပါယော. ဣမသ္မိံ သိက္ခာပဒေ၊ ဣတော ပရေသု စ ပဉ္စသု အတ္တနာ ကာရာပိတဿ ပဋိလာဘေ ဧဝ ပါစိတ္တိယံ. ပရိဘောဂေ ပနဿ၊ အညေသဉ္စ ဒုက္ကဋမေဝ. ပမာဏာတိက္ကန္တမဉ္စပီဌတာ၊ အတ္တနော ကရဏကာရာပနဝသေန ပဋိလာဘောတိ ဒွေ အင်္ဂါနိ.

မဉ္စပီဌသိက္ခာပဒဝဏ္ဏနာ နိဋ္ဌိတာ.