၅. သတ္တဋ္ဌာနသုတ္တဝဏ္ဏနာ

၅၇. သတ္တသု ဩကာသေသူတိ ရူပပဇာနနာဒီသု သတ္တသု ဩကာသေသု. ဝုသိတဝါသောတိ ဝုသိတအရိယဝါသော. ဧတ္ထာတိ ဣမသ္မိံ ဥဒ္ဒေသေ. သေသံ နာမ ဣဓ ဝုတ္တာဝသေသံ. ဝုတ္တနယေနာတိ ဟေဋ္ဌာ ဝုတ္တနယေန ဝေဒိတဗ္ဗံ. ဥဿဒနန္ဒိယန္တိ ဥဿန္နဂုဏဝတော တောသနံ သမ္မောဒါပနံ. ဂုဏကိတ္တနေန ပလောဘနီယံ သေက္ခကလျာဏပုထုဇ္ဇနာနံ ပသာဒုပ္ပါဒနေန. ဣဒါနိ ဝုတ္တမေဝ အတ္ထံ ပါကဋံ ကာတုံ ‘‘ယထာ ဟီ’’တိအာဒိ ဝုတ္တံ.

ဧတ္တာဝတာတိ ပဉ္စန္နံ ခန္ဓာနံ ဝသေန သတ္တသု ဌာနေသု ကောသလ္လဒီပနေန ဧတ္တကေန ဒေသနာက္ကမေန. တန္တိ အာရမ္မဏံ. ဓာတုအာဒိမတ္တမေဝါတိ ဓာတာယတနပဋိစ္စသမုပ္ပါဒမတ္တမေဝ. ဣမေသု ဓမ္မေသူတိ ဣမေသု ဇာတာဒီသု. ကမ္မံ ကတွာတိ သမ္မသနကမ္မံ နိဋ္ဌပေတွာတိ အတ္ထော. ဧဝမေတ္ထ ပဉ္စန္နံ ခန္ဓာနံ ဝသေန သတ္တဋ္ဌာနကောသလ္လပဝတ္တိယာ ပဘေဒေန ဝိဘဇိတွာ ‘‘တိဝိဓူပပရိက္ခီ’’တိ ဒဿေတိ ဓမ္မရာဇာ.

သတ္တဋ္ဌာနသုတ္တဝဏ္ဏနာ နိဋ္ဌိတာ.