၁. ပဌမသိက္ခာပဒဝဏ္ဏနာ

၉၃၄-၅. ဧကာယ နိပန္နာယ အပရာ နိပဇ္ဇတိ၊ အာပတ္တိ ပါစိတ္တိယဿာတိ ‘‘ဥဘိန္နမ္ပိ ပဌမနိပန္နာယ အနုဋ္ဌာပနာ’’တိ ဝတွာ ဧတ္ထ ကိရိယာကိရိယန္တိ ဧကေ၊ တံ အဋ္ဌကထာယ ဝိရုဇ္ဈတိ. ‘‘ကိရိယ’’န္တိ ဟိ အဋ္ဌကထာယံ ဝုတ္တံ. အထ ကဿာ အာပတ္တီတိ? ဥဘိန္နမ္ပိ နိပဇ္ဇနကိရိယံ ပဋိစ္စ. ဣမဿ အနာပတ္တိဝါရေ ‘‘ဝဝတ္ထာနံ ဒဿေတွာ’’တိ နတ္ထိ၊ တသ္မာ ဝဝတ္ထာနံ ကတွာ နိပဇ္ဇိတုံ န ဝဋ္ဋတီတိ ဧကေ. ဝိပုလတရေ ဝဋ္ဋတီတိ ဧကေ. ‘‘အန္တရံ ကတွာ နိပဇ္ဇိတုံ ဝဋ္ဋတီ’’တိ ပေါရာဏဂဏ္ဌိပဒေ လိခိတံ.

ပဌမသိက္ခာပဒဝဏ္ဏနာ နိဋ္ဌိတာ.