၄. နဝသုတ္တဝဏ္ဏနာ

၂၃၈. အဘိစေတသိ နိဿိတာ အာဘိစေတသိကာ. ပဋိပက္ခဝိဓမနေန အဘိဝိသိဋ္ဌံ စိတ္တံ အဘိစိတ္တံ. ယသ္မာ ဈာနာနံ တံသမ္ပယုတ္တံ စိတ္တံ နိဿာယ ပစ္စယော ဟောတိယေဝ၊ တသ္မာ ‘‘နိဿိတာန’’န္တိ ဝုတ္တံ. နိကာမလာဘီတိ ယထိစ္ဆိတလာဘီ. ယထာပရိစ္ဆေဒေနာတိ ယထာကတေန ကာလပရိစ္ဆေဒေန. ဝိပုလလာဘီတိ အပ္ပမာဏလာဘီ. ‘‘ကသိရ’’န္တိ ဟိ ပရိတ္တံ ဝုစ္စတိ၊ တပ္ပဋိပက္ခေန အကသိရံ အပ္ပမာဏံ. တေနာဟ ‘‘ပဂုဏဇ္ဈာနောတိ အတ္ထော’’တိ. သိထိလမာရဗ္ဘာတိ သိထိလံ ဝီရိယာရမ္ဘံ ကတွာတိ အတ္ထောတိ အာဟ ‘‘သိထိလံ ဝီရိယံ ပဝတ္တေတွာ’’တိ.

နဝသုတ္တဝဏ္ဏနာ နိဋ္ဌိတာ.