၈. နိဗ္ဗေဓဘာဂိယသုတ္တဝဏ္ဏနာ

၂၀၉. နိဗ္ဗိဇ္ဈန္တီတိ နိဗ္ဗေဓာ၊ နိဗ္ဗိဇ္ဈနဓမ္မာ ဓမ္မဝိနယာဒယော၊ တပ္ပရိယာပန္နတာယ နိဗ္ဗေဓဘာဂေ ဂတော နိဗ္ဗေဓဘာဂိယော၊ တံ နိဗ္ဗေဓဘာဂိယံ. တေနာဟ ‘‘နိဗ္ဗိဇ္ဈနကောဋ္ဌာသိယ’’န္တိ. ဘာဝေတွာ ဌိတေန စိတ္တေန. ဝိပဿနာမဂ္ဂမ္ပိ ဂဟေတွာ ‘‘မဂ္ဂဗောဇ္ဈင်္ဂါ မိဿကာ’’တိ ဝုတ္တာ. တေဟီတိ ဗောဇ္ဈင်္ဂေဟိ ဘာဝိတံ စိတ္တံ. တေ ဝါ ဗောဇ္ဈင်္ဂေ ဘာဝေတွာ ဌိတံ စိတ္တံ နာမ ဖလစိတ္တံ၊ တသ္မာ နိဗ္ဗတ္တိတလောကုတ္တရမေဝ. တမ္ပီတိ ဖလစိတ္တမ္ပိ မဂ္ဂါနန္တရတာယ မဂ္ဂနိဿိတံ ကတွာ မိဿကမေဝ ကထေတုံ ဝဋ္ဋတိ ‘‘ဗောဓာယ သံဝတ္တန္တီ’’တိ ဝုတ္တတ္တာ.