၈. ဒုဗ္ဗဏ္ဏကရဏသိက္ခာပဒဝဏ္ဏနာ

၃၆၈. အဋ္ဌမေ ပဋိလဒ္ဓနဝစီဝရေနာတိ ဧတ္ထ ပုဗ္ဗေ အကတကပ္ပံ ကတိပါဟံ နိဝါသနတ္ထာယ တာဝကာလိကဝသေန လဒ္ဓမ္ပိ သင်္ဂယှတီတိ ဝဒန္တိ.

၃၆၉. ‘‘နဝံ နာမ အကတကပ္ပ’’န္တိ သာမညတော ဝုတ္တတ္တာ အညေန ဘိက္ခုနာ ကပ္ပဗိန္ဒုံ ဒတွာ ပရိဘုတ္တံ စီဝရံ၊ တေန ဝါ၊ တတော လဘိတွာ အညေန ဝါ ကေနစိ ဒိန္နမ္ပိ ကတကပ္ပမေဝ နဝံ နာမ န ဟောတီတိ ဒဋ္ဌဗ္ဗံ. ‘‘နိဝါသေတုံ ဝါ ပါရုပိတုံ ဝါ’’တိ ဝုတ္တတ္တာ အံသဗဒ္ဓကာသာဝမ္ပိ ပါရုပိတဗ္ဗတော ကပ္ပံ ကာတဗ္ဗန္တိ ဝဒန္တိ. စမ္မကာရနီလံ နာမ စမ္မံ နီလဝဏ္ဏံ ကာတုံ ယောဇိယမာနံ နီလံ. ပကတိနီလမေဝါတိ ကေစိ. ယထာဝုတ္တစီဝရဿ အကတကပ္ပတာ၊ အနဋ္ဌစီဝရာဒိတာ၊ နိဝါသနာဒိတာတိ တီဏိ အင်္ဂါနိ.

ဒုဗ္ဗဏ္ဏကရဏသိက္ခာပဒဝဏ္ဏနာ နိဋ္ဌိတာ.