၂. ဟတ္ထိရာဇဝဏ္ဏသုတ္တဝဏ္ဏနာ

၁၃၈. အန္ဓဘာဝကာရကေတိ ပစုရဇနဿ စက္ခုဝိညာဏုပ္ပတ္တိနိဝါရဏေန အန္ဓဘာဝကာရကေ. မဟာတမေတိ မဟတိ တမသိ. ပါသာဏဖလကေ မဟာစီဝရံ သီသေ ဌပေတွာတိ ဧတေန တံ ဖလကံ အပဿာယ နိသိန္နောတိ ဒဿေတိ. ပဓာနန္တိ ဘာဝနံ. ပရိဂ္ဂဏှမာနောတိ သဗ္ဗသော ဂဏှန္တော အဝိဿဇ္ဇေန္တော၊ ဘာဝနံ အနုယုဉ္ဇန္တော အနုပုဗ္ဗသမာပတ္တိယော ဖလသမာပတ္တိဉ္စ မနသိကရောန္တောတိ အတ္ထော. တေနာဟ ‘‘နနု စာ’’တိအာဒိ. အရိဋ္ဌကောတိ အရိဋ္ဌကဝဏ္ဏော. တေနာဟ ‘‘ကာဠကော’’တိ.

ဒီဃမဒ္ဓါနန္တိ စိရတရံ ကာလံ. သံသရန္တိ အာသာဒနာဓိပ္ပါယေန သဉ္စရန္တော၊ အလံ တုယှံ ဧတေန နိပ္ပယောဇနန္တိ အဓိပ္ပါယော. န ဟိ တေန မာရဿ ကာစိ အတ္ထသိဒ္ဓီတိ.

ဟတ္ထိရာဇဝဏ္ဏသုတ္တဝဏ္ဏနာ နိဋ္ဌိတာ.