၂. အတ္ထင်္ဂတသိက္ခာပဒဝဏ္ဏနာ

၁၅၃. ဒုတိယေ ကောကနဒန္တိ ပဒုမဝိသေသံ၊ တံ ကိရ ဗဟုပတ္တံ ဝဏ္ဏသမ္ပန္နံ. အယဉှေတ္ထ အတ္ထော – ယထာ ကောကနဒသင်္ခါတံ ပဒုမံ၊ ဧဝံ ဖုလ္လမုခပဒုမံ အဝီတဂုဏဂန္ဓံ နိမ္မလေ အန္တလိက္ခေ အာဒိစ္စံ ဝိယ စ အတ္တနော တေဇသာ တပန္တံ တတော ဧဝ ဝိရောစမာနံ အင်္ဂေဟိ နိစ္ဆရဏကဇုတိယာ အင်္ဂီရသံ သမ္မာသမ္ဗုဒ္ဓံ ပဿာတိ. ရဇောဟရဏန္တိ သရီရေ ရဇံ ပုဉ္ဆတီတိ ရဇောဟရဏန္တိ ပုဉ္ဆနစောဠဿ နာမံ. ဩဘာသဝိဿဇ္ဇနပုဗ္ဗကာ ဘာသိတဂါထာ ဩဘာသဂါထာ နာမ. ဝိသုဒ္ဓိမဂ္ဂါဒီသု (ဝိသုဒ္ဓိ. ၂.၃၈၆) ပန ‘‘ရာဂေါ ရဇော န စ ပန ရေဏု ဝုစ္စတီ’’တိအာဒိ ဩဘာသဂါထာ ဝုတ္တာ၊ န ပနေသာ ‘‘အဓိစေတသော’’တိ ဂါထာ. အယဉ္စ စူဠပန္ထကတ္ထေရဿ ဥဒါနဂါထာတိ ဥဒါနပါဠိယံ နတ္ထိ၊ ဧကုဒါနိယတ္ထေရဿ (ထေရဂါ. ၁.၆၇ ဧကုဒါနိယတ္ထေရဂါထာဝဏ္ဏနာ) နာယံ ဥဒါနဂါထာတိ တတ္ထ ဝုတ္တံ. ဣဓ ပန ပါဠိယာ ဧဝ ဝုတ္တတ္တာ ထေရဿာပိ ဥဒါနဂါထာတိ ဂဟေတဗ္ဗံ. ဣဓ စ အဂရုဓမ္မေနာပိ ဩဝဒတော ပါစိတ္တိယမေဝ. အတ္ထင်္ဂတသူရိယတာ၊ ပရိပုဏ္ဏူပသမ္ပန္နတာ၊ ဩဝဒနန္တိ ဣမာနေတ္ထ တီဏိ အင်္ဂါနိ.

အတ္ထင်္ဂတသိက္ခာပဒဝဏ္ဏနာ နိဋ္ဌိတာ.