၄. စတုတ္ထပါရာဇိကသိက္ခာပဒဝဏ္ဏနာ

၆၇၅. ‘‘လောကဿာဒသင်္ခါတဿ မိတ္တသန္ထဝဿ ဝသေန တံ ဒဿေတုံ ကာယသံသဂ္ဂရာဂေနာတိ ဝုတ္တ’’န္တိ လိခိတံ. တိဿိတ္ထိယောတိ တီသု ဣတ္ထီသု၊ တိဿော ဝါ ဣတ္ထိယော. တံ န သေဝေတိ တာသု န သေဝတိ. အနရိယာတိ ဥဘတောဗျဉ္ဇနာ. ဗျဉ္ဇနသ္မိန္တိ အတ္တနော ဗျဉ္ဇနေ. န သေဝေတိ န သေဝတိ. န စာစရေတိ နာစရတိ. ဝဏ္ဏာဝဏ္ဏောတိ ဒွီဟိပိ သုက္ကဝိဿဋ္ဌိ. ဂမနုပ္ပါဒနန္တိ သဉ္စရိတ္တံ.

၆၇၆. ‘‘နိဝတ္ထံ ဝါ ပါရုတံ ဝါ’’တိ ဧတ္ထ နိဝတ္ထဿ ဝါ ပါရုတဿ ဝါ ဝတ္ထဿ ဂဟဏံ သာဒိယတီတိ အတ္ထော.

စတုတ္ထပါရာဇိကသိက္ခာပဒဝဏ္ဏနာ နိဋ္ဌိတာ.

ပါရာဇိကကဏ္ဍဝဏ္ဏနာ နိဋ္ဌိတာ.