၂. ပဉ္စရာဇသုတ္တဝဏ္ဏနာ

၁၂၃. ရူပါတိ ရူပသင်္ခါတာ ကာမဂုဏာ. တေ ပန နီလာဒိဝသေန အနေကဘေဒဘိန္နာပိ ရူပါယတနတ္တာ စက္ခုဝိညေယျတံ နာတိဝတ္တန္တီတိ အာဟ ‘‘နီလပီတာဒိဘေဒံ ရူပါရမ္မဏ’’န္တိ. တော-သဒ္ဒေါပိ ဒါ-သဒ္ဒေါ ဝိယ ကာလတ္ထော ဟောတီတိ အာဟ ‘‘ယတောတိ ယဒါ’’တိ. မနံ အာပယတိ ဝဍ္ဎေတီတိ မနာပံ၊ မနောရမံ. မနာပနိပ္ဖတ္တိတန္တိ တဿ ပုဂ္ဂလဿ မနသာ ပိယာယိတံ၊ တဿ အဂ္ဂဘာဝေန ပရိယန္တံ ပရမံ ကောဋိံ ကတွာ ပဝတ္တိတန္တိ အတ္ထော. ပုဂ္ဂလမနာပန္တိ အာရမ္မဏသဘာဝံ အစိန္တေတွာ ပုဂ္ဂလဿ ဝသေန မနာပဘာဝေနေဝ ဣဋ္ဌတာယ ဣဋ္ဌန္တိ. သမ္မုတီတိ သမညာ. ပုဂ္ဂလမနာပံ နာမ သညာဝိပလ္လာသဝသေန ဝိပရီတမ္ပိ ဂဏှာတိ ဣတရသဘာဝတောတိ အာဟ ‘‘ယံ ဧကဿ။ပေ။ ဣဋ္ဌံ ကန္တ’’န္တိ. ဣဒါနိ တံ ဇိဝှါဝိညေယျဝသေန ယောဇေတွာ ဒဿေန္တော ‘‘ပစ္စန္တဝါသီန’’န္တိအာဒိမာဟ. ဣဒံ ပုဂ္ဂလမနာပန္တိ ဣဒံ ယထာဝုတ္တံ ဇိဝှါဝိညေယျံ ဝိယ အညမ္ပိ ဧဝံဇာတိကံ တေန တေန ပုဂ္ဂလေန မနာပန္တိ ဂဟေတဗ္ဗာရမ္မဏံ ပုဂ္ဂလမနာပံ နာမ.

လောကေ ပဋိဝိဘတ္တံ နတ္ထိ၊ ဝိဘဇိတွာ ဒဿနေန လောကေန မဓုရဇာတေနပိ ပဋိဝိဘတ္တံ ကတွာ ဂဟေတုံ န သက္ကုဏေယျာတိ အဓိပ္ပါယော. တေနာဟ ‘‘ဝိဘဇိတွာ ပန ဒဿေတဗ္ဗ’’န္တိ. ဒိဗ္ဗကပ္ပမ္ပီတိ ဒေဝလောကပရိယာပန္နသဒိသမ္ပိ အမနာပံ ဥပဋ္ဌာတိ ဥဠာရပဏီတာရမ္မဏပရိစယတော. မဇ္ဈိမာနံ ပန။ပေ။ ဝိဘဇိတဗ္ဗံ တေသံ မနာပဿ မနာပတော၊ အမနာပဿ အမနာပတော ဥပဋ္ဌာနတော. တတ္ထပိ ဣဋ္ဌာနိဋ္ဌပရိစ္ဆေဒေါ နိပ္ပရိယာယတော ဧဝံ ဝေဒိတဗ္ဗောတိ ဒဿေန္တော အာဟ ‘‘တဉ္စ ပနေတ’’န္တိအာဒိ. တဉ္စ ပနေတံ ဣဋ္ဌာနိဋ္ဌဘူတံ အာရမ္မဏံ ကာမာဝစရဇဝနေသု အကုသလဿ ဝသေန ယေဘုယျေန ပဝတ္တတီတိ ကတွာ တတ္ထ ‘‘ရဇ္ဇတိ ဒုဿတီ’’တိ အကုသလဿေဝ ပဝတ္တိ ဒဿိတာ. သေသကာမာဝစရဿပိ ဝသေန ပဝတ္တိ လဗ္ဘတေဝ. တထာ ဟိ တံ အပ္ပဋိကူလေပိ ပဋိကူလာကာရတော၊ ပဋိကူလေပိ အပ္ပဋိကူလာကာရတော ပဝတ္တတီတိ. ဝိပါကစိတ္တံ ဣဋ္ဌာနိဋ္ဌံ ပရိစ္ဆိန္ဒတိ၊ န သက္ကာ ဝိပါကံ ဝဉ္စေတုန္တိ. ကုသလကမ္မံ ဟိ ဧကန္တတော ဣဋ္ဌမေဝ၊ အကုသလကမ္မဉ္စ အနိဋ္ဌမေဝ၊ တသ္မာ တတ္ထ ဥပ္ပဇ္ဇမာနံ ဝိပါကစိတ္တံ ယထာသဘာဝတော ပဝတ္တတီတိ.

ယံ ပန သမ္မောဟဝိနောဒနိယံ ‘‘ကုသလကမ္မဇံ အနိဋ္ဌံ နာမ နတ္ထီ’’တိ ဧတ္တကမေဝ ဝုတ္တံ၊ တံ ပန နိဒဿနမတ္တံ ဒဋ္ဌဗ္ဗံ. တေန သောဘနံ အကုသလကမ္မဇမ္ပိ ဧကစ္စာနံ သတ္တာနံ ဣဋ္ဌန္တိ အနုညာတံ သိယာ. ကုသလကမ္မဇံ ပန သဗ္ဗေသံ ဣဋ္ဌမေဝါတိ ဝဒန္တိ. တိရစ္ဆာနဂတာနံ ကေသဉ္စိ မနုဿရူပံ အမနာပံ၊ ယတော တေ ဒိသွာဝ ပလာယန္တိ. မနုဿာ စ ဒေဝတာနံ ရူပံ ဒိသွာ ဘာယန္တိ၊ တေသမ္ပိ ဝိပါကဝိညာဏံ တံ ရူပံ အာရဗ္ဘ ကုသလဝိပါကမေဝ ဥပ္ပဇ္ဇတိ၊ တာဒိသဿ ပန ပုညဿ အဘာဝါ န တေသံ တတ္ထ အဘိရတိ ဟောတီတိ ဒဋ္ဌဗ္ဗံ. ကုသလကမ္မဇဿ ပန အနိဋ္ဌဿ အဘာဝေါ ဝိယ အကုသလကမ္မဇဿ သောဘနဿ ဣဋ္ဌဿ အဘာဝေါ ဝတ္တဗ္ဗော. ဟတ္ထိအာဒီနမ္ပိ ဟိ အကုသလကမ္မဇံ မနုဿာနံ အကုသလဝိပါကဿေဝ အာရမ္မဏံ၊ ကုသလကမ္မဇံ ပန ပဝတ္တေ သမုဋ္ဌိတံ ကုသလဝိပါကဿ၊ ဣဋ္ဌာရမ္မဏေန ဝေါမိဿကတ္တာ အပ္ပကံ အကုသလကမ္မဇံ ဗဟုလံ အကုသလဝိပါကုပ္ပတ္တိယာ ကာရဏံ န ဘဝိဿတီတိ သက္ကာ ဝတ္တုံ. ဣဒါနိ တမေဝ ဝိပါကဝသေန ဣဋ္ဌာနိဋ္ဌာရမ္မဏဝဝတ္ထာနံ ဝိဘာဝေတုံ ‘‘ကိဉ္စာပိ ဟီ’’တိအာဒိ ဝုတ္တံ. တယိဒံ သမ္မုတိမနာပသံဝိဘာဂတ္ထံ ဝုတ္တံ၊ ဣဓ ပန န တထာ ဝိဘတ္တန္တိ အာဟ ‘‘ဘဂဝါ ပနာ’’တိအာဒိ.

သော ဥပါသကော စန္ဒနင်္ဂလဂါမေ ဇာတတ္တာ ‘‘စန္ဒနင်္ဂလိကော’’တိ ပညာယတိ၊ ‘‘စန္ဒနဝိလာသော’’တိ ကေစိ. တဿ ဥပါသကဿ ပဋိဘာနံ ဥဒပါဒီတိ ယောဇနာ. တေ ရာဇာနော ဟတပ္ပဘေ ဟတသောဘေ ဒိသွာတိ သမ္ဗန္ဓော. ဥဒကာဘိသိတ္တေတိ ဥဒကေန အဘိသိဉ္စိတေ. အင်္ဂါရေ ဝိယာတိ အင်္ဂါရက္ခဏေ ဝိယ.

ကာလဿေဝါတိ ပဂေဝ. အဝိဂတဂန္ဓံ တင်္ခဏဝိကသိတတာယ. ဤဒိသံ ဝစနန္တိ ‘‘အစ္ဆာဒေသီ’’တိ ဧဝရူပံ ဝစနန္တိ.

ပဉ္စရာဇသုတ္တဝဏ္ဏနာ နိဋ္ဌိတာ.