၅. ဒုတိယသင်္ဂါမသုတ္တဝဏ္ဏနာ

၁၂၆. သုဏာထာတိ ‘‘ဝတွာ’’တိ ဝစနသေသော. ဥပကပ္ပတီတိ သမ္ဘဝတိ. သယှံ ဟောတီတိ ကာတုံ သက္ကာ ဟောတိ. ‘‘ယဒါ စညေ’’တိ စ-ကာရော နိပါတမတ္တန္တိ အာဟ ‘‘ယဒါ အညေ’’တိ. ဝိလုမ္ပန္တီတိ ဝိနာသံ အစ္ဆိန္ဒနံ ကရောန္တိ. ဝိလုမ္ပီယတီတိ ဝိလုတ္တပရသန္တကဿ အသကတ္တာ ပုဂ္ဂလော ဒိဋ္ဌဓမ္မိကံ ကမ္မဖလံ ပဋိသံဝေဒေန္တော ဝိယ သယမ္ပိ ပရေန ဝိလုမ္ပီယတိ၊ ဓနဇာနိံ ပါပုဏာတိ. ‘‘ကာရဏ’’န္တိ ဟိ မညတီတိ ပါပကိရိယံ အတ္တနော ဟိတာဝဟံ ကာရဏံ ကတွာ မညတိ. ဇယန္တော ပုဂ္ဂလော ‘‘ဣဒံ နာမ ဇိနာမီ’’တိ မညမာနော သယမ္ပိ တတော ပရာဇယံ ပါပုဏာတိ. ဃဋ္ဋေတာရန္တိ ပါပကမ္မဝိပါကံ. ကမ္မဝိဝဋ္ဋေနာတိ ကမ္မဿ ဝိဝဋ္ဋနေန၊ ပစ္စယလာဘေန လဒ္ဓါဝသရေန ဝိဝဋ္ဋေတွာ ဝိဂမိတေန ကမ္မေနာတိ အတ္ထော.

ဒုတိယသင်္ဂါမသုတ္တဝဏ္ဏနာ နိဋ္ဌိတာ.