၆-၇. တဏှက္ခယသုတ္တာဒိဝဏ္ဏနာ

၂၀၇-၂၀၈. ‘‘သော မံ ပုစ္ဆိဿတီ’’တိ အဓိပ္ပါယေန ဘဂဝတာ ဩသာပိတဒေသနံ. ပတ္ထဋတ္တာ ဘာဝနာပါရိပူရိယာ ဝိတ္ထာရိတံ ဂတတ္တာ. မဟန္တဘာဝန္တိ ဘာဝနာဝသေနေဝ မဟတ္တံ ဂတတ္တာ. တတော ဧဝ ဝဍ္ဎိပ္ပမာဏာ. နီဝရဏဝိဂမေ သမ္ဘဝတော ပစ္စယတော ဗျာပါဒေါ ဝိဂတော ဟောတီတိ အာဟ – ‘‘နီဝရဏာနံ ဒူရီဘာဝေန ဗျာပါဒဝိရဟိတတ္တာ’’တိ. တဏှာမူလကန္တိ တဏှာပစ္စယံ. ယဉှိ တဏှာသဟဂတံ အသဟဂတမ္ပိ တဏှံ ဥပနိဿာယ နိပ္ဖန္နံ၊ သဗ္ဗံ တံ တဏှာမူလကံ. ပဟီယတိ အနုပ္ပါဒပ္ပဟာနေန. တဏှာဒီနံယေဝ ခယာ၊ န တေသံ သင်္ခါရာနံ ခယာ. ဧတေဟိ တဏှက္ခယာဒိပဒေဟိ.