၃. ဥက္ကောဋနသိက္ခာပဒဝဏ္ဏနာ

၃၉၂. တတိယေ ဒွါဒသ ဥက္ကောဋာ ဝေဒိတဗ္ဗာ. တတ္ထ အကတံ ကမ္မံ၊ ဒုက္ကဋံ ကမ္မံ၊ ပုန ကာတဗ္ဗံ ကမ္မန္တိ အနုဝါဒါဓိကရဏေ လဗ္ဘန္တိ. အနိဟဋံ၊ ဒုန္နိဟဋံ၊ န ပုန ဟရိတဗ္ဗန္တိ ဝိဝါဒါဓိကရဏေ လဗ္ဘန္တိ၊ အဝိနိစ္ဆိတံ၊ ဒုဝိနိစ္ဆိတံ၊ ပုန ဝိနိစ္ဆိတဗ္ဗန္တိ အာပတ္တာဓိကရဏေ လဗ္ဘန္တိ. အဝူပသန္တံ၊ ဒုဝူပသန္တံ၊ ပုန ဝူပသမေတဗ္ဗန္တိ ကိစ္စာဓိကရဏေ လဗ္ဘန္တီတိ အဋ္ဌကထာနယော၊ ပါဠိယံ ပနေတ္ထ မုခမတ္တမေဝ ဒဿိတံ.

ဥက္ကောဋနသိက္ခာပဒဝဏ္ဏနာ နိဋ္ဌိတာ.