၆. အဿဇိသုတ္တဝဏ္ဏနာ

၈၈. ပဿမ္ဘိတွာတိ နိရောဓေတွာ. နော စ သွာဟန္တိ နော စ သု အဟံ. ပရိဟာယိ ကုပ္ပဓမ္မတ္တာ. ဧတန္တိ သမာဓိမတ္တသာရံ၊ သီလမတ္တေ ပန ဝတ္တဗ္ဗမေဝ နတ္ထိ. ကထံ ဟောတီတိ ကထံ အဘိနန္ဒနာ ဟောတိ. ဒုက္ခံ ပတွာတိ ဒုက္ခုပ္ပတ္တိဟေတု သုခံ ပတ္ထေတိ ‘‘ဧဝံ မေ ဒုက္ခပရိဠာဟော န ဘဝိဿတီ’’တိ. ယဒဂ္ဂေနာတိ ယေန ဘာဂေန. ‘‘ဒုက္ခံ ပတ္ထေတိယေဝါ’’တိ ဝတွာ တတ္ထ ကာရဏမာဟ ‘‘သုခဝိပရိဏာမေန ဟီ’’တိအာဒိ. သုခဝိပရိဝတ္တေ သုခဝိပရိဏာမဒုက္ခံ၊ တသ္မာ သုခံ အဘိနန္ဒန္တော အတ္ထတော ဒုက္ခံ အဘိနန္ဒတိ နာမ.

အဿဇိသုတ္တဝဏ္ဏနာ နိဋ္ဌိတာ.