၅. သမာဓိသုတ္တဝဏ္ဏနာ

၅. သမာဓီတိ အပ္ပနာသမာဓိ၊ ဥပစာရသမာဓိ ဝါ. ကမ္မဋ္ဌာနန္တိ သမာဓိပါဒကံ ဝိပဿနာကမ္မဋ္ဌာနံ. ‘‘ဖာတိံ ဂမိဿတီ’’တိ ပါဌော. ပတ္ထေတီတိ ‘‘အဟော ဝတ မေ ဤဒိသံ ရူပံ ဘဝေယျာ’’တိ. အဘိဝဒတီတိ တဏှာဒိဋ္ဌိဝသေန အဘိနိဝေသံ ဝဒတိ. တေနာဟ ‘‘တာယ အဘိနန္ဒနာယာ’’တိအာဒိ. ‘‘အဟော ပိယံ ဣဋ္ဌ’’န္တိ ဝစီဘေဒေ အသတိပိ တထာ လောဘုပ္ပါဒေ သတိ အဘိဝဒတိယေဝ နာမ. တေနာဟ ‘‘ဝါစံ အဘိန္ဒန္တော’’တိ. ‘‘မမ ဣဒ’’န္တိ အတ္တနော ပရိဏာမေတွာ အနညဂေါစရံ ဝိယ ကတွာ ဂဏှန္တော အဇ္ဈောသာယ တိဋ္ဌတိ နာမာတိ ဒဿေန္တော အာဟ ‘‘ဂိလိတွာတိ ပရိနိဋ္ဌပေတွာ ဂဏှာတီ’’တိ. ‘‘အဘိနန္ဒတီ’’တိအာဒယော ပုဗ္ဗဘာဂဝသေန ဝုတ္တာ၊ ‘‘ဥပ္ပဇ္ဇတိ နန္ဒီ’’တိ ဒွါရပ္ပတ္တဝသေန. ပဌမေဟိ ပဒေဟိ အနုသယော၊ ပစ္ဆိမေန ပရိယုဋ္ဌာနန္တိ ကေစိ ‘‘ဂဟဏဋ္ဌေန ဥပါဒါန’’န္တိ ကတွာ. နာဘိနန္ဒတိ နာဘိဝဒတီတိ ဧတ္ထ ဟေဋ္ဌာ ဝုတ္တဝိပရိယာယေန အတ္ထော ဝေဒိတဗ္ဗော. န ‘‘ဣဋ္ဌံ ကန္တ’’န္တိ ဝဒတီတိ ‘‘ဣဋ္ဌ’’န္တိ န ဝဒတိ၊ ‘‘ကန္တ’’န္တိ န ဝဒတိ. နာဘိဝဒတိယေဝ တဏှာယ အနုပါဒိယတ္တာ.

သမာဓိသုတ္တဝဏ္ဏနာ နိဋ္ဌိတာ.