၇. ဝိဟာရကာရသိက္ခာပဒဝဏ္ဏနာ

၃၆၅. သတ္တမေ ပူဇာဝစနပ္ပယောဂေ ကတ္တရိ သာမိဝစနဿပိ ဣစ္ဆိတတ္တာ ‘‘ဂါမဿ ဝါ ပူဇိတ’’န္တိ ဝုတ္တံ. ရူပိန္ဒြိယေသု ဝိဇ္ဇမာနံ သန္ဓာယ ဧကိန္ဒြိယတာ ဝုစ္စတီတိ အာဟ ‘‘ကာယိန္ဒြိယံ သန္ဓာယာ’’တိ. တေ ဟိ မနိန္ဒြိယမ္ပိ ဘူတဂါမာနံ ဣစ္ဆန္တိ.

၃၆၆. ကိရိယတော သမုဋ္ဌာနာဘာဝေါတိ ဝတ္ထုနော အဒေသနာသင်္ခါတံ အကိရိယံ ဝိနာ န ကေဝလံ ကိရိယာယ သမုဋ္ဌာနဘာဝေါ. ကိရိယာကိရိယတော ဟိ ဣဒံ သမုဋ္ဌာတိ. ဣမသ္မိံ သိက္ခာပဒေ ဘိက္ခူ ဝါ အနဘိနေယျာတိ ဧတ္ထ ဝါ-သဒ္ဒေါ သမုစ္စယတ္ထော၊ တေန ‘‘မဟလ္လကဉ္စ ဝိဟာရံ ကရေယျ၊ ဘိက္ခူ စ အနဘိနေယျာ’’တိ ကိရိယဉ္စ အကိရိယဉ္စ သမုစ္စိနောတိ.

ဝိဟာရကာရသိက္ခာပဒဝဏ္ဏနာ နိဋ္ဌိတာ.