၃. ဝိကာလဂါမပ္ပဝိသနသိက္ခာပဒဝဏ္ဏနာ

၅၀၈. တတိယေ ပါဠိယံ ဘယကထန္တိ ရာဇစောရာဒိဘယံ ဝါ ရောဂါမနုဿဒုဗ္ဘိက္ခကန္တာရာဒိဘယံ ဝါ အာရဗ္ဘ ပဝတ္တံ. ဝိသိခါကထန္တိ သုနိဝိဋ္ဌာဒိဝီထိကထံ. ကုမ္ဘဋ္ဌာနကထန္တိ ဥဒကတိတ္ထကထံ၊ ကုမ္ဘဒါသီကထံ ဝါ. ပုဗ္ဗပေတကထန္တိ အတီတဉာတိကထံ. နာနတ္တကထန္တိ ဝုတ္တာဟိ၊ ဝက္ခမာနာဟိ စ ဝိမုတ္တံ နာနာသဘာဝံ နိရတ္ထကကထံ. လောကက္ခာယိကန္တိ ‘‘အယံ လောကော ကေန နိမ္မိတော’’တိအာဒိနာ လောကသဘာဝက္ခာနဝသေန ပဝတ္တနကထာ. ဧဝံ သမုဒ္ဒက္ခာယိကာ ဝေဒိတဗ္ဗာ. ဣတိ ဘဝေါ ဣတိ အဘဝေါတိ ယံ ဝါ တံ ဝါ နိရတ္ထကကာရဏံ ဝတွာ ပဝတ္တိတကထာ ဣတိဘဝါဘဝကထာ. ဧတ္ထ စ ဘဝေါ သဿတံ၊ ဝုဍ္ဎိ၊ ကာမသုခဉ္စာတိ တိဝိဓော၊ အဘဝေါ တဗ္ဗိပရီတဝသေန. ဣတိ ဣမာယ ဆဗ္ဗိဓာယ ဣတိဘဝါဘဝကထာယ သဒ္ဓိံ ဒွတ္တိံသတိရစ္ဆာနကထာ နာမ ဟောန္တိ. အထ ဝါ ပါဠိယံ သရူပတော အနာဂတာပိ အရညပဗ္ဗတနဒီဒီပကထာ ဣတိ-သဒ္ဒေန သင်္ဂဟေတွာ ဒွတ္တိံသတိရစ္ဆာနကထာတိ ဝုစ္စန္တိ. ဣတိ ဝါတိ ဧတ္ထ ဣတိ-သဒ္ဒေါ ပကာရတ္ထေ. ဝါ-သဒ္ဒေါ ဝိကပ္ပတ္ထေ. တသ္မာ ဧဝံ ပကာရံ ဣတော အညံ ဝါ တာဒိသံ နိရတ္ထကကထံ ကထေတီတိ အတ္ထော ဂဟေတဗ္ဗော.

၅၁၂. ဥဿာဟံ ပဋိပ္ပဿမ္ဘေတွာ ဝိဟာရံ ဂစ္ဆန္တာတိ ဧတ္ထ ဂါမူပစာရတော ဗဟိ နိက္ခန္တေ အန္တရာရာမာဒီနမုပစာရံ ပဝိဋ္ဌေ သန္ဓာယ ဝုတ္တံ. ဂါမူပစာရဗ္ဘန္တရေ ပန ပဋိပဿဒ္ဓုဿာဟာနမ္ပိ ပုန တမေဝ ဝါ အညံ ဝါ ဂါမံ ပဝိသိတုကာမတာယ သတိ အာပုစ္ဆနကိစ္စံ နတ္ထိ. ‘‘ကုလဃရေ ဝါ။ပေ။ ဂန္တဗ္ဗ’’န္တိ ဣဒံ ပန ပုရေဘတ္တံ ပဝိဋ္ဌာနံ ဝိကာလေ သဉ္ဇာတေ ဝိကာလေ ဂါမပ္ပဝေသဿ အာပုစ္ဆိတဗ္ဗတာယ ဝုတ္တံ. အဒိန္နာဒါနေ ဝုတ္တနယေနာတိ ဒုတိယလေဍ္ဍုပါတံ သန္ဓာယ ဝုတ္တံ.

၅၁၅. အန္တရာရာမန္တိအာဒီသူတိ ဧတ္ထ ဥဿဝဒိဝသာဒီသု မနုဿေဟိ ဂါမေ ပဒက္ခိဏံ ကာရေန္တံ ဇိနဗိမ္ဗာဒိံ ပူဇေတုကာမေဟိ ဝါ ရောဂဝူပသမာဒိယတ္ထံ မနုဿေဟိ ယာစိတေဟိ ဝါ ဘိက္ခူဟိ သုပ္ပဋိစ္ဆန္နာဒိဝိဓိံ အကတွာပိ ဝီထိမဇ္ဈေနေဝ ဂါမံ ပဒက္ခိဏံ ကာတုံ ဝဋ္ဋတီတိ ဝဒန္တိ၊ တံ န ဂဟေတဗ္ဗံ အနာပတ္တိဝါရေ အဝုတ္တတ္တာ၊ ‘‘မဂ္ဂါ အနောက္ကမိတွာ။ပေ။ ပါစိတ္တိယ’’န္တိ (ကင်္ခါ. အဋ္ဌ. ဝိကာလဂါမပ္ပဝေသနသိက္ခာပဒဝဏ္ဏနာ) ပဋိက္ခိတ္တတ္တာ စ. ဝေသာလိံ အနုပရိယာယိတွာ ပရိတ္တံ ကရောန္တေနာပိ အာနန္ဒတ္ထေရေန သုပ္ပဋိစ္ဆန္နတာဒိံ အကောပေန္တေနေဝ၊ အပညတ္တေ ဝါ သိက္ခာပဒေ ကတန္တိ ဒဋ္ဌဗ္ဗံ. ကေစိ ပန ‘‘အန္တရာရာမာဒိဂါမန္တရေ ဌိတေဟိ ဂရုဋ္ဌာနီယာနံ ပစ္စုဂ္ဂမနာနုဂ္ဂမနာဒိဝသေန ဂါမဝီထိံ ဩတရိတုံ ဝဋ္ဋတီ’’တိ ဝဒန္တိ၊ တမ္ပိ အန္တရဃရံ ပဝိသန္တံ ပတိ ကာတုံ န ဝဋ္ဋတိ ဧဝ. အန္တရာရာမာဒိကပ္ပိယဘူမိံ ပန ဥဒ္ဒိဿ ဂစ္ဆန္တံ ပတိ ကာတုံ ဝဋ္ဋတီတိ ခါယတိ၊ ဝီမံသိတဗ္ဗံ. သန္တံ ဘိက္ခုံ အနာပုစ္ဆနာ၊ အနနုညာတကာရဏာ ဝိကာလေ ဂါမပ္ပဝေသောတိ ဒွေ အင်္ဂါနိ.

ဝိကာလဂါမပ္ပဝိသနသိက္ခာပဒဝဏ္ဏနာ နိဋ္ဌိတာ.