၂. ဗဠိသသုတ္တဝဏ္ဏနာ

၁၅၈. ဗဠိသေန စရတိ၊ တေန ဝါ ဇီဝတီတိ ဗာဠိသိကော. တေနာဟ ‘‘ဗဠိသံ ဂဟေတွာ စရမာနော’’တိ. အာမိသဂတန္တိ အာမိသူပဂတံ အာမိသပတိတံ. တေနာဟ ‘‘အာမိသမက္ခိတ’’န္တိ. ဘိန္နာဓိကရဏာနမ္ပိ ဗာဟိရတ္ထသမာသော ဟောတေဝါတိ အာဟ ‘‘အာမိသေ စက္ခုဒဿန’’န္တိ. အယော ဝုစ္စတိ သုခံ၊ တဗ္ဗိဓုရတာယ အနယော၊ ဒုက္ခန္တိ အာဟ ‘‘ဒုက္ခံ ပတ္တော’’တိ. အဿာတိ ဧတေန. ကတ္တုအတ္ထေ ဟိ ဧတံ သာမိဝစနံ. ယထာ ကိလေသာ ဝတ္တန္တိ၊ ဧဝံ ပဝတ္တမာနော ပုဂ္ဂလော ကိလေသဝိပ္ပယောဂေါ န ဟောတီတိ ဝုတ္တံ ‘‘ယထာ ကိလေသမာရဿ ကာမော၊ ဧဝံ ကတ္တဗ္ဗော’’တိ.

ဗဠိသသုတ္တဝဏ္ဏနာ နိဋ္ဌိတာ.