၁၀. အနာထပိဏ္ဍိကသုတ္တဝဏ္ဏနာ

၁၀၁. ဒသမေ ကာမံ ဒေဝတာသံယုတ္တေပိ ‘‘ဣဒံ ဟိ တံ ဇေတဝန’’န္တိအာဒိနာ ဣမာ ဧဝ ဂါထာ အာဂတာ. တတ္ထ ‘‘အညတရာ ဒေဝတာ’’တိ နိဒါနံ အာရောပိတံ. ဟေဋ္ဌာ အာဂတနယတ္တာ ဧဝ ဟိ ပေါတ္ထကေသု န လိခိတံ၊ ဣဓ ပန ဒေဝပုတ္တသံယုတ္တေ ‘‘အနာထပိဏ္ဍိကော ဒေဝပုတ္တော’’တိ နိဒါနေ နိဂမေ စ အာဂတံ၊ တတ္ထ ဒေဝပုတ္တေန သတ္ထု ဝုတ္တပ္ပကာရဂုဏပဝေဒနဝသေန ဝုတ္တံ. သတ္ထာ ပန ဘိက္ခူနံ တမတ္ထံ ပဝေဒေန္တော ‘‘အညတရော ဒေဝပုတ္တော’’တိ အာဟ. တထာ ပဝေဒနေ ပန ကာရဏံ ဒဿေန္တော ‘‘အာနန္ဒတ္ထေရဿာ’’တိအာဒိမာဟ. အနုမာနဗုဒ္ဓိယာတိ အနုမာနဉာဏဿ. အာနုဘာဝပ္ပကာသနတ္ထန္တိ ဗလဒီပနတ္ထံ.

အနာထပိဏ္ဍိကသုတ္တဝဏ္ဏနာ နိဋ္ဌိတာ.

ဒုတိယဝဂ္ဂဝဏ္ဏနာ နိဋ္ဌိတာ.