၆. စာရိတ္တသိက္ခာပဒဝဏ္ဏနာ
၂၉၄. သဘတ္တောတိ နိမန္တနဘတ္တောတိ ပေါရာဏာ.
ပုရေဘတ္တဉ္စ ပိဏ္ဍာယ၊ စရိတွာ ယဒိ ဘုဉ္ဇတိ၊
သိယာ ပရမ္ပရာပတ္တိ၊ ပစ္ဆာဘတ္တံ န သာ သိယာ.
ပစ္ဆာဘတ္တဉ္စ ဂမိကော၊ ပုဗ္ဗဂေဟံ ယဒိ ဂစ္ဆေ၊
ဧကေ အာပတ္တိယေဝါတိ၊ အနာပတ္တီတိ ဧကစ္စေ.
ကုလန္တရဿောက္ကမနေ၊ အာပတ္တိမတယော ဟိ တေ၊
သမာနဘတ္တပစ္စာသာ၊ ဣတိ အာဟု ဣဓာပရေ.
မတာ ဂဏိကဘတ္တေန၊ သမေန္တိ နံ နိမန္တနေ၊
ဝိဿဇ္ဇနံ သမာနန္တိ၊ ဧကေ သမ္မုခတာပရေ.
သန္နိဋ္ဌာနတ္ထိကေဟေဝ၊ ဝိစာရေတဗ္ဗဘေဒတော၊
ဝိညူ စာရိတ္တမိစ္စေဝ၊ သိက္ခာပဒမိဒံ ဝိဒူတိ.
စာရိတ္တသိက္ခာပဒဝဏ္ဏနာ နိဋ္ဌိတာ.