၉. ပါတိမောက္ခဋ္ဌပနက္ခန္ဓကဝဏ္ဏနာ

ပါတိမောက္ခုဒ္ဒေသယာစနကထာဝဏ္ဏနာ

၃၈၃-၄. ‘‘နန္ဒိမုခီ’’တိ လိခိတံ. အာယတကေနေဝါတိ အာဒိမှိ ဧဝ. ယန္တိ ယသ္မာ. သဝန္တိယော မဟာနဒိယော. ‘‘မဟန္တဘူတာန’’န္တိ ပါဌော. ပတ္တာတိ ပတွာ. ‘‘သမူလိကာယ ဌပေတိ အကတာယာ’’တိ ဌပနကဿ သညာမူလဝသေန ဝုတ္တံ. တံ ဝတ္ထုံ အဝိနိစ္ဆိနိတွာဝ ပရိသာ ဝုဋ္ဌာတိ.

အတ္တာဒါနအင်္ဂကထာဝဏ္ဏနာ

၃၉၈-၉. ‘‘အတ္တာဒါနန္တိ သယံ ပရေဟိ စောဒိတော အတ္တာနံ သောဓေတုံ အနာဒိယိတွာ ပရေသံ ဝိပ္ပဋိပတ္တိံ ဒိသွာ သာသနံ သောဓေတုံ အတ္တနာ အာဒိတဗ္ဗ’’န္တိ လိခိတံ. ဝဿာရတ္တောတိ ဝဿကာလော. သပ္ပဋိမာသောတိ အာကဍ္ဎနယုတ္တောတိ အဓိပ္ပါယော.

၄၀၁. ဥပဒဟာတဗ္ဗောတိ ဥပ္ပါဒေတဗ္ဗော၊ ဝိပ္ပဋိသာရမုခေန ဓာရေတဗ္ဗောတိ အဓိပ္ပါယော.

ပါတိမောက္ခဋ္ဌပနက္ခန္ဓကဝဏ္ဏနာ နိဋ္ဌိတာ.