၂. ပုပ္ဖသုတ္တဝဏ္ဏနာ

၉၄. ဝိဝဒတီတိ ဝိဝါဒံ ကရောတိ. ဝဒန္တောတိ အယထာသဘာဝေန ဝဒန္တော. ဝိဝဒတိ ဓမ္မတာယ ဝိရုဒ္ဓံ ကတွာ ဝဒတိ. လောကဓမ္မောတိ လုဇ္ဇနသဘာဝဓမ္မော. ကော ပန သောတိ အာဟ ‘‘ခန္ဓပဉ္စက’’န္တိ. တေနာဟ ‘‘တံ ဟီ’’တိအာဒိ. ကထံ ကရောမီတိ ကေန ပကာရေနာဟံ ဗာလံ အဇာနန္တံ ကရောမိ. တေနာဟ ‘‘မယှံ ဟီ’’တိအာဒိ. တထာ စာဟ ‘‘အက္ခာတော ဝေါ မယာ မဂ္ဂေါ’’တိအာဒိ (ဓ. ပ. ၂၇၅). ‘‘တယော လောကာ ကထိတာ’’တိ ဝတွာ တံ ဝိဝရိတုံ ‘‘နာဟံ၊ ဘိက္ခဝေ’’တိအာဒိမာဟ.

ပုပ္ဖသုတ္တဝဏ္ဏနာ နိဋ္ဌိတာ.