၄. အနုရာဓသုတ္တဝဏ္ဏနာ

၈၆. တဿေဝ ဝိဟာရဿာတိ မဟာဝနေ ယသ္မိံ ဝိဟာရေ ဘဂဝါ ဝိဟရတိ၊ တဿေဝ ဝိဟာရဿ. ဣမေတိ အညတိတ္ထိယာ. ယသ္မာ အယံ ထေရော ဌပနီယံ ပဉှံ ဌပနီယဘာဝေန န ဌပေသိ၊ တသ္မာ. အညတိတ္ထိယာ။ပေ။ ဧတဒဝေါစုံ. တေနာဟ ‘‘ဧကဒေသေန သာသနသမယံ ဇာနန္တာ’’တိ.

ဂဟိတမေဝ ဟောတိ တတော ပဂေဝ သိဒ္ဓတ္တာ. တေနာဟ ‘‘တဿ မူလတ္တာ’’တိ. ဧဝန္တိ ‘‘ဒုက္ခဉ္စေဝ ပညပေမိ၊ ဒုက္ခဿ စ နိရောဓ’’န္တိ ဧဝံ. ဝဋ္ဋဝိဝဋ္ဋမေဝါတိ ပဉ္စန္နံ ပန ခန္ဓာနံ သမနုပဿနာယ ဝသေန ဝဋ္ဋံ၊ ‘‘ဧဝံ ပဿ’’န္တိအာဒိနာ ဝိဝဋ္ဋံ ကထိတမေဝ.

အနုရာဓသုတ္တဝဏ္ဏနာ နိဋ္ဌိတာ.