၁၁. မဟာကပ္ပိနသုတ္တဝဏ္ဏနာ

၂၄၅. မဟာကပ္ပိနောတိ ပူဇာဝစနမေတံ ယထာ ‘‘မဟာမောဂ္ဂလ္လာနော’’တိ. တထာရူပန္တိ ‘‘ဗုဒ္ဓေါ ဓမ္မော’’တိအာဒိကံ ဂုဏဝိသေသဝန္တပဋိဗဒ္ဓံ. သာသနန္တိ ဒေသန္တရတော အာဂတဝစနံ. ဇင်္ဃဝါဏိဇာတိ ဇင်္ဃစာရိနော ဝါဏိဇာ. ကိဉ္စိ သာသနန္တိ အပုဗ္ဗပဝတ္တိဒီပကံ ကိဉ္စိ ဝစနန္တိ ပုစ္ဆိ. ပီတိ ဥပ္ပဇ္ဇိ ယထာ တံ သုစိရံ ကတာဘိနီဟာရတာယ ပရိပက္ကဉာဏဿ. အပရိမာဏံ ဂုဏဿ အပရိမာဏတော သဗ္ဗညုဂုဏပရိဒီပနတော၊ သေသရတနဒွယေ နိယျာနိကဘာဝဒီပနတော ဒိဋ္ဌိသီလသာမညေန သံဟတဘာဝဒီပနတောတိ ဝတ္တဗ္ဗံ. ယထာနုသိဋ္ဌံ ပဋိပဇ္ဇမာနေ အပါယဒုက္ခတော သံသာရဒုက္ခတော စ အပတန္တေ ဓာရေတီတိ ဓမ္မော. သုပရိသုဒ္ဓဒိဋ္ဌိသီလသာမညေန သံဟတောတိ သံဃောတိ. ရတနတ္ထော ပန တိဏ္ဏမ္ပိ သဒိသော ဧဝါတိ.

နဝသတသဟဿာနိ အဒါသိ ဒေဝီ. တုမှေတိ ရာဇိနိံ ဂါရဝေန ဗဟုဝစနေန ဝဒတိ. ရာဂေါတိ အနုဂစ္ဆန္တရာဂေါ.

ဇနိတေတိ ကမ္မကိလေသေဟိ နိဗ္ဗတ္တိတေ. ကမ္မကိလေသေဟိ ပဇာတတ္တာ ပဇာတိ ပဇာသဒ္ဒေါ ဇနိတသဒ္ဒေန သမာနတ္ထောတိ အာဟ – ‘‘ဇနိတေ၊ ပဇာယာတိ အတ္ထော’’တိ. အဋ္ဌဟိ ဝိဇ္ဇာဟီတိ အမ္ဗဋ္ဌသုတ္တေ (ဒီ. နိ. ၁.၂၇၈) အာဂတနယေန. တတ္ထ ဟိ ဝိပဿနာဉာဏမနောမယိဒ္ဓီဟိ သဟ ဆ အဘိညာ ‘‘အဋ္ဌ ဝိဇ္ဇာ’’တိ အာဂတာ. တပတိ ပဋိပက္ခဝိဓမနေန ဝိဇ္ဇောတတိ၊ တံ သူရိယဿ ဝိရောစနန္တိ အာဟ – ‘‘တပတီတိ ဝိရောစတီ’’တိ. ဈာနံ သမာပဇ္ဇိတွာ သမာဟိတေန စိတ္တေန ဝိပဿနံ ဝဍ္ဎေတွာ ဖလသမာပတ္တိံ သမာပဇ္ဇိတွာ နိသိန္နောတိ အာဟ – ‘‘ဒုဝိဓေန ဈာနေန ဈာယမာနော’’တိ. သဗ္ဗမင်္ဂလဂါထာတိ သဗ္ဗမင်္ဂလာဝိရောဓီ ဂါထာတိ ဝဒန္တိ. တထာ ဟိ ဝဒန္တိ –

‘‘မင်္ဂလံ ဘဂဝါ ဗုဒ္ဓေါ၊ ဓမ္မော သံဃော စ မင်္ဂလံ၊

သဗ္ဗေသမ္ပိ စ သတ္တာနံ၊ သ ပုညဝိတမင်္ဂလ’’န္တိ.

ပူဇံ ကာရေတွာ ဧကံ အဂါရိကဓမ္မကထိကံ ဥပါသကံ အာဟ. ဧတ္ထ စ ‘‘ဈာယီ တပတီ’’တိ ဣမိနာ အာရမ္မဏူပနိဇ္ဈာနာနံ ဂဟိတတ္တာ ဓမ္မရတနံ ဂဟိတမေဝ. ‘‘ဗြာဟ္မဏော’’တိ ဣမိနာ သင်္ဃရတနံ ဂဟိတမေဝ. ဗုဒ္ဓရတနံ ပန သရူပေနေဝ ဂဟိတန္တိ.

မဟာကပ္ပိနသုတ္တဝဏ္ဏနာ နိဋ္ဌိတာ.