၇. မဟာနာမသိက္ခာပဒဝဏ္ဏနာ

၃၀၃. သတ္တမေ မဟာနာမောတိ သုက္ကောဒနဿ ပုတ္တော အနုရုဒ္ဓတ္ထေရဿ၊ သတ္ထု စ ဇေဋ္ဌဘာတာ. အာနန္ဒတ္ထေရော အမိတောဒနဿ ပုတ္တော၊ နန္ဒတ္ထေရော ပန သုဒ္ဓေါဒနဿေဝ.

၃၀၅. ပါဠိယံ ကာလံ အာဟရိဿထာတိ အဇ္ဇတနံ ကာလံ ဝီတိနာမေဿထ၊ သွေ ဘေသဇ္ဇံ ဟရိဿထာတိ ဝါ အတ္ထော. ‘‘အတ္ထိ ပဝါရဏာ ဘေသဇ္ဇပရိယန္တာ စ ရတ္တိပရိယန္တာ စာ’’တိ တတိယကောဋ္ဌာသေ နိယမိတမေဝ ဘေသဇ္ဇံ နိယမိတကာလန္တရေယေဝ ဂဟေတဗ္ဗံ၊ န တတော ဗဟိ. ဣတရထာ ဝိသုံ ပယောဇနံ နတ္ထီတိ ဒဋ္ဌဗ္ဗံ. သပရိယန္တာ သံဃပဝါရဏာ၊ တဒုတ္တရိ ဘေသဇ္ဇဝိညတ္တိ၊ အဂိလာနတာတိ ဣမာနေတ္ထ တီဏိ အင်္ဂါနိ.

မဟာနာမသိက္ခာပဒဝဏ္ဏနာ နိဋ္ဌိတာ.